អន្តរជាតិ
ចំនួននាវាចម្បាំងចិនកើនឡើង ខណៈនាវាចម្បាំងអាមេរិកបន្តថយចុះ
× ទីបញ្ជាការទ័ពជើងទឹកប៉ាស៊ីហ្វិកអាមេរិកមាននាវាចម្បាំងកាន់តែតិចជាមុន បើប្រៀបធៀបកាលពី២ទសវត្សរ៍មុន។ ចំនួននាវាអាមេរិកធ្លាក់ចុះ ស្របពេលដែលចិនបន្តពង្រឹងឥទ្ធិពលនិងអំណាចយោធារបស់ខ្លួនឥតឈប់ ជាពិសេសចិនផ្តោតលើពង្រឹងយុទ្ធសាស្ត្រទ័ពជើងទឹក។ការប្រកាសសង់នាវាដឹកយន្តហោះទីពីររបស់ចិនជាឧទាហរណ៍ស្រាប់។
សូមស្ដាប់ព័ត៌មានលម្អិត៖
ចំនួននាវាចម្បាំងនៅទីបញ្ជាការអាមេរិកប្រចាំតំបន់ប៉ាស៊ីហ្វិកបានធ្លាក់ចុះ បើប្រៀបធៀបចំនួននាវា បច្ចុប្បន្នជាមួយចំនួននាវាកាលពីពីរទសវត្សរ៍មុន ។ គេឆ្ងល់ថា ចំនួននាវាធ្លាក់ចុះបែបនេះ តើសហរដ្ឋអាមេរិកអាចនឹងទប់ទល់ជាមួយមហាយក្សចិនបែបណា បើមានការប៉ះទង្គិចគ្នាកើតឡើង។ ហើយចិនក៏បន្តផលិតអាវុធជាពិសេសនាវាចម្បាំង នាវាដឹកយន្តហោះចម្បាំងបន្តបន្ទាប់ទៀត។
យោងតាមទីភ្នាក់ងារព័ត៌មាន AP ទីបញ្ជាការប៉ាស៊ីហ្វិកបច្ចុប្បន្នមាននាវាសរុប១៨២គ្រឿង ក្នុងនោះមាននាវាមុជទឹក នាវាពិឃាត និងនាវាដឹកយន្តហោះជាដើម តែកាលពីពីរទសវត្សរ៍មុនទីបញ្ជាការនេះមាននាវាជិត ២០០គ្រឿងឯណោះ។ ចំណែកកងទ័ពជើងទឹកចិនមាននាវារហូតដល់ជាង ៣០០គ្រឿង ក្នុងនោះមាននាវាចម្បាំង នាវាមុជទឹក នាវាល្បាត និងនាវាដឹកសព្វាវុធផងដែរ។ ចិនមាននាវាដឹកយន្តហោះចម្បាំងត្រឹមតែមួយគ្រឿងប៉ុណ្ណោះ តែសប្តាហ៍មុនក្រុងប៉េកាំងបានប្រកាសសង់នាវាដឹកយន្តហោះទី២របស់ខ្លួនថែមទៀត។
ពាក់ព័ន្ធនឹងចម្ងល់ខាងលើ មេបញ្ជាការកងទ័ពជើងទឹកអាមេរិកប្រចាំទីបញ្ជាការប៉ាស៊ីហ្វិកលោក Scott Swift បានលើកឡើងថា លោកនៅតែមានទំនុកចិត្តនិងមិនភ័យបារម្ភចំពោះចំនួនសព្វាវុធជាពិសេសនាវាដែលអាមេរិកមានបច្ចុប្បន្ន ទោះជាប្រទេសមួយចំនួនលើកឡើងពីកង្វល់ពាក់ព័ន្ធបញ្ហាដែលខ្លួនជួបប្រទះនិងភាពមិនច្បាស់លាស់ផ្នែកសន្តិសុខក៏ដោយ។
លោកសង្កត់ធ្ងន់ថា ថ្វីបើចំនួននាវាអាមេរិកមាននៅប៉ាស៊ីហ្វិកតិចជាងអំឡុងទសវត្សរ៍ឆ្នាំ ១៩៩០ក៏ដោយ តែលោកទុកចិត្តលើសមត្ថភាពនិងបច្ចេកវិទ្យានាវាចម្បាំងអាមេរិកពេលបច្ចុប្បន្នជាង។ នេះមានន័យថា នាវាបច្ចុប្បន្នតិចប៉ុន្តែបើនិយាយសព្វាវុធនិងបច្ចេកវិទ្យាដែលបំពាក់លើនាវាសុទ្ធតែទំនើបនិងជួយឲ្យទ័ពជើងទឹកអាមេរិកអាចឆ្លើយតបរាល់ការគំរាមកំហែងបានយ៉ាងមានប្រសិទ្ធភាព។
ការធ្លាក់ចុះនៃចំនួននាវានេះ ក៏ប្រហែលជាបណ្តាលមកពីបញ្ហាសំខាន់មួយចំនួនជាពិសេសនាវាប្រឈមបញ្ហាបច្ចេកទេស។ នេះក៏ព្រោះថា នាវាទាំងនេះបំពេញប្រតិបត្តិការមកយូរមកហើយនិងមានការទាំងមិនសូវបានដិតដល់។
កន្លងមក ដោយសារបញ្ហាសមុទ្រចិនត្បូង ហើយ យោធាចិនកាន់តែខ្លាំង ក្រុងវ៉ាស៊ីនតោនចាប់ផ្តើមសាកល្បងជំហរក្រុងប៉េកាំងដោយបន្តបង្កើនវត្តមាននាវានិងកងទ័ពរបស់ខ្លួននៅក្នុងតំបន់ជាពិសេសដឹកនាំប្រទេសជាមិត្តធ្វើសមយុទ្ធយោធា និងបង្កើនសកម្មភាពល្បាតសមុទ្រជាដើម។ ដូចកាលពីឆ្នាំមុន អាមេរិកបញ្ជូននាវាចម្បាំងទៅក្បែរៗកោះសិប្បនិម្មិតរបស់ចិនដែលសង់ឡើងនៅក្នុងតំបន់ជម្លោះសមុទ្រចិនខាងត្បូង។ ចិនខឹងសម្បារខ្លាំង និងទិតៀនអាមេរិក ប៉ុន្តែមិនមានការតបតដោយប្រើប្រាស់កម្លាំងទេ៕
© រក្សាសិទ្ធិដោយ thmeythmey.com