ព័ត៌មានជាតិ
ខ្មែរក្រហម
កំណាព្យ
ONE Championship
ចំណេះដឹងទូទៅ
ពន្យល់ពាក្យ
នយោបាយ
សេដ្ឋកិច្ច
សង្គម
ព័ត៌មានកីឡាជាតិ
វិទ្យុ
ព័ត៌មានសុខភាព
រូបត្លុក
ពីនេះ ពីនោះ
ព័ត៌មានអន្តរជាតិ
នយោបាយ
សិល្បៈ
COVID-19
សេដ្ឋកិច្ច
សង្គម
វប្បធម៌
FIFA
កីឡាអន្តរជាតិ
អត្ថបទពាណិជ្ជកម្ម
បទយកការណ៍/សម្ភាស
ជាតិ
ចំណាយពេលជិត២ឆ្នាំ-ប្រាក់ជាង$២ពាន់/ខែដើរកម្សាន្តដោយគ្មានធ្វើការ
10, Jan 2016 ,
8:00 pm
រូបភាព
×
×
×
×
×
×
ដោយ:
គី សុខលីម (Ky Soklim)
&
ខេត្តព្រះសីហនុ៖ គូស្រករជនជាតិបារាំងពីរគូសាកល្បងធ្វើដំណើរជុំវិញពិភពលោកដោយចំណាយពេលជិត២ឆ្នាំ និងចំណាយប្រាក់ខែជាង២ពាន់ដុល្លារក្នុងមួយខែដើម្បីដើរកម្សាន្តស្វែងយល់ពីពិភពលោក។ កាលពីពេលថ្មីៗកន្លងមកនេះ គូស្រករទាំងពីរនេះបានមកដល់ប្រទេសកម្ពុជា ហើយឆ្លងឆ្នាំនៅក្រុងព្រះសីហនុជាមួយប្រជាពលរដ្ឋខ្មែរនៅទីនោះ។
ម៉ោងប្រហែលជា៦ល្ងាចនៅលើឆ្នេរខ្សាច់ព្រះដំណាក់ស្តេច មិនឆ្ងាយប៉ុន្មានពីឆ្នេរអូឈើទាលនៅខេត្តព្រះសីហនុ គូស្រករជនជាតិបារាំងមួយគូកំពុងកម្សាន្តជាមួយកូនតូចៗពីរនាក់នៅក្នុងទឹកសមុទ្រដែលពោរពេញទៅដោយចំណាំងប្លាតនៃកាំរស្មីព្រះអាទិត្យពីទិសខាងលិច។ រីឯគូស្រករជនជាតិបារាំងពីរនាក់ទៀតកំពុងឈរនៅក្បែររថយន្តកាំមីញ៉ុងធំចំនួនពីរនៅក្បែរមាត់សមុទ្រនោះដែរ។ ស្នូរទឹកសមុទ្រ លាយឡំនឹងខ្យល់ធម្មជាតិបក់ចេញពីផ្ទៃសមុទ្រ ធ្វើឲ្យគូស្រករជនជាតិបារាំងទាំងពីរគូរំភើបចិត្តឥតឧបមា។
គូស្រករជនជាតិបារាំងទាំងពីរនេះ គឺជាអ្នកទេសចរគ្មានព្រំដែនដែលចេញដំណើរពីប្រទេសបារាំងកាល់ពី១ឆ្នាំកន្លះមុន ឆ្លងកាត់ប្រទេសជាច្រើន មុននឹងមកដល់ប្រទេសកម្ពុជាកាលពីចុងឆ្នាំ២០១៥កន្លងមក។ ជនជាតិបារាំងទាំងពីរគូបានចំណាយពេលប្រារព្ធពិធីឆ្លងឆ្នាំនៅថ្ងៃទី៣១ខែធ្នូឆ្នាំ២០១៥ ចូលថ្ងៃទី១ខែមករាឆ្នាំ២០១៦នៅលើទឹកដីខេត្តព្រះសីហនុនៅក្បែរឆ្នេរខ្សាច់ដ៏ស្រស់ស្អាត។
គូស្រករនីមួយៗមានរថយន្តកាំមីញ៉ុងម្នាក់មួយគ្រឿងរៀងខ្លួនៗ។ ពួកគេចេញដំណើរកម្សាន្តពីប្រទេសបារាំងក្នុងខែតែមួយ តែចៃដន្យសំណាងល្អ ពួកគេបានជួបគ្នានៅក្នុងប្រទេសម៉ុងហ្គោលី មុននឹងធ្វើដំណើរបន្តជាមួយគ្នារហូតមកដល់ប្រទេសកម្ពុជានៅដើមខែមករាឆ្នាំ២០១៦នេះ។ ក្នុងទឹកមុខរំភើប សើចសប្បាយ គូស្រករជនជាតិបារាំងទាំងពីរបានឈរសំណេះសំណាលជាមួយអ្នកសារព័ត៌មានថ្មីៗដោយបញ្ជាក់ប្រាប់ថា ពួកគេបានឆ្លងកាត់ប្រទេសជាច្រើនមុននឹងមកដល់កម្ពុជាតាមរយៈឡានកាំមីញ៉ុងរបស់ពួកគេ។ រថយន្តនេះ ឆ្លងកាត់ប្រទេសជាច្រើននៅក្នុងទ្វីបអឺរ៉ុប ដូចជាប្រទេសអាលឺម៉ង ប៉ូឡូញ… រួចមកឆ្លងកាត់ប្រទេសម៉ុងហ្គោលី រុស្ស៊ី កូរ៉េខាងត្បូង ម៉ាឡេស៊ី ថៃ… មុននឹងមកដល់ប្រទេសកម្ពុជា ហើយត្រៀមធ្វើដំណើរទៅកាន់ប្រទេសផ្សេងទៀតដូចជា ឡាវ វៀតណាម… មុននឹងត្រឡប់ចូលប្រទេសបារាំងវិញដើម្បីចាប់ផ្តើមការងារសារជាថ្មី។
