ជាតិ
សិស្សានុសិស្សវិទ្យាស្ថាន អន្ដរទ្វីប អាមេរិកាំង ចុះទស្សនកិច្ចសិក្សាអំពីប្រវត្តិរមណីយដ្ឋានឧទ្យានជាតិព្រះមុនីវង្ស “បូកគោ”
× រម្មណីយដ្ឋានកម្សាន្តភ្នំបូកគោ ជាប្រភេទរមណីយដ្ឋានប្រវត្តិសាស្ត្រមួយត្រូវបានបង្កើតឡើងជិតមួយ សតវត្សរ៍មកហើយគឺនៅឆ្នាំ1917 សម្រាប់ជាកន្លែងកម្សាន្តដ៏សែនមនោរម្យ ដែលមានកំពស់1079ម៉ែត្រពីទឹក សមុទ្រ។
លោក ឡុង ពិសី នាយករងសាខា នៃវិទ្យាស្ថាន អន្ដរទ្វីប អាមេរិកាំង បានឱ្យអ្នកយកព័ត៌មានយើងដឹងថា គោលបំណងនៃការដឹកនាំសិស្សានុសិស្សចុះទៅសិក្សាអំពីប្រវត្តិសាស្ត្រនៅភ្នំបូកគោនេះគឺ ដោយលោកយល់ឃើញ ថា រមណីយដ្ឋាននេះជាកន្លែងដែលទើបតែកសាងឡើងជាថ្មី បរិស្ថានស្អាត ខ្យល់អាកាសបរិសុទ្ធ អំណោយផល ដល់សិស្សានុសិស្សក្នុងការសិក្សាស្រាវជ្រាវ និងសម្រាកកម្សាន្ដអារម្មណ៍ ដែលនៅទីនោះមានកន្លែងកម្សាន្ដជាច្រើន ដូចជា វត្ដសំពៅប្រាំ ទឹកធ្លាក់3ជាន់ ទំនប់ទឹក វាលស្រែ100 វាំងខ្មៅ ឬវីឡាសីហនុ អគារកាស៊ីណូចាស់ និងរូប ចម្លាក់យាយម៉ៅ។ល។
លោកបានបន្ដថា ផ្សារភ្ជាប់ទៅនឹងដំណើរទស្សនកិច្ចសិក្សានេះ ដើម្បីឱ្យសិស្សានុសិស្សបានយល់ច្បាស់អំពីប្រវត្ដិសាស្ដ្រខ្មែរ សាលាបានរៀបចំជាប្រវត្ដិខេត្ដកំពត ប្រវត្ដិឧទ្យានជាតិព្រះមុនីវង្ស “បូកគោ” ឱ្យលោកគ្រូ អ្នកគ្រូ អានឱ្យសិស្សស្ដាប់ និងរៀបចំជាកម្រងសំនួរ-ចម្លើយខ្លីៗ សម្រាប់ចោទសួរទៅសិស្ស ក្នុងអំឡុងពេលធ្វើដំណើរទៅ កាន់រមណីយដ្ឋាន។ ឆ្លងតាមដំណើរទស្សនកិច្ចសិក្សានេះ លោកសង្ឃឹមថាសិស្សានុសិស្សទាំងអស់ នឹងយកចិត្ដ ទុកដាក់ខិតខំប្រឹងប្រែងរៀនសូត្រ និងកាន់តែមានមនសិការចេះស្រឡាញ់ ឱ្យតម្លៃ និងថែរក្សាសម្បត្ដិធម្មជាតិ បរិស្ថាននៅក្នុងព្រះរាជាណាចក្រកម្ពុជាយើង។
លោកសង្កេតឃើញថា ក្នុងដំណើរទស្សនកិច្ចលើកនេះ សិស្សានុសិស្សទាំងអស់មានភាពសប្បាយរីករាយ ឥតឧបមាជាមួយមិត្ដភ័ក្ដិ បងប្អូន មាតាបិតា អ្នកអាណាព្យាបាល និងលោកគ្រូ អ្នកគ្រូរបស់ពួកគេ ដោយឃើញ នូវទិដ្ឋភាពប្លែកៗ ទេសភាពស្រស់បំព្រង ជាពិសេសធាតុអាកាសដ៏ត្រជាក់ពោរពេញទៅដោយអ័ព្ទងងិតស្លុងប្រៀប ដូចនៅលើមេឃ។
សិស្សានុសិស្សដែលបានចូលរួមក្នុងដំណើរទស្សនកិច្ចសិក្សានេះ បានសម្ដែងនូវអារម្មណ៍រំភើបរីករាយ ដោយបានសម្រាកលម្ហែកាយបន្ទាប់ពីការសិក្សា និងមើលឃើញនូវទិដ្ឋភាពប្លែកៗនៅទីជនបទ ជាពិសេស រមណីយដ្ឋានឧទ្យានជាតិ ព្រះមុនីវង្ស “បូកគោ” នេះ ដែលជារមណីយដ្ឋានទើបតែកែច្នៃដ៏ល្អប្រណិត ដែលមាន អាកាសធាតុខ្យល់បរិសុទ្ធស័ក្តិសមនឹងពាក្យថា “ឋានសួគ៌បូកគោ”។
គួរបញ្ជាក់ផងដែរថា សិស្សានុសិស្សដែលចូលរួមក្នុងដំណើរទស្សនកិច្ចសិក្សាកាលពីសប្តាហ៍កន្លងទៅនេះ មានចំនួន423នាក់ ព្រមទាំងលោកគ្រូ អ្នកគ្រូ និងបុគ្គលិកចំនួន80នាក់ ធ្វើដំណើរតាមរយៈរថយន្ដក្រុងចំនួន 10គ្រឿង៕
© រក្សាសិទ្ធិដោយ thmeythmey.com