អន្តរជាតិ
នយោបាយអន្តរជាតិ
គ្រាប់បែកអ៊ីដ្រូសែន៖ កូរ៉េខាងជើងថា អាមេរិកនិងសម្ព័ន្ធមិត្តច្រណែននឹងភាពជោគជ័យខ្លួន
×
រដ្ឋាភិបាលក្រុងព្យុងយ៉ាង បានចាត់ទុកការចាក់សំឡេងរំខាននៅតាមព្រំដែនកូរ៉េទាំងពីរដោយកូរ៉េខាងត្បូង ថា ជាការច្រណែនពីសមិទ្ធផលកូរ៉េខាងជើង និងជាសកម្មភាពដែលជំរុញឲ្យមានសង្គ្រាមនៅក្នុងឧបទ្វីបកូរ៉េទៀតផង។ ការរិះគន់នេះ ធ្វើឡើងក្នុងឱកាសនៃការជួបជុំមួយក្នុងក្រុងព្យុងយ៉ាងដែលត្រូវជាថ្ងៃកំណើតរបស់មេដឹកនាំកំពូលកូរ៉េខាងជើងលោក គីម ជុងអ៊ុនផងដែរ។
កាលពីថ្ងៃសុក្រទី០៨ មករា ម្សិលមិញ មន្ត្រីជាន់ខ្ពស់បក្សកម្មករកូរ៉េខាងជើង លោក Kim Ki Nam បាន ថែ្លងរិះគន់ និងចំអកកូរ៉េខាងត្បូង ក្នុងចំណោមប្រជាជនរាប់ពាន់នាក់ដែលបានប្រមូលផ្តុំនៅក្នុងក្រុងព្យុងយ៉ាង ដែលស្របនឹងថ្ងៃកំណើតរបស់លោក គីម ជុងអ៊ុន។ នេះ គឺជាការថ្លែងការណ៍ឆ្លើយតប លើកដំបូងរបស់កូរ៉េខាងជើងទៅនឹងការផ្តើមឡើងវិញនៃការចាក់បំពងសំឡេងនៅតាមព្រំដែនកូរ៉េដោយកូរ៉េខាងត្បូង។
យោងតាមសារព័ត៌មាន Reuters លោក Kim Ki Nam បានអះអាងថា ការច្រណែន នៃភាពជោគជ័យ នៃការបាញ់សាកល្បងគ្រាប់បែកអ៊ីដ្រូសែនលើកដំបូងរបស់កូរ៉េខាងជើងរបស់អាមេរិក និងសម្ព័ន្ធមិត្តខ្លួន នឹងធ្វើស្ថានភាពកាន់តែធ្ងន់ធ្ងរ និងអាចនាំឲ្យមានសង្គ្រាមទៀតផង។
សូមរម្លឹកផងដែរថា កាលពីថ្ងៃទី០៦ មករា កន្លងទៅ កូរ៉េខាងជើង បានបាញ់សាកល្បងគ្រាប់បែកអ៊ីដ្រូសែនដោយជោគជ័យ។ គ្រាប់បែកអ៊ីដ្រូសែន គឺជាប្រភេទអាវុធដ៏ទំនើប និងមានឥទ្ធិពលរបស់កូរ៉េខាងជើង ដែលទើបតែរកឃើញ។ កូរ៉េខាងជើង បានចាត់ទុកសមិទ្ធផលនៃការផលិតគ្រាប់បែកនេះថានឹងធ្វើឲ្យខ្លួនក្លាយជាប្រទេសដ៏មានអំណាចរបស់ពិភពលោកផងដែរ។
ជុំវិញនៃការបាញ់សាកល្បងរបស់កូរ៉េខាងជើងនេះដែរ បានរងនូវការរិះគន់ពីសហគមន៍អន្តរជាតិយ៉ាង ខ្លាំង ដ្បិតសកម្មភាពនេះ បានបំពានទៅនឹងបំរាមរបស់ក្រុមប្រឹក្សាសន្តិសុខអង្គការសហប្រជាជាតិ ហើយបានគំរាមកំហែងកំហែងដល់សន្តិសុខនៅក្នុងតំបន់ទៀតផង។
បច្ចុប្បន្ន ចិន អាមេរិក និងកូរ៉េខាងត្បូង បាននិងកំពុងជជែកគ្នារកដំណោះស្រាយណាមួយដើម្បីកាត់ បន្ថយនូវភាពតានតឹង និងបញ្ជៀសពីការប្រឈមគ្នាផ្នែកសព្វាវុធ។ ក្នុងនោះតាមរយៈកិច្ចសន្ទនា រវាងប្រមុខការទូតអាមេរិក លោក ចន ខេរី និងសមភាគីចិន លោក វ៉ាង យី ចិន ទទូចឲ្យមានការចរចាឡើង វិញនូវភាគី៦ដែលបានដំណើរការតាំងពីឆ្នាំ២០០៣ និងបញ្ឈប់នៅឆ្នាំ២០០៩ ក្រោយកូរ៉េខាងជើងបាន ដកខ្លួន។ ភាគី៦ មានដូចជា អាមេរិក រុស្ស៊ី ចិន ជប៉ុន កូរ៉េខាងត្បូង និងកូរ៉េខាងជើង។
សូមបញ្ជាក់ផងដែរថា ភាពតានតឹងដែលឈានទៅដល់ការបាញ់គ្រាប់ផ្លោងដាក់គ្នានៅឧបទ្វីបកូរ៉េ បានកើតឡើងចុងក្រោយកាលពីខែសីហា ឆ្នាំ២០១៥។ ការប្រឈមមុខគ្នាបានស្ងប់ស្ងាត់ទៅវិញ ក្រោមកិច្ចព្រមព្រៀងថ្ងៃទី២៥ ខែសីហា ឆ្នាំ២០១៥ ដោយភាគីទាំងពីរបានព្រមព្រៀងគ្នាដកទ័ពចេញពី ព្រំដែន៕
© រក្សាសិទ្ធិដោយ thmeythmey.com