អន្តរជាតិ
សត្វស្វាមិនមានកម្មសិទ្ធិបញ្ញាលើរូប Selfie របស់ខ្លួននោះឡើយ
×
រឿងក្តីក្តាំមួយបានកើតឡើងនៅរដ្ឋកាលីហ្វនីញ៉ា សហរដ្ឋអាមេរិក ដោយក្រុមអភិរក្សសត្វមួយបានចោទអ្នកថតរូបម្នាក់ ថាបានរំលោភលើកម្មសិទ្ធិបញ្ញារបស់សត្វស្វា ដែលបានថត Selfie ខ្លួនឯង។ ចៅក្រមអាមេរិកម្នាក់បានអះអាងថា សត្វទាំងអស់មិនមានសិទ្ធិគ្រប់គ្រងលើកម្មសិទ្ធបញ្ញានោះឡើយ។
យោងតាមការផ្សាយរបស់កាសែតបារាំង Le Point រឿងរ៉ាវបានចាប់ផ្តើមកើតឡើងកាលពីឆ្នាំ២០១១ ដោយអ្នកថតរូបអង់គ្លេស David Slater បានធ្វើដំណើរទៅកោះ Sulwesi ប្រទេសឥណ្ឌូនេស៊ី ដើម្បីថតរូបជាស៊េរី។ ខណៈដែលគាត់កំពុងតម្លើងជើងកាម៉េរា សត្វស្វាឈ្មោះ Naruto បានយកកាម៉េរាលោកទៅថត Selfie ខ្លួនឯងចំនួន២ប៉ុស្តិ៍។
បន្ទាប់មក លោក David Slater បានបោះពុម្ពផ្សាយរូបថតរបស់ខ្លួន ដែលក្នុងនោះមានរូបថត Selfie ពីរសន្លឹករបស់ស្វា Naruto។ ប៉ុន្តែលោក David បានសរសេរថា រូបទាំងនោះគឺជាស្នាដៃរបស់ខ្លួន ហើយលោកក៏មានការខឹងសម្បារយ៉ាងខ្លាំងផងដែរ ដែលឃើញគេយករូបទាំងនោះទៅប្រើប្រាស់ដោយគ្មានការអនុញ្ញាត។
ស្របពេលជាមួយគ្នានេះផងដែរ ក្រុមអង្គការការពារសិទ្ធិសត្វមួយរបស់សហរដ្ឋអាមេរិកដែលមានឈ្មោះថា PETA បានចោទប្រកាន់លោក David ថា បានរំលោភលើកម្មសិទ្ធិបញ្ញារបស់សត្វស្វា។ PETA បានទាមទារឲ្យលោក David និងវណ្ណកម្មសៀវភៅ Blurb of San Francisco សងជំងឺចិត្តជាប្រាក់ដល់សត្វស្វា។
ទោះបីជាយ៉ាងណាក៏ដោយ ចៅក្រមអាមេរិក លោក William Orrick បានបកស្រាយតាមច្បាប់ថា ទាំងលោក David និងស្វា Naruto មិនមានសិទ្ធិលើរូបថតនោះឡើយ។ លោកពន្យល់ថា៖ «រូបថតដែលផ្តិតដោយធម្មជាតិ សត្វ និងរុក្ខជាតិ ជាដើម មិនស្ថិតនៅក្រោមកម្មសិទ្ធិអ្នកណានោះឡើយ»។
ក្រុមការពារសិទ្ធិសត្វនៅតែមិនមានភាពស្ងប់ឡើយចំពោះការបកស្រាយបែបនេះ ដោយពួកគេយល់ថា សត្វស្វា Naruto គួរតែមានសិទ្ធិលើស្នាដៃរបស់ខ្លួន។ ប្រសិនបើគេបានសំណងជំងឺចិត្ត ទឹកប្រាក់នឹងប្រើប្រាស់សម្រាប់ការផ្គត់ផ្គង់ចំណីអាហារ និងទីជម្រករបស់ Naruto ផ្ទាល់៕
© រក្សាសិទ្ធិដោយ thmeythmey.com