បុណ្យឆ្លងឆ្នាំ អាជ្ញាធរខេត្តព្រះសីហនុ អំពាវនាវឲ្យម្ចាស់អាជីវកម្ម កុំដំឡើងថ្លៃ

ជាតិ

បុណ្យឆ្លងឆ្នាំ អាជ្ញាធរខេត្តព្រះសីហនុ អំពាវនាវឲ្យម្ចាស់អាជីវកម្ម កុំដំឡើងថ្លៃ

28, Dec 2015 , 1:26 pm

រូបភាព

ដោយ:

ភ្នំពេញ៖ បុណ្យឆ្លងឆ្នាំសាកលឆ្នាំ២០១៥ ឈានចូលឆ្នាំ២០១៦ សាលាខេត្តព្រះសីហនុ បានអំពាវនាវ ដល់ម្ចាស់សណ្ឋាគារ ផ្ទះសំណាក់ ភោជនីយដ្ឋាន និងម្ចាស់អាជីវកម្មផ្សេងទៀត ត្រូវរក្សាតម្លៃឲ្យបានសមរម្យ និងបម្រើសេវាកម្មភ្ញៀវទេសចរឲ្យបានល្អ ។ ការអំពាវនាវនេះ បន្ទាប់ពីសាលាខេត្តព្រះសីហនុ បានចេញសេចក្តីជូនដំណឹង ស្តីពីការរៀបចំពិធីអបអរសាទរបុណ្យឆ្លងឆ្នាំសាកល ដែលប្រព្រឹត្តទៅចំនួន៣ថ្ងៃ គឺចាប់ពីថ្ងៃទី២៩ ដល់ថ្ងៃទី៣១ ខែធ្នូ ឆ្នាំ២០១៥នេះ។

ដើម្បីបង្ហាញពីសក្តានុភាពរបស់ខេត្តព្រះសីហនុ សាលាខេត្តព្រះសីហនុ បានរៀបចំព្រឹត្តិការណ៍បុណ្យឆ្លងឆ្នាំសាកលឆ្នាំ២០១៥ ឈានចូលឆ្នាំ២០១៦ នៅបរិវេណរមណីយដ្ឋានឆ្នេរអូរឈើទាល ចំនួន៣ថ្ងៃ គឺចាប់ថ្ងៃទី២៩ ដល់ថ្ងៃទី៣១ ខែធ្នូនេះ។ ក្នុងនោះដែរ អាជ្ញាធរខេត្ត បានអំពាវនាវ ដល់ម្ចាស់សណ្ឋាគារ ផ្ទះសំណាក់ ភោជនីយដ្ឋាន និងម្ចាស់អាជីវកម្មផ្សេងទៀត ត្រូវរក្សាតម្លៃឲ្យបានសមរម្យ និងខិតខំបម្រើសេវាដល់ភ្ញៀវទេសចរឲ្យបានល្អ។ លើសពីនេះ សាលាខេត្ត បានអំពាវនាវ ដល់ប្រជាពលរដ្ឋ ភ្ញៀវទេសចរជាតិ និងអន្តរជាតិ ចូលរួមសំអាតបរិស្ថាន ដោយទុកដាក់សំរាមឲ្យបានត្រឹមត្រូវ ផ្តល់ព័ត៌មានជាបន្ទាន់ដល់នគរបាលដែលនៅជិតបំផុត នៅពេលមានករណីចោរលួច ប្លន់ ឬបទល្មើសផ្សេងទៀត និង ម្ចាស់អាជីវកម្មដឹកភ្ញៀវទៅលេងកោះ ត្រូវការដាក់អាវពោងទៅជាមួយ ដើម្បីការពារសុវត្ថិភាពដល់ភ្ញៀវទេសចរ។

សូមបញ្ជាក់ថា ក្នុងរយៈពេលបីថ្ងៃ នៃពិធីបុណ្យឆ្លងឆ្នាំសាកលនេះ អាជ្ញាធរខេត្តព្រះសីហនុ នឹងមានការរៀបចំពិព័រណ៍ពាណិជ្ជកម្ម ការប្រគំតន្ត្រី ការបង្ហោះគោម និងការដុតកាំជ្រួចជាដើម៕