កម្ពុជារៀបចំពិព័រណ៍ផ្សារហ៊ុនលើកដំបូងនៅចុងខែមករា

ជាតិ

សេដ្ឋកិច្ច

កម្ពុជារៀបចំពិព័រណ៍ផ្សារហ៊ុនលើកដំបូងនៅចុងខែមករា

07, Jan 2016 , 8:59 am

រូបភាព

ដោយ: ខន ចំប៉ា

ក្រុមហ៊ុនផ្សារមូលបត្រកម្ពុជា(CSX) នឹងរៀបចំពិព័រណ៍ផ្សារហ៊ុនកម្ពុជា«My First STOCK» ជាលើកដំបូង នៅថ្ងៃទី៣១ខែមករា ឆ្នាំ២០១៦ខាងមុខ។ ពិព័រណ៍នេះ ត្រូវចាប់ផ្តើមនៅម៉ោង១០ព្រឹក រហូតដល់ម៉ោង១០យប់ នៅផ្សារទំនើបអ៊ីអន។

អ្នកស្រី ស៊ូ ចន្ទមុន្នី ប្រធាននាយកដ្ឋានរក្សាទុកមូលបត្រ ដែលទទួលខុសត្រូវការរៀបចំពិព័រណ៍នេះ បានបញ្ជាក់ប្រាប់សារព័ត៌មានថ្មីៗថា ពិព័រណ៍ផ្សារភាគហ៊ុននេះ រៀបចំឡើងដើម្បី លើកកម្ពស់ការយល់ដឹងបន្ថែមទៀត ពីវិស័យមូលបត្រទៅដល់សាធារណជន ផ្តល់ឱកាសឲ្យពួកគាត់ស្គាល់ពីតួអង្គនៅក្នុងទីផ្សារមូលបត្រ យល់ដឹងពីការបើកគណនីជួញដូរ និងការវិនិយោគ យល់ពីវិធីនៃការជួញដូរភាគហ៊ុន និងបច្ចុប្បន្នភាពនៃផ្សារហ៊ុនកម្ពុជា។

ពិព័រណ៍នៅចុងខែមករានេះ ក៏ជាឱកាសសម្រាប់ឲ្យសាធារណជនជួបដោយផ្ទាល់ជាមួយក្រុមហ៊ុនមូលបត្រ និងក្រុមហ៊ុនចុះបញ្ជីលក់ភាគហ៊ុនលើផ្សារមូលបត្រកម្ពុជាផងដែរ ដើម្បីទទួលបានព័ត៌មានថ្មីៗអំពីភាគហ៊ុនចុះបញ្ជី និងសេវាពាក់ព័ន្ធផ្សេងៗ។ នេះជាបញ្ជាក់បន្ថែមរបស់អ្នកស្រី ស៊ូ ចន្ទមុន្នី។

ពិព័រណ៍ផ្សារហ៊ុនកម្ពុជា នឹងមានការចូលរួមពីក្រុមហ៊ុនមូលបត្រ និងក្រុមហ៊ុនចុះបញ្ជីលក់ភាគហ៊ុន ចំនួន១០ គណៈកម្មការមូលបត្រកម្ពុជា និងផ្សារមូលបត្រកម្ពុជា។

សូមបញ្ជាក់ថា ទីផ្សារមូលបត្ររបស់កម្ពុជា បានចាប់ផ្តើមដំណើរការនៅថ្ងៃទី ១៨ ខែមេសា ឆ្នាំ ២០១២ ។ បច្ចុប្បន្នមានក្រុមហ៊ុនចំនួន៣ ដែលបានបោះផ្សាយ និងលក់មូលបត្រជាសាធារណៈ។ ក្រុមហ៊ុនទាំង៣នោះ ក្រុមហ៊ុនរដ្ឋាករទឹកស្វយ័តក្រុងភ្នំពេញ(PPWSA) ដែលដំណើរការនៅឆ្នាំ២០១២ ក្រុមហ៊ុន Grand Twins International ដែលទទួលបានសិទ្ធិបោះផ្សាយលក់មូលបត្រនៅឆ្នាំ២០១៤ និងក្រុមហ៊ុនកំពង់ផែស្វយ័តភ្នំពេញ ដែលទើបតែទទួលបានសិទ្ធិបោះផ្សាយ និងចុះបញ្ជីលក់មូលបត្រនៅលើផ្សារមូលបត្រកម្ពុជា នៅថ្ងៃទី៩ ខែធ្នូ ឆ្នាំ២០១៥កន្លងទៅ។

លោក សុខ ដារ៉ា អគ្គនាយករងនៃគណកម្មការមូលបត្រកម្ពុជា ធ្លាប់បានអះអាងថា នៅមានក្រុមហ៊ុនចំនួន២ទៀត គឺក្រុមហ៊ុន TY Fashion ដែលជាក្រុមហ៊ុនផ្នែកសំលៀកបំពាក់ និងក្រុមហ៊ុនតំបន់សេដ្ឋកិច្ចពិសេសក្រុងភ្នំពេញ(PPSEZ) នឹងឡើងផ្សារហ៊ុននាពេលខាងមុខផងដែរ៕