ជាតិ
កញ្ញា ជា សេងហូយ និស្សិតជនបទ មានមហិច្ឆតា ចង់ក្លាយជាអគ្គរាជទូត
× ភ្នំពេញ៖ ខុសពីយុវតីមួយចំនួន ដែលតែងតែឆ្លងដែន ទៅធ្វើការនៅប្រទេសថៃ កញ្ញា ជា សេងហូយ បានជំនះពីជនបទចុងកាត់មាត់ញក ឡើងមករៀននៅភ្នំពេញ ដើម្បីសម្រេចបំណងរបស់ខ្លួន ដែលចង់ក្លាយជាឯកអគ្គរាជទូតរបស់កម្ពុជា។ ជាអ្នកខេត្តបន្ទាយមានជ័យ ដែលក្នុងចំណោមអ្នកភូមិ មាននិស្សិតតែ២ឬ៣នាក់ប៉ុណ្ណោះ ដែលបានមកសិក្សានៅភ្នំពេញ ប៉ុន្តែ កញ្ញាមាឌតូចច្រឡឹងវ័យ១៩ឆ្នាំរូបនេះ កំពុងរៀនចំនួនពីរសាកលវិទ្យាល័យ និងភាសាបរទេសទៀតផង។
កើតនៅក្នុងគ្រួសារធូរធារមួយដែលម្តាយ គឺជាគ្រូបង្រៀន និងឪពុកជាគ្រូពេទ្យ ស្ថិតនៅក្នុង ភូមិប៉ុស្តិ៍ចាស់ ឃុំព្រះនេត្រព្រះ ស្រុកព្រះនេត្រព្រះ ខេត្តបន្ទាយមានជ័យ កញ្ញា ជា សេងហូយ មានបំណងមករៀនបន្តនៅភ្នំពេញ បន្ទាប់ពីជាប់បាក់ឌុប។ មិនមានច្រើនទេ អ្នកដែលបានមករៀននៅភ្នំពេញ ពីព្រោះទីនោះ ជាតំបន់ដាច់ស្រយាល ប៉ុន្តែ កញ្ញា ជា សេងហូយ បានជម្នះពីមជ្ឍដា្ឋនដែលពុំសូវទទួលបានការអប់រំ ដើម្បីកសាងអនាគត លើទឹកដីរាជធានីភ្នំពេញ ដែលជាបេះដូងនៃប្រទេសកម្ពុជា។ រស់នៅបន្ទប់ជួលតូចមួយ ជាមួយបងប្អូនបង្កើតចំនូន៣នាក់ សេងហូយ បានរៀនចំនួនពីរសាកលវិទ្យាល័យ គឺរៀនជំនាញសេដ្ឋកិច្ច នៅសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច និងជំនាញទំនាក់ទំនងអន្តរជាតិ នៅសាកលវិទ្យាល័យបញ្ញាសាស្ត្រកម្ពុជា ។
ជានិស្សិតឆ្នាំទី៣ ផ្នែកសេដ្ឋកិច្ច យុវតីសម្បុរសរូបនេះ បាននិយាយថា នាងចង់ក្លាយជាអ្នកជំនួញដ៏មានឥទ្ធិពលម្នាក់នៅកម្ពុជា។ ជាកូនទីពីរ ក្នុងចំណោមបងប្អូន៣នាក់ សេងហូយ បញ្ជាក់យ៉ាងដូច្នេះថា៖ «ខ្ញុំគិតថាសេដ្ឋកិច្ច មានសារសំខាន់ណាស់ ព្រោះវាមានទំនាក់ទំនងជាមួយជីវភាពរស់នៅ»។
