ជាតិ
គជបនឹងប្រកាសឈ្មោះអ្នកកាន់តំណែងអគ្គលេខាធិការ និងអគ្គលេខាធិការរង នៅដើមខែមករា
× នៅថ្ងៃទី២៦ ធ្នូនេះ គឺជាថ្ងៃចុងក្រោយដែលគណៈកម្មាធិការជាតិរៀបចំការបោះឆ្នោត (គជប) ទទួលយកពាក្យបេក្ខជន ដែលមកដាក់ពាក្យកាន់តំណែង អគ្គលេខាធិការ និងអគ្គលេខាធិការរង គជប ។ ក្រោយពីបញ្ចប់ការទទួលពាក្យរួច គជប នឹងបន្តនិតិវិធីជ្រើសរើសបេក្ខជនប្រឡងចូលកាន់តួនាទីនេះ ដោយមិនឲ្យមានការបែកធ្លាយឡើយ។ ហើយនៅដើមខែ មករា ឆ្នាំ២០១៦ គជប នឹងប្រកាសឈ្មោះបេក្ខជន ដែលប្រឡងជាប់តំណែងអគ្គលេខាធិការ និងអគ្គលេខាធិការរង គជប ។
បើទោះជាគណៈកម្មាធិការជាតិរៀបចំការបោះឆ្នោត នៅបន្តនិតិវិធីខ្លួនមួយដំណាក់កាលទៀត ដើម្បីជ្រើសរើសបេក្ខជនកាន់តំណែងអគ្គលេខាធិការ និងអគ្គលេខាធិការរងក៏ដោយ តែអ្នកនាំពាក្យ គ.ជ.ប លោក ហង្ស ពុទ្ធា បានឲ្យដឹងថា គ.ជ.ប នឹងប្រកាសឈ្មោះបេក្ខជនជាប់កាន់តំណែងអគ្គលេខាធិការ និងអគ្គលេខាធិការរង នៅដើមខែមករា ឆ្នាំ២០១៦ខាងមុខនេះ។ អ្នកនាំពាក្យរូបនេះ បានបញ្ជាក់ថា ក្រោយពីបញ្ចប់ការទទួលពាក្យបេក្ខជនប្រឡងនៅថ្ងៃនេះហើយ គជប នឹងបន្តនិតិវិធីខ្លួន ដោយបន្តយកឯកសារបេក្ខជនទាំងនោះ ទៅពិភាក្សាគ្នាជាមួយសមាជិក គជប ទាំង៩រូប ដើម្បីប្រមូលមតិរួមគ្នាជ្រើសរើសអគ្គលេខាធិការ និងអគ្គលេខាធិការរង គជប ។
ថ្លែងប្រាប់សារព័ត៌មានថ្មីៗ លោក ហង្ស ពុទ្ធា បានបញ្ជាក់យ៉ាងដូច្នេះថា៖«បន្ទាប់ពីយើងបញ្ចប់ការទទួលពាក្យរួច យើងបន្តរក្សាទុកឯកសារបេក្ខជនទាំងនោះមិនឲ្យបែកធ្លាយ ហើយយើងនឹងពិភាក្សារួមគ្នាជាមួយសមាជិក គជប ទាំង៩រូប រួចហើយយើងនឹងបិទឈ្មោះបេក្ខជនដែលត្រូវប្រកាសនៅដើមខែក្រោយ។ យ៉ាងយូរ ថ្ងៃ១៥មករា ឆ្នាំ២០១៦ខាងមុខនេះ»។
បើតាមលោក ហង្ស ពុទ្ធា រហូតមកដល់ពេលនេះ គជប បានទទួលពាក្យបេក្ខជនប្រឡងចូលកាន់តំណែង អគ្គលេខាធិការ គជប ចំនួន២១នាក់ និងអគ្គលេខាធិការរង គជប ចំនួន៨៤ ហើយ ក្នុងចំណោមអ្នកមកទទួលពាក្យចំនួន២០០នាក់។ លោកថា បេក្ខជនដាក់ពាក្យប្រឡងមានមកខាងអង្គសង្គមស៊ីវិល និងពីស្ថាប័នផ្សេងផងដែរ។
បើតាមគណៈកម្មាធិការជាតិរៀបចំការបោះឆ្នោត លក្ខខណ្ឌដែលបេក្ខជនអាចដាក់ពាក្យក្នុងតំណែងទាំងពីរនេះបាន ត្រូវមានមានសញ្ជាតិខ្មែរពីកំណើត និងមានសញ្ជាតិតែមួយគត់ ក្នុងរយៈពេលបំពេញការងារ ។ បេក្ខជនត្រូវមានអាយុយ៉ាងតិច ៣០ ឆ្នាំ គិតដល់ថ្ងៃតែងតាំង មានសិទ្ធិបោះឆ្នោត មានសញ្ញាបត្រចាប់ពីឧត្តមសិក្សាឡើងទៅ មានបទពិសោធន៍ការងារយ៉ាងតិច ៥ ឆ្នាំ។ ជាងនេះបេក្ខជន មិនត្រូវជាសហព័ទ្ធ ឬញាតិលោហិត ឬញាតិពន្ធរហូតដល់ថ្នាក់ទី ១ របស់ប្រធាន អនុប្រធានគណបក្សនយោបាយ ដែលចូលរួមប្រកួតប្រជែងក្នុងការបោះឆ្នោតឡើយ៕
Tag:
គ.ជ.ប
ហង្ស ពុទ្ធា
© រក្សាសិទ្ធិដោយ thmeythmey.com