ស្ត្រីដើមកំណើតខ្មែរឈរជាបេក្ខជនតំណាងរាស្ត្រនៅតៃវ៉ាន់

អន្តរជាតិ

ស្ត្រីដើមកំណើតខ្មែរឈរជាបេក្ខជនតំណាងរាស្ត្រនៅតៃវ៉ាន់

08, Jan 2016 , 2:43 pm

រូបភាព

ដោយ: តន ចាន់រិទ្ធារ៉ា

ស្ត្រីជាជនជាតិកម្ពុជាដែលបានរៀបការជាមួយបុរសតៃវ៉ាន់ បានឈរឈ្មោះជាបេក្ខជនតំណាងរាស្ត្រក្នុងការបោះឆ្នោតនៅសប្ដាហ៍ក្រោយ ។ នេះជារឿងជាប្រវត្តិសាស្ត្រមួយ ដែលមានស្ត្រីកម្ពុជាឈរឈ្មោះក្នុងការបោះឆ្នោតនៅតៃវ៉ាន់ ។ នេះបើយោងតាមការផ្សាយរបស់ AFP។

លោកស្រី Lin Li-chan បានរៀបការជាមួយបុរសតៃវ៉ាន់តាមរយៈផ្គូរផ្គងមេអណ្ដើក ដោយសារតែគ្រួសារមានជីវភាពក្រីក្រ តាំងពីពេលនាងមានអាយុ ២០ឆ្នាំមកម្ល៉េះ។ ហើយពេលនេះ លោកស្រី Lin បានឈរឈ្មោះជាបេក្ខជនតំណាងរាស្ត្រក្នុងការបោះឆ្នោតសភានៅថ្ងៃទី១៦ ខែកុម្ភៈ ដែលធ្វើស្របនឹងការបោះឆ្នោតប្រធានាធិបតីដែរ ។

ក្រោយពេលរៀបការ លោកស្រី Lin Li-chan បានចាកចេញពីប្រទេសកម្ពុជា ធ្វើដំណើរទៅកាន់កោះតៃវ៉ាន់ជាមួយប្ដីរបស់ខ្លួន ។ ទៅដល់ទឹកដីតៃវ៉ាន់ លោកស្រី Lin Li-chan មានការពិបាកខ្លាំង ជាពិសេសលើផ្នែកភាសា ។ លោកស្រីថែមទាំងទទួលការរើសអើងផងដែរ។ នោះក៏ព្រោះតែ ស្ត្រីបរទេសដែលរៀបការជាមួយបុរសតៃវ៉ាន់ ត្រូវបានគេចាត់ទុកថាជាផលិតផលមួយ និងទទួលរងការមើលងាយជានិច្ច ។ តែឥឡូវនេះ លោកស្រី ក្លាយជាប្រជាជនតៃវ៉ាន់ហើយ។

ងាកត្រលប់មករឿងឈរឈ្មោះតំណាងរាស្ត្រវិញ ស្ត្រីកម្ពុជាវ័យ៣៨ ឆ្នាំរូបនេះ នឹងឈរឈ្មោះប្រជែងជាតំណាងរាស្ត្រសម្រាប់គណបក្សគួរមីងតាំង (KMT) ក្នុងការបោះឆ្នោតនេះ ។ ហើយលោកស្រីមានឈ្មោះលំដាប់ទី៤ក្នុងបញ្ជីបេក្ខជនទាំងអស់របស់បក្សកាន់អំណាច។ មានន័យថា លោកស្រីមានសង្ឃឹមខ្ពស់ក្នុងការក្លាយជាតំណាងរាស្ត្រប្រចាំសភាតៃវ៉ាន់ ។

បើតាមសារព័ត៌មានដដែល លោកស្រី Lin Li-chan ក៏បានបញ្ចប់ការសិក្សាកម្រិតបរិញ្ញាបត្រជាន់ខ្ពស់ និងទទួលបានពានរង្វាន់ជាជនអន្តោប្រវេសន៍ឆ្នើមផងដែរ។

ទាក់ទងនឹងរឿងនេះដែរ លោកស្រី Lin Li-chan ដែលចាត់ទុកខ្លួនឯងជាជនជាតិតៃវ៉ាន់ទៅហើយនោះ និយាយថា លោកស្រីសង្ឃឹមថា លោកស្រី នឹងអាចជួយដល់ជនអន្តោប្រវេសន៍ផ្សេងទៀត ក្នុងនាមជាតំណាងរាស្ត្រ ។ ប្រសិនបើលោកស្រីពិតជាជាប់ឆ្នោតមែននោះ លោកស្រីនឹងក្លាយជាស្ត្រីខ្មែរទី១ហើយ ដែលជាប់ជាតំណាងរាស្ត្រនៅតៃវ៉ាន់ ។

សូមបញ្ជាក់ថា តៃវ៉ាន់នឹងរៀបចំការបោះឆ្នោតសភានិងការបោះឆ្នោតប្រធានាធិបតីនៅថ្ងៃទី១៦ ខែមករា ខាងមុខនេះ ៕