អ្នកនាំពាក្យ៖ រដ្ឋាភិបាលគ្មានចំណាត់ការលើលោក ខឹម វាសនា ឡើយ

ជាតិ

នយោបាយជាតិ

អ្នកនាំពាក្យ៖ រដ្ឋាភិបាលគ្មានចំណាត់ការលើលោក ខឹម វាសនា ឡើយ

31, Dec 2015 , 3:21 pm

រូបភាព

ដោយ: ម៉ៅ សុផា

អ្នកនាំពាក្យទីស្តីការគណៈរដ្ឋមន្ត្រី លោក ផៃ ស៊ីផាន បានអះអាងថា រដ្ឋាភិបាលមិនមានវិធានការណាមួយ លើ លោក ខឹម វាសនា ប្រមុខគណបក្សសម្ព័ន្ធដើម្បីប្រជាធិបតេយ្យនោះទេ។ តែលោក ថាបញ្ហារបស់ប្រមុខបក្សរូបនេះ គឺស្ថិតនៅក្រោមអំណាចតុលាការ មិនមែនរដ្ឋាភិបាលឡើយ។

លោក ផៃ ស៊ីផាន អ្នកនាំពាក្យទីស្តីការគណៈរដ្ឋមន្ត្រី បានលើកឡើងថា រហូតមកដល់ពេល នេះ រដ្ឋាភិបាល មិនទាន់មានចំណាត់ការណាមួយលើករណីរបស់លោក ខឹម វាសនា ឡើយ ក្រោយពីមន្ត្រីសង្ឃស្នើឲ្យរដ្ឋាភិបាលទប់ស្កាត់ការវាយប្រហារព្រះពុទ្ធសាសនា ពីសំណាក់ ប្រធានបក្សរូបនេះ។

លោកបានបន្ថែមទៀតថា ការដាក់ញត្តិមករដ្ឋាភិបាលនេះ គឺជាការមិនពេញចិត្តរបស់ ព្រះសង្ឃ ចំពោះលោក ខឹម វាសនា ដែលបានប្រើវោហារសព្ទ វាយប្រហារព្រះពុទ្ធសាសនា ដូច្នេះ តាមនីវិធី រឿងនេះ គួរតែត្រូវបានដោះស្រាយដោយតុលាការ។

អ្នកនាំពាក្យរូបនេះបានបញ្ជាក់បែបនេះថា៖«រឿងនេះត្រូវប្រឈមចំពោះមុខច្បាប់ ហើយស្ថាប័នដែលមានអំណាចសម្រេចរឿងនេះ គឺតុលាការ។ រដ្ឋាភិបាលមិនអាចលូកដៃចូលក្នុងអំណាចតុលាការបានទេ។ តាមយោបល់ខ្ញុំ ខ្ញុំយល់ថា រដ្ឋាភិបាលប្រហែលជាមិនមានវិធានការ ឬចេញសារាចរណ៍ណែនាំនោះទេ ព្រោះនេះជារឿងសាសនា និងបុគ្គលតែម្នាក់ដែលធ្វើឲ្យប៉ះពាល់ដល់ព្រះពុទ្ធសាសនា។ ដូច្នេះរឿងនេះគួរតែតុលាការជាអ្នកដោះស្រាយ»។

កាលពីថ្ងៃទី៣០ ខែធ្នូ ម្សិលមិញ មន្ត្រីសង្ឃទូទាំងប្រទេស បានសម្រេចដាក់ញត្តិទៅកាន់ទីស្តីការគណៈរដ្ឋមន្ត្រី ដើម្បីស្នើឲ្យរដ្ឋាភិបាល ធ្វើអន្តរាគមន៍ ទប់ស្កាត់សកម្មភាពនយោបាយរបស់លោក ខឹម វាសនា ដែលត្រូវបានព្រះសង្ឃអះអាងថា រូបលោក មានចេតនាចង់បំផ្លាញព្រះពុទ្ធសាសនា។ ការដាក់ញត្តិនេះ ធ្វើឡើងក្រោយពីបញ្ចប់អនុសំវច្ឆរមហាសន្និបាតលើកទី២៤ ដែលត្រូវបានរៀបចំឡើង តាំងពីថ្ងៃទី២៩ ដល់ថ្ងៃទី៣០ ខែធ្នូ ឆ្នាំ២០១៥ ៕