ជាតិ
សេដ្ឋកិច្ច
ក្រុមហ៊ុននាំទំនិញចេញ-ចូលកម្ពុជា អាចបំពេញឯកសារគយ តាម Online នៅឆ្នាំ២០១៦
×
ភ្នំពេញ៖ ក្រុមហ៊ុននាំទំនិញចេញ-ចូលកម្ពុជា អាចបំពេញឯកសាររដ្ឋបាលគយ ឬប្រតិវេទន៍គយតាមប្រព័ន្ធអេឡិចត្រូនិច (Online) នៅនាយករដ្ឋានរដ្ឋាករ ចាប់ពីថ្ងៃទី១ ខែមករា ឆ្នាំ២០១៦ ។ នេះជាសេចក្តីជូនដំណឹងរបស់អគ្គនាយកដ្ឋានគយ និងរដ្ឋាករកម្ពុជា។
យោងតាមសេចក្តីជូនដំណឹងចុះថ្ងៃទី២៤ ធ្នូនេះ ការដាក់ឲ្យដំណើរការការបំពេញឯកសាររដ្ឋបាលតែមួយ តាមប្រព័ន្ធ Online ធ្វើតាមប្រកាសលេខ ១៤៤៧ របស់ក្រសួងសេដ្ឋកិច្ច និងហិរញ្ញវត្ថុ ស្តីពី បញ្ញត្តិ និងនីតិវិធីប្រតិវេទន៍គយ អគ្គនាយកដ្ឋានគយ និងរដ្ឋាករកម្ពុជា។
ការប្រកាសជូនដំណឹងដល់សាធារណជន ក្រុមហ៊ុននាំចេញ និងនាំចូល ជើងសាគយ ឬប្រតិវេទន៍ករ អំពីដំណើរការប្រព័ន្ធស្វ័យប្រវត្តិកម្មទិន្នន័យគយ តាមប្រព័ន្ធអេឡិចត្រូនិក (Online) ប្រព្រឹតទៅនៅពេលប្រទេសសមាជិកអាស៊ានទាំង ១០ ធ្វើសមាហរណកម្មសហគមន៍សេដ្ឋកិច្ចអាស៊ាន (ASEAN Economic Community) នៅចុងឆ្នាំ ២០១៥នេះ។
គួរបញ្ជាក់ថា នៅដើមឆ្នាំ២០១៦ ខាងមុខនេះ ក្រសួងពាណិជ្ជកម្ម ក៏នឹងដំណើរការការចុះបញ្ជីបើកក្រុមហ៊ុននៅកម្ពុជា និងការស្នើបញ្ជាក់វិញ្ញាបនបត្រប្រភពដើមទំនិញនាំចេញ តាមប្រព័ន្ធ Online ផងដែរ។ រដ្ឋមន្ត្រីក្រសួងពាណិជ្ជកម្មលោក ស៊ុន ចាន់ថុល បញ្ជាក់ពីមូលហេតុដំណើរការប្រព័ន្ធ Online ដើម្បីសម្រួលដល់ការងារវិនិយោគ និងទាក់ទាញអ្នកវិនិយោគពីបរទេសមកកម្ពុជា ម្យ៉ាងទៀតគឺ កាត់បន្ថយអំពើពុករលួយ៕
© រក្សាសិទ្ធិដោយ thmeythmey.com