អ៊ីរ៉ង់ហាមប្រជាជនធ្វើធម្មយាត្រាប្រចាំឆ្នាំទៅកាន់អារ៉ាប៊ី សាអូឌីត

អន្តរជាតិ

អ៊ីរ៉ង់ហាមប្រជាជនធ្វើធម្មយាត្រាប្រចាំឆ្នាំទៅកាន់អារ៉ាប៊ី សាអូឌីត

09, Jan 2016 , 12:33 pm

រូបភាព

ដោយ: តន ចាន់រិទ្ធារ៉ា

អ៊ីរ៉ង់បានហាមប្រាមប្រជាជនរបស់ខ្លួនធ្វើពិធីបុណ្យ Haj ដែលជាធម្មយាត្រាប្រចាំឆ្នាំទៅកាន់អារ៉ាប៊ី សាអូឌីត ។ នេះជាវិធានការថ្មីមួយទៀតរបស់រដ្ឋាភិបាលអ៊ីរ៉ង់ ជាការឆ្លើយតបនឹងសកម្មភាពរបស់អារ៉ាប៊ី សាអូឌីត ដែលហាមការហោះហើរនិងពាណិជ្ជកម្មជាមួយអ៊ីរ៉ង់ខណៈទំនាស់រវាងប្រទេសទាំងពីរកាន់តែដុនដាបទៅហើយនោះ ។

រដ្ឋាភិបាលអ៊ីរ៉ង់បានដាក់ចេញវិធានការថ្មីមួយទៀតប្រឆាំងនឹងអារ៉ាប៊ី សាអូឌីត ដោយបានហាមប្រជាជនខ្លួនធ្វើដំណើរធម្មយាត្រាប្រចាំឆ្នាំ Haj ទៅកាន់អារ៉ាប៊ី សាអូឌីត ។ អ៊ីរ៉ង់ដាក់ចេញវិធានការនេះមានជាងរយៈពេលមួយសប្ដាហ៍ ក្រោយការតានតឹងរវាងខ្លួននឹងអារ៉ាប៊ី សាអូឌីត ដែលបណ្ដាលមកពីការប្រហារជីវិតបព្វជិតនិកាយស៊ីអ៊ីត Nimr al-Nimr ។

តាមច្បាប់របស់សាសនាឥស្លាម សាសនិកឥស្លាមគ្រប់រូបដែលមានលទ្ធភាពគ្រប់គ្រាន់ ត្រូវធ្វើធម្មយាត្រាទៅកាន់ទឹកដីពិសិដ្ឋឥស្លាមនៅ Mecca ក្នុងអារ៉ាប៊ី សាអូឌីតឲ្យបានមួយដងក្នុងមួយជីវិតរបស់ខ្លួន ។

ការដាក់ចេញវិធាននេះទៀតសោត គឺចំពេលដែលទំនាក់ទំនងរវាងមហាអំណាចតំបន់ទាំងពីរកាន់តែធ្ងន់ធ្ងរទៅៗ ។ អារ៉ាប៊ី សាអូឌីត បានប្រកាសផ្ដាច់ទំនាក់ទូតជាមួយអ៊ីរ៉ង់ ហើយថែមទាំងបានហាមការហោះហើរនិងសកម្មភាពពាណិជ្ជកម្មជាមួយអ៊ីរ៉ងទៀតផង ។ ក្រៅពីអារ៉ាប៊ី សាអូឌីត ប្រទេសកាន់និកាយស៊ូនីមួយចំនួនដូចជា បារ៉ែន ស៊ូដង់ ក៏បានផ្ដាច់ទំនាក់ទំនងការទូតជាមួយអ៊ីរ៉ង់ដែរ ។

ជាលទ្ធផលនៃការហាមប្រាមនេះ អារ៉ាប៊ី សាអូឌីត អាចនឹងបាត់បង់ចំណូលប្រមាណ១៨ ពាន់លានដុល្លារ ពីទេសចរអ៊ីរ៉ង់ជិត៦សែននាក់ដែលមកអារ៉ាប៊ី សាអូឌីត ។ យ៉ាងណាក្ដី បើគេមើលវិធានការប្រឆាំងនឹងអ៊ីរ៉ង់ អារ៉ាប៊ី សាអូឌីត មិនបានហាមប្រជាជនអ៊ីរ៉ង់ធ្វើដំណើរចូលទឹកដីខ្លួនដើម្បីចូលរួមធម្មយាត្រា Haj នោះទេ ។ តែពេលនេះ អ៊ីរ៉ង់បែរជាហាមឃាត់ប្រជាជនខ្លួនទៅវិញ ។

សូមរម្លឹកថា នេះមិនមែនជាលើកទីមួយទេ ដែលអ៊ីរ៉ង់ហាមប្រជាជនខ្លួនធ្វើដំណើរទៅកាន់អារ៉ាប៊ី សាអូឌីត ។ ហើយចុងក្រោយបំផុតនោះ គឺនៅឆ្នាំ១៩៨៧ នៅពេលដែលរដ្ឋាភិបាលអ៊ីរ៉ង់បានហាមប្រជាជនខ្លួនមិនឲ្យទៅ សាអូឌីត ក្រោយប្រជាជនអ៊ីរ៉ង់ជាង៤០០នាក់ត្រូវបានសម្លាប់ប៉ូលិសបង្ក្រាបបាតុកម្មអារ៉ាប៊ី សាអូឌីត ៕