ជាតិ
កម្ពុជានឹងជួបភាពរាំងស្ងួតនៅឆ្នាំ២០១៦
×
ភ្នំពេញ៖ ចាប់ពីខែកុម្ភៈដល់ខែមិថុនាឆ្នាំ២០១៦ខាងមុខនេះ កម្ពុជានឹងទទួលរងបាតុភូតក្តៅ El Nino ដែលបង្កឲ្យរដូវវស្សាមកដល់យឺត មានភ្លៀងធ្លាក់តិច តែមានបាតុភូតផ្គររន្ទះ ខ្យល់កន្ត្រាក់កើតឡើងច្រើន និង អាកាសធាតុក្តៅហួតហែង។ បាតុភូតក្តៅ El Nino ក៏នឹងធ្វើឲ្យកម្ពុជាប្រឈមនឹងកង្វះខាតទឹកសម្រាប់ប្រើប្រាស់ប្រចាំថ្ងៃនៅតាមតំបន់មួយចំនួនទៀតផង។
សារាចរណែនាំស្តីពីការចាត់វិធានកាថែរក្សាទឹកទុករបស់រដ្ឋាភិបាល ចុះថ្ងៃទី២៣ខែធ្នូ បានណែនាំឲ្យប្រជាកសិករ គួរធ្វើស្រូវប្រាំងតែ១ដងប៉ុណ្ណោះក្នុងឆ្នាំ២០១៦ ដោយមិនគួរធ្វើស្រូវប្រាំងលើកទី២ ទេ។ ហើយទឹកតាមបណ្តាអាងដែលបានរក្សាទុក និងទឹកធម្មជាតិនៅកន្លែងមួយចំនួន គួរគប្បីរក្សាទឹកទាំងនោះទុកសម្រាប់ប្រើប្រាស់ប្រចាំថ្ងៃ និងការដាំដំណាំរួមផ្សំផ្សេងទៀតក្រៅពីស្រូវ។
រដ្ឋាភិបាលក៏បានបញ្ជាឲ្យក្រសួង ស្ថាប័នពាក់ព័ន្ធ អាជ្ញាធរដែនដីគ្រប់លំដាប់ថ្នាក់ ត្រូវចូលរួមចាត់វិធានការថែរក្សាទឹកទុកឲ្យបានល្អ ដើម្បីផ្គត់ផ្គង់ការប្រើប្រាស់ប្រចាំថ្ងៃរបស់ពលរដ្ឋ រហូតដល់ពេលមានភ្លៀងធ្លាក់។
សារាចរណែនាំបានបន្តថា បាតុភូតក្តៅ El Nino នឹងជះឥទ្ធិពលមកលើប្រទេសកម្ពុជា លុះដល់ពាក់កណ្តាលខែកក្កដាឆ្នាំ២០១៦ ទើបមានបាតុភូតត្រជាក់ថ្មី La Nina មានឥទ្ធិពលមកលើប្រទេសកម្ពជាវិញ ហើយភ្លៀងក៏នឹងចាប់ផ្តើមធ្លាក់ជាធម្មតានាពេលនោះវិញផងដែរ ៕
© រក្សាសិទ្ធិដោយ thmeythmey.com