ផ្នែកចារកិច្ចអាល្លឺម៉ង់ និងអាមេរិកចាប់ដៃសហការគ្នាឡើងវិញ

អន្តរជាតិ

នយោបាយអន្តរជាតិ

ផ្នែកចារកិច្ចអាល្លឺម៉ង់ និងអាមេរិកចាប់ដៃសហការគ្នាឡើងវិញ

10, Jan 2016 , 9:30 am

រូបភាព

ដោយ:

សារព័ត៌មានអាល្លឺម៉ង់ជាច្រើនបានចុះផ្សាយនៅថ្ងៃសុក្រម្សិលមិញនេះ ថាទីភ្នាក់ងារចារកិច្ចអាល្លឺម៉ង់ ហៅកាត់ថា BND បានចាប់ផ្តើមបន្តកិច្ចសហប្រតិបត្តិការជាមួយទីភ្នាក់ងារចារកិច្ចអាមេរិក NSA ឡើងវិញ បន្ទាប់ពីកាត់ផ្តាច់ទំនាក់ទំនងជាមួយអាមេរិកកាលពីខែឧសភាឆ្នាំមុនមក។

ទីភ្នាក់ងារសន្តិសុខជាតិអាមេរិក NSA ចាប់ផ្តើមទទួលព័ត៌មានពីទីភ្នាក់ងារចារកិច្ចអាល្លឹម៉ង់BND នៃមជ្ឈមណ្ឌលBad Aibling ឡើងវិញហើយ។ មជ្ឈមណ្ឌលមួយនេះធ្វើការងារទាក់ទងនឹងបណ្តាប្រទេសនៅតំបន់បូព៌ា។ ការចាប់ដៃទាក់ទងអាមេរិកឡើងវិញ ប្រហែលធ្វើឡើងដើម្បីសុវត្ថិភាពជាតិ ប្រឈមនឹងការគំរាមកំហែងភេរវកម្មនៅអឺរ៉ុបដែរ។ អឺរ៉ុបកំពុងបារម្ភខ្លាំង ពីសុវត្ថិភាពប្រជាជនខ្លួន តាំងពីក្រុងប៉ារីសរងភេរវកម្មពីសំណាក់ក្រុមរដ្ឋអ៊ីស្លាម កាលពីខែវិច្ឆិកាមក។

កាលពីយប់ថ្ងៃចូលបុណ្យឆ្នាំសាកល២០១៦កន្លងទៅថ្មីៗនេះ អាល្លឺម៉ង់បានរងការគំរាមភេរវកម្ម រហូតដល់សម្រេចបិទដំណើរការស្ថានីយរថភ្លើងពីរកន្លែង នៅក្រុងមុយនិច។ អាល្លឺម៉ង់ទទួលព័ត៌មានទាក់ទងការគំរាមនេះពីផ្នែកចារកិច្ចមួយជាដៃគូរបស់ខ្លួន។ តាំងពីពេលនោះមក រដ្ឋមន្ត្រីមហាផ្ទៃបានលើកតំកើងកិច្ចសហប្រតិបត្តិការកាន់តែជិតដិតជាមួយប្រទេសផ្សេងៗ។

គួររំលឹកថា កាលពីខែឧសភាឆ្នាំ២០១៥ ទីភ្នាក់ងារចារកិច្ចអាល្លឺម៉ង់បានប្រកាសឈប់បញ្ជូនព័ត៌មានទៅទីភ្នាក់ងារចារកិច្ចអាមេរិក ដោយសារតែមានលេចធ្លាយព័ត៌មានចោទប្រកាន់ទីភ្នាក់ងារអាល្លឺម៉់ង់ថា បានជួយអាមេរិកស៊ើបការណ៍ថ្នាក់ដឹកនាំនិងក្រុមហ៊ុនផ្សេងៗរបស់អឺរ៉ុប។ ដោយសាររឿងនេះ ទំនាក់ទំនងរវាងអាល្លឺម៉ង់និងអាមេរិកកន្លងមក បានជួបភាពតានតឹង៕