មិនត្រឹមតែចង់ក្លាយជាអ្នកជំនួញតែមួយមុខនោះទេ ប៉ុន្តែ សេងហូយ នៅឆ្លៀតរៀនមុខវិជ្ជាមួយទៀត គឺមុខវិជ្ជាទំនាក់ទំនាក់អន្តរជាតិ។ មុខវិជ្ជានេះហើយ បានជំរុញទឹកចិត្តនាង ចង់ក្លាយជាអគ្គរាជទូតរបស់កម្ពុជានៅថ្ងៃអនាគត។ មាឌតូចច្រឡឹង កញ្ញា សេងហូយ បញ្ជាក់បន្ថែមទៀតថា៖ «ខ្ញុំចង់ក្លាយជាអ្នកការទូត ហើយបើមានឱកាស ខ្ញុំនឹងធ្វើ ជាឯកអគ្គរាជទូតរបស់កម្ពុជា»។
ចំពោះការឡើងមករៀននៅភ្នំពេញ សេងហូយបានរៀបរាប់ពីមូលហេតុថា នាងមិនចង់ផ្តេកផ្តួល ទៅតាមមជ្ឍដ្ឋានដែលនាងធ្លាប់រស់នៅតាមខេត្តឡើយ ព្រោះអ្នកភូមិរបស់នាង មិនសូវបានឡើងមករៀននៅភ្នំពេញនោះទេ។ និយាយបណ្តើរងើយទៅលើហាក់កំពុងរកនឹកដើម្បីឆ្លើយសំណួរ កញ្ញាវ័យក្មេងរូបនេះ បានបញ្ជាក់បន្តថា៖ «អ្នកភូមិខ្ញុំ គេមានផ្នត់គំនិតមួយ គឺ គ្រាន់តែធំបន្តិច គេឲ្យកូនគេរកលុយ ដោយគេរុញកូនគេឲ្យទៅថៃ ដើម្បីរកលុយ ប៉ុន្តែសម្រាប់ខ្ញុំៗយល់ថា ការរៀនសូត្រ ទើបធ្វើឲ្យមានអនាគតល្អ»។
ទោះបីជា នាងរស់នៅភ្នំពេញ ដោយបារម្ភពីសុវត្ថិភាព និងសន្តិសុខផ្ទាល់ខ្លះៗក៏ដោយ ប៉ុន្តែ នាងនិយាយថា នាងហាក់មានសំណាងជាងយុវជនដទៃ ព្រោះ ឪពុកម្តាយ របស់នាង បានលើកទឹកចិត្ត និងទំនុកបម្រុងការសិក្សាគ្រប់បែបយ៉ាង។ អង្គុយនិយាយ លាយជាមួយកាយវិការផងនោះ កញ្ញាសេងហូយ បានរៀបរាប់ថា៖ «កម្លាំងចិត្តពីគ្រួសារ ការទំនុកបម្រុងពីគាត់ និងការខិតខំរៀនរបស់ខ្ញុំ គឺជាកត្តាជំរុញ ឲ្យខ្ញុំអាចមកដល់ភ្នំពេញនៅថ្ងៃនេះ»។
ជាសិស្សផ្លោះថ្នាក់តាំងពីបឋមសិក្សា កញ្ញា សេងហូយ មានការសោកស្តាយ ដែលយុវជន នៅក្នុងភូមិរបស់នាងមិនសូវបានរៀនសូត្រ។ នាងយល់ថា អនាគតរបស់ពួកគេ គឺប្រហែល មិនល្អប៉ុន្មានទេ។ ពាក់អាវពណ៌ស សំពត់ពណ៌ខៀវ និស្សិតជនបទរូបនេះ បានផ្តាំផ្ញើ ទៅយុវជនទាំងអស់ដែលនៅជនបទ គឺគួរតែជំនះឧបសគ្គ ដើម្បីស្វែងរកចំណេះដឹងដាក់ខ្លួន។ និយាយញាប់ៗ នាងបានសង្កត់ធ្ងន់ថា៖ «ខ្ញុំសូមផ្តាំផ្ញើ ដល់យុវជន ដែលនៅជនបទឆ្ងាយៗ គួរតែពង្រឹងខ្លួនឯង ខិតខំរៀនសូត្រឲ្យបានខ្ពស់ ពីព្រោះ ការធ្វើការងារដោយប្រើកម្លាំង វាមិនងាយស្រួលនោះទេ»៕
© រក្សាសិទ្ធិដោយ thmeythmey.com