ជាតិ
នគរបាលឃាត់មិនឈប់ អ្នកបើកបរអាចជាប់ពន្ធនាគារ និងពិន័យពី១០ទៅ៨០ម៉ឺនរៀល
×
ភ្នំពេញ៖ អ្នកបើកបរដែលដឹងខ្លួនឯងថា មានកំហុសក្នុងការបើកបរយានយន្ត ដូចជាការបើកបរខុសច្បាប់ចរាចរណ៍ ឫពុំមានឯកសារផ្លូវច្បាប់គ្រប់គ្រាន់ គឺពួកគេតែងតែបើកបរគេចពីនគរបាលចរាចរ។ អ្នកខ្លះរឹតតែបង្កើនល្បឿនយានជំនិះខ្លួនរហូតដល់គ្រោះថ្នាក់ទៀតផង ដើម្បីគេចពីការឃាត់ផាកពិន័យរបស់នគរបាលចរាចរ ។ពលរដ្ឋមួយចំនួនទៀត តែងតែប្រើឥរិយាបថមិនសមរម្យ ប្រើពាក្យអសុរោះ ជេរប្រមាថទៀតផង នៅពេលដែលមន្ត្រីនគរបាលចរាចរឃាត់ផាកពិន័យពីកំហុសពួកគេម្ដងៗ។ ប៉ុន្តែទម្លាប់អាក្រក់របស់ពួកគេទាំងនេះ នឹងអាចឲ្យពួកគេប្រឈមជាប់ពន្ធនាគារចំនួន៦ថ្ងៃ រហូតដល់១ខែ និងពិន័យជាប្រាក់១០ម៉ឺនរៀល រហូតដល់៨០ម៉ឺនរៀល ប្រសិនបើមិនព្រមឈប់នៅពេលនគរបាលចរាចរឃាត់ ។
ច្បាប់ចរាចរណ៍ផ្លូវគោកឆ្នាំ២០១៥ ដែលត្រួវអនុវត្តន៍នៅដើមឆ្នាំ២០១៦នេះ ដែលមាន១២ជំពូក និង៩២មាត្រា នឹងធ្វើការពិន័យធ្ងន់ធ្ងរ ព្រមទាំងចាប់ដាក់ពន្ធនាគារ ប្រសិនបើអ្នកបើកបរនៅតែមិនឈប់ ពេលនគរបាលចរាចរបញ្ជាឲ្យឈប់។
ច្បាប់ចរាចរណ៍ផ្លូវគោកថ្មី ជំពូកទី១០ មាត្រា៧៦បានចែងថា៖ជនណាបើកបរយានយន្តមិនព្រមបញ្ឈប់យានយន្តតាមការបញ្ជារបស់មន្ត្រីនគរបាលចរាចរផ្លូវគោក ដើម្បីធ្វើតេស្តពិនិត្យជាតិអាកុល ឬសារធាតុញៀន ត្រូវផ្តន្ទាទោសដាក់ពន្ធនាគារ ពី៦(ប្រាំមួយ)ថ្ងៃ ទៅ១(មួយ)ខែ និងពិន័យជាប្រាក់ពី១០០ ០០០(មួយសែន)រៀល ទៅ៨០០ ០០០(ប្រាំបីសែន)រៀល។
ត្រូវផ្តន្ទាទោសដូចកថាខណ្ឌទី១ខាងលើ ចំពោះអ្នកបើកបរណា ដែលមិនព្រមឲ្យត្រួតពិនិត្យផ្ទៀងផ្ទាត់យាន្ត ឬ ធ្វើតេស្តពិនិត្យជាតិអាកុល ឬ សារធាតុញៀន៕
© រក្សាសិទ្ធិដោយ thmeythmey.com