អន្តរជាតិ
ក្រោមប្រតិបត្តិការបង្ហូរឈាម ស្តេចគ្រឿងញៀន El Chapo ត្រូវបានចាប់ខ្លួនឡើងវិញ
×
លោកប្រធានធិបតីម៉ិកស៊ិក Enrique Peña Nieto បានប្រកាសជាផ្លូវការកាលពីថ្ងៃទី០៨ខែមករា ម្សិលមិញតាមរយៈគណនី Twitter ថា ស្តេចគ្រឿងដ៏ល្បីឈ្មោះអាក្រក់បំផុតរបស់ពិភពលោក លោក Joaquín Guzmán Loera ត្រូវបានចាប់ខ្លួន និងកំពុងស្ថិតក្រោមការឃុំឃាំងរបស់ប៉ូលិសម៉ិកស៊ិកហើយ។ នេះបើយោងតាមសារព័ត៌មាន The World Post។
លោក Joaquín Guzmán Loera ដែលត្រូវបានស្គាល់ថា El Chapo ត្រូវបានប៉ូលិសសហព័ន្ធម៉ិកស៊ិកចាប់ខ្លួនបានកាលពីថ្ងៃសុក្រម្សិលមិញនៅទីក្រុង Los Mochis នៃ រដ្ឋSinaloa ដែលជាទីកន្លែងកំណើតរបស់លោក។ ការឈានមកដល់ការចាប់ឧក្រិដ្ឋជនគ្រឿងញៀនដ៏ល្បីឈ្មោះរូបនេះដោយជោគជ័យធ្វើ ឡើងក្រោមប្រតិបត្តិការបង្ហូរឈាមដែលមានកិច្ចសហការពីកងម្លាំងប៉ូលិស និងទាហានជើងទឹក ម៉ិកស៊ិកជាយូរថ្ងៃខែមកហើយ។
បើតាមសេចក្តីថ្លែងការណ៍របស់កងទ័ពជើងទឹកម៉ិកស៊ិក យ៉ាងហោចណាស់មានមនុស្សស្លាប់ប្រាំនាក់ ដោយសារការប៉ះទង្គិចគ្នាក្នុងអំឡុងពេលនៃប្រតិបត្តិការ និងប្រាំមួយនាក់ ត្រូវបានចាប់ខ្លួន។
សូមបញ្ជាក់ផងដែរថា លោក Joaquín Guzmán Loera ចាប់ផ្តើមធ្វើជំនួញគ្រឿងញៀន និងបានចែក ចាយគ្រឿងញៀនពីក្នុងប្រទេស រហូតដល់ឆ្លងពីប្រទេសមួយទៅប្រទេសមួយតាំងពីឆ្នាំ១៩៨០។ ហើយក្រោយមកលោក បានក្លាយជាស្តេចគ្រឿងញៀនដ៏មានឥទ្ធិពល និងមានបំផុតក្នុងប្រទេស និងពិភពលោក។
ជាស្តេចគ្រឿងញៀនដែលល្បីឈ្មោះអាក្រក់បំផុតរបស់ពិភពលោក លោក El Chapo ត្រូវប៉ូលិសចាប់ ខ្លួនបានជាច្រើនលើកមកហើយ។ ក្នុងនោះ លើកដំបូងលោក ត្រូវបានប៉ូលិសចាប់ខ្លួននៅក្នុងប្រទេស ក្វាតេម៉ាឡានៅឆ្នាំ១៩៩៣ ហើយ ត្រូវធ្វើបត្យាប័នបញ្ជូនមកម៉ិកស៊ិកវិញ។ តែនៅឆ្នាំ២០០១ ឧក្រិដ្ឋជន រូបនេះ បានគេចខ្លួនចេញពីគុក។ ឆ្នាំ២០១៤ El Chapo ត្រូវបានចាប់ខ្លួនជាថ្មី តែ នៅកក្កដា ឆ្នាំ២០១៥ El Chapo បានគេចខ្លួនម្តងទៀតតាមរយៈផ្លូវក្រោមដី។
ជុំវិញការចាប់ខ្លួនឧក្រិដ្ឋជនគ្រឿងញៀនដ៏មានឥទ្ធិពលរបស់ពិភពលោក នេះដែរ ក៏ត្រូវបានរដ្ឋាភិបាល អាមេរិកសុំធ្វើបត្យាប័នបញ្ជូនទៅកាន់អាមេរិកផងដែរ។ នោះ ក៏ព្រោះតែ គេខ្លាចឧក្រិដ្ឋជនរូបនេះ អាច នឹងមានលទ្ធភាពក្នុងគេចខ្លួនសារជាថ្មី។ យ៉ាងណាក៏ដោយ សំណើបត្យាប័ននេះ មិនទាន់មានការ ឆ្លើយតបនៅឡើយនោះទេ៕
© រក្សាសិទ្ធិដោយ thmeythmey.com