នៅក្នុងរថយន្តកាំមីញ៉ុងនីមួយៗ ពួកគេមានសម្ភារគ្រប់យ៉ាងដូចនៅក្នុងផ្ទះនីមួយៗដែរ។ មានផ្ទះបាយ បង្គន់ ម៉ាស៊ីនត្រជាក់ ទូរសម្លៀកបំពាក់ គ្រែ ទូរទឹកកក។ល។ វាគឺជាផ្ទះតូចមួយដែលពោរពេញទៅដោយគ្រឿងសង្ហាររឹមគ្រប់គ្រាន់ដើម្បីធ្វើដំណើរផ្លូវឆ្ងាយ។ អាហារស្តុកមួយចំនួនត្រូវបានគេរៀបចំទុកជានិច្ច។ ប៉ុន្តែពួកគេក៏ត្រូវភ្លក់រសជាតិអាហារតាមប្រទេសនីមួយៗដែរ។
ឈរនៅក្បែររថយន្ត និងឆ្កែពីក្បាលរបស់លោក, លោក Remis Cordon អាយុ៣៥ឆ្នាំដែលធ្វើដំណើរជាមួយភរិយាបាននិយាយប្រាប់ថា៖«អាហារខ្មែរឆ្ងាញ់។ អាហារសមុទ្រខ្មែរក៏ឆ្ងាញ់ដែរ។ ទោះជាយ៉ាងណា យើងក៏អាចរកទិញនំបុ័ងបានដែរ»។
ងាកទៅគូស្រករមួយទៀត គឺជាគ្រួសាររបស់អ្នកស្រី Mariante។ គ្រួសារ Mariante មានគ្នា៤នាក់ក្នុងដំណើរកម្សាន្តដ៏វែងឆ្ងាយមួយនេះ។ កូនស្រីតូចរបស់នាងទើបមានអាយុជិតពីរឆ្នាំទេមកដល់ថ្ងៃឆ្លងឆ្នាំ២០១៥កន្លងមកនេះ។ ស្វាមីរបស់ Mariante បានឆ្លើយមកថា៖«ពេលយើងចេញដំណើរភ្លាម កូនស្រីខ្ញុំមានអាយុតែ៣ខែប៉ុណ្ណោះ ឥឡូវគេមានអាយុជិត២ឆ្នាំហើយ»។
ការធ្វើដំណើរបស់គូស្វាមីទាំងពីរគូនេះ មិនមែនកើតឡើងដោយចៃដន្យ ឬគ្មានគម្រោងនោះទេ។ តាមពិត ពួកគេមានគម្រោងច្បាស់លាស់។ ដៃម្ខាងពកូនស្រី, Mariante បាននិយាយបន្តប្រាប់ទៀតថា៖«ពួកយើងធ្វើការអស់រយៈពេលច្រើនឆ្នាំមកហើយ។ ដូច្នេះ ពួកយើងចង់ឆ្លៀតឱកាសដើរកម្សាន្តជាមួយកូនតូចៗទាំងពីរ និងម្យ៉ាងទៀត ពួកយើងចង់ស្គាល់ពិភពលោកឲ្យកាន់តែច្បាស់ជាងមុន។ ពួកយើងចង់បានបទពិសោធន៍ជីវិតនៃពលរដ្ឋដទៃទៀត»។
បន្ទាប់ពីសន្សំប្រាក់អស់រយៈពេលជាច្រើនឆ្នាំរួចមក គ្រួសារ Mariante ត្រូវចំណាយប្រាក់ប្រមាណជា២៥០០អឺរ៉ូ(ជិត៣០០០ដុល្លារ)ក្នុងមួយ១ខែដើម្បីដើរកម្សាន្តជាមួយកូនតូចពីរនាក់។ រីឯគ្រួសារលោក Remis Cordon វិញ, លោកត្រូវចំណាយប្រាក់១៥០០អឺរ៉ូ(ជិត២០០០ដុល្លារ)ប្រចាំខែជាមួយភរិយារបស់លោក និងឆ្កែពីក្បាល៕
សូមចុចត្រង់នេះដើម្បីអានថ្មីៗជាភាសាអង់គ្លេស (Cambodianess.com)
© រក្សាសិទ្ធិដោយ thmeythmey.com
អត្ថបទពេញនិយម
សណ្ដែកកួរ ឡើងដល់៤ម៉ឺនរៀល ក្នុងមួយគីឡូក្រាម
4 ថ្ងៃ
«ប្រសប់»និង«ប្រសព្វ» មានសូរសព្ទដូចគ្នា តែន័យខុសគ្នា!
5 ថ្ងៃ
បុរាណវិទូប្រឹងគាស់កកាយអាថ៌កំបាំងព្រែកជីកស្រមោច ដែលបានជីកមុនរាជ្យព្រះបាទជ័យវរ្ម័នទី៧
6 ថ្ងៃ
ដំរីព្រៃ ដែលគេសង្គ្រោះចេញពីល្បាប់ភក់ ក្នុងដែនជម្រកសត្វព្រៃភ្នំព្រេច បានងាប់ហើយ
1 សប្តាហ៍
រវាង «លស់» «លួស» និង «លោះ» មានអត្ថន័យខុសគ្នាដូចម្តេច?
4 ថ្ងៃ
អត្ថបទពេញនិយមបន្ថែម