ជាតិ
នយោបាយជាតិ
លោក ទេព នីថា នឹងដាក់ពាក្យជាបេក្ខជនអគ្គលេខាធិការ គ.ជ.ប ថ្មី
× អគ្គលេខាធិការគ.ជ.ប លោក ទេព នីថា បានបញ្ជាក់ថា រូបលោកនឹងដាក់ពាក្យជាបេក្ខជនអគ្គលេខាធិការគណៈកម្មាធិការរៀបចំការបោះឆ្នោតថ្មី ដើម្បីប្រកួតប្រជែងចូលកាន់តំណែងនេះម្ដងទៀត។គណៈកម្មាធិការជាតិរៀបចំការបោះឆ្នោត ជ្រើសរើសអគ្គលេខាធិការ ១ រូប និងអគ្គលេខាធិការរងចំនួន ៤ រូប។ គណៈកម្មាធិការជាតិរៀបចំការបោះឆ្នោតចាប់ផ្តើមទទួលពាក្យបេក្ខជនចាប់ពីថ្ងៃទី ១៧ ខែធ្នូដល់ថ្ងៃទី ២៦ ខែធ្នូ ឆ្នាំ ២០១៥ ។
ខណៈដែលគណៈកម្មាធិការជាតិរៀបចំការបោះឆ្នោត ប្រកាសជ្រើសរើសអគ្គលេខាធិការថ្មីនោះ លោក ទេព នីថា បញ្ជាក់ថា រូបលោកនឹងដាក់ពាក្យប្រជែងកាន់តំណែងនេះម្ដងទៀត។លោក ទេព នីថា ដែលកំពុងកាន់តួនាទីអគ្គលេខាធិការនេះ អះអាងថា លោកមានបទពិសោធច្រើន និងមានសមត្ថភាពគ្រប់គ្រាន់ក្នុងការបំពេញតួនាទីនេះ។ «ខ្ញុំនឹងដាក់ពាក្យម្ដងទៀត ព្រោះខ្ញុំធ្លាប់ធ្វើការងារនេះ ខ្ញុំមានបទពិសោធន៍ច្រើនឆ្នាំ និងមានសមត្ថភាពគ្រប់លក្ខខណ្ឌដែលអាចចូលប្រជែងចូលកាន់តំណែងអគ្គលេខាធិការ គជបនេះ»។ នេះជាការបញ្ជាក់របស់លោក ទេព នីថា ដែលអះអាងថា រូបលោកតែងតែអនុវត្តការងារតាមច្បាប់របស់គណៈកម្មាធិការរៀបចំការបោះឆ្នោតជានិច្ច។
លោក ទេព នីថា បានចូលធ្វើការងារនៅក្នុងស្ថាប័នគ.ជ.ប តាំងពីឆ្នាំ១៩៩៨ មក ដោយផ្តើមពីតួនាទីជានាយកខុទ្ទកាល័យអគ្គលេខាធិការ នៃគណៈកម្មាធិការជាតិរៀបចំការបោះឆ្នោត មុននឹងលោកទទួលតួនាទីជាអគ្គលេខាធិការ គជប បច្ចុប្បន្ននេះ។
តែការបំពេញតួនាទីអគ្គលេខាធិការ គជប កន្លងមកនេះ លោក ទេព នីថា ត្រូវបានគណបក្សសង្គ្រោះជាតិ និងសង្គមស៊ីវិលរិះគន់ថា លោក បំពេញការងារក្រោមអំណាចអ្នកនយោបាយ និងមាននិន្នាការគាំទ្រគណបក្សប្រជាជនកម្ពុជា ដោយគ្មានភាពឯករាជ្យ និងអព្យាក្រឹត្យឡើយ ។
ត្រង់ចំណុចនេះលោក ទេព នីថា មិនចាប់អារម្មណ៍និងការរិះគន់ទាំងនេះទេ។លោកថា ការរិះគន់នេះគឺជាសិទ្ធិបញ្ចេញមតិរបស់ពួកគេ។ តែការងារដែលលោកធ្វើកន្លងមក គឺលោកគោរពតាមច្បាប់ និងអនុវត្តតាមច្បាប់ប៉ុណ្ណោះ។
ថ្លែងប្រាប់សារព័ត៌មានថ្មី អគ្គលេខាធិការ គជប រូបនេះ បញ្ជាក់ថា៖«នេះជាសិទ្ធិរបស់ពួកគេ។តែការរិះគន់របស់ពួកគេពេលខ្លះត្រូវ ពេលខ្លះក៏មិនត្រូវដែរ។ហើយការបំពេញការងាររបស់ខ្ញុំមិនមែនធ្វើបានល្អទាំងអស់នោះទេ ពេលខ្លះល្អ ពេលខ្លះមិនល្អត្រូវតាមចិត្តគេដែរ»។
ទាក់ទងនឹងលោក ទេព នីថា នេះ អ្នកនាំពាក្យគណៈកម្មាធិការជាតិរៀបចំការបោះឆ្នោត លោក ហង្ស ពុទ្ធា ធ្លាប់ប្រាប់សារព័ត៌មានថ្មីៗថា ការជ្រើសរើសអគ្គលេខាធិការ និងអគ្គលេខាធិការរងថ្មីនេះ ក៏នៅតែបើកផ្លូវឲ្យលោក ទេព នីថា អគ្គលេខាធិការបច្ចុប្បន្ន ដាក់ពាក្យឈរឈ្មោះជាបេក្ខជនទទួលតំណែងនេះដដែល។ លោក ហង្ស ពុទ្ធា លើកឡើងថា ការជ្រើសរើសតំណែងទាំងពីរនេះ តាមរយៈការបោះឆ្នោតសម្រេចពីសមាជិកគ.ជ.បដោយសំឡេង ៥០ ភាគរយបូក ១ ។ « តំណែងនេះ យើងមិនបិទសិទ្ធិពលរដ្ឋណាមួយដែលមានសមត្ថភាពគ្រប់គ្រាន់ ដើម្បីដាក់ពាក្យកាន់តំណែងនេះទេ។ លោក ទេព នីថា បើគាត់ដាក់ពាក្យឈរជាបេក្ខជនអគ្គលេខាធិការទៀត គឺជាសិទ្ធិរបស់គាត់»។ នេះជាការបញ្ជាក់របស់លោក ហង្ស ពុទ្ធា។
បើតាមគណៈកម្មាធិការជាតិរៀបចំការបោះឆ្នោត លក្ខខណ្ឌដែលបេក្ខជនអាចដាក់ពាក្យក្នុងតំណែងទាំងពីរនេះបាន ត្រូវមានមានសញ្ជាតិខ្មែរពីកំណើត និងមានសញ្ជាតិតែមួយគត់ ក្នុងរយៈពេលបំពេញការងារ ។ បេក្ខជនត្រូវមានអាយុយ៉ាងតិច ៣០ ឆ្នាំ គិតដល់ថ្ងៃតែងតាំង មានសិទ្ធិបោះឆ្នោត មានសញ្ញាបត្រចាប់ពីឧត្តមសិក្សាឡើងទៅ មានបទពិសោធន៍ការងារយ៉ាងតិច ៥ ឆ្នាំ។ ជាងនេះបេក្ខជន មិនត្រូវជាសហព័ទ្ធ ឬញាតិលោហិត ឬញាតិពន្ធរហូតដល់ថ្នាក់ទី ១ របស់ប្រធាន អនុប្រធានគណបក្សនយោបាយ ដែលចូលរួមប្រកួតប្រជែងក្នុងការបោះឆ្នោតឡើយ៕
© រក្សាសិទ្ធិដោយ thmeythmey.com