កម្ពុជាគ្មានជម្រើសផ្សេង ក្រៅពីពង្រឹងទំនាក់ទំនងជាមួយរបបសឹកថៃ

ជាតិ

កម្ពុជាគ្មានជម្រើសផ្សេង ក្រៅពីពង្រឹងទំនាក់ទំនងជាមួយរបបសឹកថៃ

18, Dec 2015 , 1:08 pm

រូបភាព

រូបភាព៖ សម្តេច ហ៊ុនសែន ជាមួយឧត្តមសេនីយ៍ ប្រាយុទ្ធ ច័ន្ទអូចា ក្នុងដំណើរទស្សនកិច្ចមកកម្ពុជាចុងខែតុលាឆ្នាំ ២០១៤

ដោយ: សៅ ផលនិស្ស័យ (Sao Phal Niseiy)

នាយករដ្ឋមន្ត្រីកម្ពុជាសម្តេច ហ៊ុន សែន បានទៅដល់រាជាណាចក្រថៃហើយនៅព្រឹកថ្ងៃទី១៨ធ្នូនេះ ដើម្បីចូលរួមកិច្ចប្រជុំគណៈរដ្ឋមន្ត្រីចម្រុះកម្ពុជា-ថៃលើកទី២។ បញ្ហាព្រំដែនអាចនឹងក្លាយជាប្រធានបទសំខាន់ក្នុងកិច្ចប្រជុំលើកនេះ ក្រោយពីមានហេតុការណ៍កាត់សោរទ្វាររបងព្រំដៃនប្រាសាទព្រះវិហារ ពីសំណាក់ទាហានថៃ។

ប្រមុខរដ្ឋាភិបាលកម្ពុជា សម្តេច ហ៊ុន សែន បានចាប់ផ្តើមទស្សនកិច្ចផ្លូវការលើកដំបូងក្នុងរយៈពេល១០ឆ្នាំចុងក្រោយនេះនៅក្នុងប្រទេសថៃ ដែលបានផ្លាស់ប្តូរនាយករដ្ឋមន្ត្រីយ៉ាងច្រើនដែរ ក្នុងរយៈពេលដូចគ្នានេះ ក្រោយការដួលរលំនៃការកាន់អំណាចរបស់លោក ថាក់ស៊ីន ស៊ីណាវាត្រា។ ទស្សនកិច្ចរបស់មេដឹកនាំកំពូលរបស់កម្ពុជានៅលើទឹកដីថៃ បានចាប់ផ្តើមមួយថ្ងៃ បន្ទាប់ពីក្រុមយោធាថៃ ចូលមកកាត់សោរទ្វាររបងព្រំដែនប្រាសាទព្រះវិហារ ដែលនៅតែជារងើកភ្លើងនៃជម្លោះព្រំដែនរវាងប្រទេសជិតខាងទាំងពីរ។

តាមពិតដំណើរទស្សនកិច្ចរបស់សម្តេច ហ៊ុន សែន ពេលនេះ គឺដើម្បីចូលរួមក្នុងកិច្ចប្រជុំគណរដ្ឋមន្ត្រីចម្រុះកម្ពុជា-ថៃលើកទី២។ ជំនួបនៃរដ្ឋាភិបាលទាំងពីរ ក៏កំពុងត្រូវធ្វើឡើងក្នុងក្របខណ្ឌ នៃខួប៦៥ឆ្នាំនៃការបង្កើតចំណងការទូតរវាងប្រទេសទាំងពីរដែរ។

គេរំពឹងថា បញ្ហាព្រំដែនអាចក្លាយជាប្រធានបទសំខាន់ជាងគេក្នុងកិច្ចពិភាក្សារវាងនាយករដ្ឋមន្ត្រីកម្ពុជា ជាមួយសមភាគីថៃ។ ក្រៅពីនេះវិស័យកសិកម្ម ពាណិជ្ជកម្ម វិនិយោគ និងការផ្សាភ្ជាប់ក្នុងតំបន់ក៏នឹងក្លាយជាប្រធានបទក្នុងបញ្ជីនៃរបៀបវារៈនៃកិច្ចប្រជុំដែរ។ បើយោងតាមសេចក្តីប្រកាសព័ត៌មានរបស់ក្រសួងការបរទេសកម្ពុជា ចុងបញ្ចប់នៃកិច្ចប្រជុំ មេដឹកនាំនៃប្រទេសទាំងពីរ ក៏នឹងចុះហត្ថលេខាលើឯកសារសំខាន់ចំនួន៥ ផងដែរ។

គួររម្លឹកផងដែរថា ភាពចម្រូងចម្រាស និងភាពតានតឹងនៅតាមបន្ទាត់ព្រំដែនរវាងកម្ពុជា-ថៃ មិនមែនជាបញ្ហាថ្មីឡើយ។ ការប្រទូស្តសារ៉ាយគ្នា រវាងកងទ័ពប្រទេសទាំងពីរតាមបន្ទាត់ព្រំដែន ជាពិសេសនៅតំបន់ប្រាសាទព្រះវិហារ បានកើតឡើងជាញឹកញាប់ ចាប់ពីពេលប្រាសាទព្រះវិហារកម្ពុជា ក្លាយជាសម្បត្តិបេតិភណ្ឌពិភពលោក។ ក្នុងឆ្នាំ ២០០៨ , ២០០៩ និង ២០១១ ជាពេលដែលយោធានៃប្រទេសជិតខាងទាំងពីរ ផ្ទុះអាវុធដាក់គ្នា រហូតដល់ពេលខ្លះ មានការប្រើប្រាស់អាវុធធុនធ្ងន់បាញ់ផ្លោងដាក់គ្នា បណ្តាលឲ្យមនុស្សស្លាប់ និងរបួសទាំងសងខាង ទាំងជនស៊ីវិល និងទាហានថែមទៀតផង។

