ជាតិ
ដក៣ពិន្ទុ ប្រសិនបើសរសេរខ្វះ ឬខុស១ពាក្យសម្រាប់វិញ្ញាសា«សរសេរតាមអាន»
× ក្នុងឆ្នាំសិក្សាថ្មី២០១៥-១០១៦នេះ ក្រសួងអប់រំយុវជន និងកីឡា បានសម្រេចបញ្ចូលឡើងវិញសម្រាប់ការ«សរសេរតាមអាន»នៅថ្នាក់មធ្យមសិក្សាបឋមភូមិ(ទី៧ ទី៨ និងទី៩)។ ការសរសេរតាមអាន ក៏នឹងក្លាយទៅជាវិញ្ញាសាប្រលងថ្នាក់ជាតិសម្រាប់សិស្សថ្នាក់ទី៩ផងដែរ។
ក្រសួងអប់រំបានបញ្ជាក់ថា ការសរសេរតាមអាន ជាបំណិនដ៏សំខាន់ក្នុងការសិក្សាភាសាខ្មែរ និងអក្សរសាស្ត្រខ្មែរ ដែលញ៉ាំងឲ្យអ្នកសិក្សាមានការប្រុងប្រយ័ត្ន ចងចាំ សរសេរបានត្រឹមត្រូវតាមអក្ខរាវិរុទ្ធ ក្បួនខ្នាតវេយ្យាករណ៍ និងចេះពីរបៀបសរសេរអត្ថបទបានច្បាស់លាស់។
ដើម្បីឲ្យការរៀន និងបង្រៀនការសរសេរតាមអាននៅថ្នាក់មធ្យមសិក្សាពីទី៧ដល់ទី៩ ប្រកបដោយគុណភាព និងប្រសិទ្ធភាពខ្ពស់ ក្រសួងបានចេញសេចក្តីណែនាំមួយចំនួន ទាក់ទងនឹងការប្រើប្រាស់ម៉ោងរៀន ការរៀបចំអត្ថបទសម្រាប់សរសេរតាមអាន ការកំណត់ពិន្ទុ និងរបាយពិន្ទុ និងការកែកំហុសអក្ខរាវិរុទ្ធជាដើម។
សម្រាប់ការកែកំហុសអក្ខរាវិរុទ្ធ ក្រសួងបានបញ្ជាក់យ៉ាងច្បាស់ថា បើសិនសិស្សសរសេរខុស ឬខ្វះមួយព្យាង្គ ឬមួយពាក្យ ត្រូវដក៣ពិន្ទុ។ សរសេរខ្វះ ឬលើសស្រះ ព្យញ្ជនៈប្រកបណាមួយ ត្រូវដក២ពិន្ទុ និងខ្វះបន្តក់ ឬជើងព្យញ្ជនៈ អក្សរមិនអាន វណ្ណយុត្តិបន្តិចបន្តួច ឬខុសទីតាំងស្រះ និងព្យញ្ជនៈ ត្រូវដកមួយពិន្ទុ។
លោក រស់ សាលីន អ្នកនាំពាក្យក្រសួងអប់រំ យុវជន និងកីឡា បានបញ្ជាក់ថា ការដកពិន្ទុដល់ទៅ៣ពិន្ទុចំពោះការសរសេរខុសមួយពាក្យឬមួយព្យាង្គនេះ នឹងធ្វើឲ្យសិស្សមានការប្រុងប្រ យ័ត្នខ្ពស់ក្នុងការសរសេរ ប្រឹងប្រែងអានសៀវភៅ ហើយក៏អាចជំរុញឲ្យសិស្សងាកទៅចាប់អារម្មណ៍ការអានសៀវភៅផងដែរ។ លោកបានសង្កត់ធ្ងន់ថា ការដកពិន្ទុនេះ ត្រូវធ្វើតែក្នុងក្របខណ្ឌនៅក្នុងថ្នាក់តែប៉ុណ្ណោះ ដោយឡែកនីតិវិធីនៃការដកពិន្ទុនៅពេលប្រលងថ្នាក់ជាតិសម្រាប់សិស្សថ្នាក់ទី៩ នៅមិនទាន់កំណត់នៅឡើយ។
សម្រាប់វិញ្ញាសា«សរសេរតាមអាន»នៅថ្នាក់ជាតិរបស់សិស្សថ្នាក់ទី៩ ក៏ត្រូវចែកដាច់ពីវិញ្ញាសាភាសាខ្មែរដែរ ប៉ុន្តែនីតិវិធី និងការបែងចែកប្រភេទនៃការប្រលងនៅ ក្រសួងអប់រំ នឹងប្រជុំ ពិភាក្សានៅពេលបន្តទៀត។ នេះជាការបញ្ជាក់របស់អ្នកនាំពាក្យក្រសួងអប់រំ យុវជន និងកីឡាដដែល៕
Tag:
ក្រសួងអប់រំ
រស់ សាលីន
© រក្សាសិទ្ធិដោយ thmeythmey.com