សាវតាទំនាក់ទំនងការទូតកម្ពុជាថៃចុងក្រោយ
ក្រោយប្អូនស្រីអតីតនាយករដ្ឋមន្ត្រីថៃលោក ថាក់ស៊ីន លោកស្រី យីងឡាក់ ឡើងកាន់តំណែង បញ្ហាព្រំដែនចាប់ផ្តើមស្ងប់ស្ងាត់ ហើយទំនាក់ទំនងរវាងប្រជាជាតិទាំងពីរចាប់ផ្តើមល្អប្រសើរឡើងវិញលើគ្រប់វិស័យ។ ប៉ុន្តែក្រោយក្រុមយោធាដឹកនាំដោយឧត្តមសេនីយ៍ ប្រាយុទ្ធ ច័ន្ទអូចា ដណ្តើមអំណាចកាលពីខែឧសភាឆ្នាំមុន ទំនាក់ទំនងកម្ពុជាថៃ ត្រលប់មករកភាពល្អក់កករវិញ ដោយគេឃើញក្រុមយោធា ចាប់ផ្តើមរឹតបន្តឹងការផ្តល់សិទ្ធិដល់ជនអន្តោប្រវេសន៍ មកប្រកបរបររកស៊ីនៅប្រទេសថៃ។ គេឃើញយោធាថៃចាប់បញ្ជូនពលករកម្ពុជាខុសច្បាប់រាប់សែននាក់មកកម្ពុជាវិញ ដែលសកម្មភាពនេះ បានបង្កឲ្យមានការភាន់ច្រឡំរហូតនាំឲ្យមានការតានតឹងតាមព្រំដែនថែមទៀតផង។

ប៉ុន្មានខែក្រោយឡើងកាន់អំណាច ប្រមុខរបបសឹកឧត្តមសេនីយ៍ ប្រាយុទ្ធ ច័ន្ទអូចា ស្រាប់តែអញ្ជើញមកទស្សនកិច្ចនៅព្រះរាជាណាចក្រកម្ពុជា ដើម្បីពង្រឹងទំនាក់ទំនងទ្វេភាគីឡើងវិញដែរ។ ក្នុងដំណើរទស្សនកិច្ចនោះ ភាគីកម្ពុជា និងថៃ បានសម្រេចចុះហត្ថលេខាលើអនុស្សារណៈយោគយល់គ្នាជាច្រើនផងដែរ ដើម្បីរឹតបន្តឹងចំណងមិត្តភាពទ្វេភាគី។ ចំណែកភាគីកម្ពុជា ក៏បង្ហាញការយោគយល់ចំពោះការចាប់បញ្ជូនពលករកម្ពុជាត្រលប់មកវិញដែរ។

កម្ពុជាអាចសំឡឹងឃើញថាឧត្តមសេនីយ៍ប្រាយុទ្ធ នឹងអាចបន្តកាន់កាប់ប្រទេសថៃក្នុងរយៈពេលយូរអង្វែងទៅមុខ។ ដូច្នេះវាជារឿងចាំបាច់បំផុត សម្រាប់កម្ពុជាដែលត្រូវពង្រឹងទំនាក់ទំនងជាមួយរបបសឹកនេះ។

របបយោធាថៃដូចជាកំពុងព្យាយាមរៀបចំផែនការយូរអង្វែងមួយ សម្រាប់ការក្តោបក្តាប់អំណាចទៅថ្ងៃមុខទៀត នេះបើគេមើលឃើញការដាក់ចេញគោលនយោបាយការបរទេសថ្មីដោយងាកពីអាមេរិក ទៅស្និទ្ធនឹងមហាយក្សចិន និងការព្យាយាមប្រមូលផ្តុំអំណាចក្នុងដៃក្នុងនាមជាអ្នកការពាររាជ្យបល្ល័ង្គជាដើមនោះ។ ដូចឃើញស្រាប់ហើយ មកទល់ឥឡូវ គេមិនទាន់មើលឃើញកាលបរិច្ឆេទច្បាស់លាស់នៃការបោះឆ្នោត (អាចចុងឆ្នាំ២០១៦ ឬដើមឆ្នាំ២០១៧) ដើម្បីផ្ទេរអំណាចទៅឲ្យរបបស៊ីវិល និងស្តារឡើងវិញនូវលទ្ធិប្រជាធិបតេយ្យនោះទេ។ នេះក៏ដោយសារតែ គោលនយោបាយ កំណែទម្រង់ស៊ីជម្រៅ និងផ្សះផ្សានយោបាយថៃដែលដាក់ចេញដោយរបបយោធាថៃ នៅមិនទាន់មានផ្លែផ្កានៅឡើយ៕