លោកថេន សេន ប្រឹងសម្រុកកសាងសមិទ្ធផលនៅសប្ដាហ៍ចុងក្រោយមុនផុតអាណត្តិសភា

អន្តរជាតិ

លោកថេន សេន ប្រឹងសម្រុកកសាងសមិទ្ធផលនៅសប្ដាហ៍ចុងក្រោយមុនផុតអាណត្តិសភា

12, Jan 2016 , 3:15 pm

រូបភាព

ដោយ:

ដូចដែលបានកំណត់នៅដើមឆ្នាំ២០១៦នេះ គឺជាពេលដែលមីយ៉ាន់ម៉ា ត្រូវផ្តើមនីតិកាលថ្មីនៃរដ្ឋសភា ដែលនឹងត្រូវដឹកនាំដោយបក្សឈ្នះឆ្នោតសម្ព័ន្ធជាតិដើម្បីប្រជាធិតេយ្យរបស់លោកស្រីអ៊ុងសាន ស៊ូជី បន្ទាប់ពីលទ្ធផលផ្លូវការបង្ហាញថាបក្សលោកស្រី ទទួលបានការគាំទ្រលើសលប់ក្នុងការបោះឆ្នោតលទ្ធិប្រជាធិបតេយ្យកាលពីខែវិច្ឆិកាឆ្នាំ២០១៥កន្លងទៅ។ ទន្ទឹមនឹងការចូលមកដល់ទីបញ្ចប់នៃអាណត្តិរបស់សភាដែលដឹកនាំដោយបក្សកាន់អំណាច គេសង្កេតឃើញមានច្បាប់ជាច្រើនបាននិងកំពុងអនុម័ត ដែលភាគច្រើនផ្តល់ផលប្រយោជន៍ទៅកាន់សភា និងរដ្ឋាភិបាលជិតផុតអាណត្តិ។

សូមស្ដាប់ព័ត៌មានលម្អិត៖

បើទោះបីជាការចរចារវាងប្រធានាធិបតីជិតផុតអាណត្តិលោក ថេន សេន ជាមួយនឹងប្រធានបក្សឈ្នះ ឆ្នោតលោកស្រីអ៊ុងសាន ស៊ូជី នៅតែបន្តធ្វើក៏ដោយ វាគឺជារឿងដែលគួរឲ្យកត់សម្គាល់ដែលមីយ៉ាន់ម៉ា ចៀសផុតពីការជាប់គាំងនយោបាយ។ ហើយនេះ គេមិនអាចប្រកែកបានថា វាជាចំណែកមួយនៃវប្បធម៌សន្ទនារបស់លោកស្រីស៊ូជី ដែលប្រើប្រាស់ដើម្បីចរចាពីការផ្ទេរអំណាចដោយសន្តិវិធីពីរដ្ឋាភិបាល ពាក់កណ្តាលស៊ីវិល និងស្ថាប័នដែលមានឥទ្ធិពលរបស់មីយ៉ាន់ម៉ាដែលកំពុងតែគ្រប់គ្រងដោយយោធា ។

បើយោងតាមសេចក្តីប្រកាសរបស់ប្រធានសភាជិតផុតអាណត្តិមីយ៉ាន់ម៉ាលោក ស្វេ ម៉ាន់ សភាដឹកនាំ ដោយបក្សសហភាពរួបរួម និងការអភិវឌ្ឍរបស់លោកប្រធានាធិបតីថេន សេន នឹងត្រូវបញ្ចប់នៅថ្ងៃទី ៣១ ខែមករា ខាងមុខនេះ។ ហើយ សភានីតិកាលថ្មី ដែលនឹងត្រូវដឹកនាំដោយបក្សឈ្នះឆ្នោតលោក ស្រី អ៊ុងសាន ស៊ូជី ក៏ត្រូវចាប់ផ្តើមនីតិកាលថ្មីនៅថ្ងៃទី០១ ខែកុម្ភៈបន្តបន្ទាប់គ្នាផងដែរនោះ។

១. សភាបក្សអំណាចសហភាពរួបរួម និងការអភិវឌ្ឍ ព្យាយាមបង្កើតឲ្យមានសមិទ្ធផលចុងក្រោយ
ពិតប្រាកដណាស់ វាមិនមែនជារឿងងាយស្រួលនោះទេ ក្នុងការផ្លាស់ប្តូររដ្ឋាភិបាលមួយដែលចាក់ឬស ដោយរបបយោធាជាច្រើនទសវត្សរ៍មកហើយ។ តែវា ក៏មានមែនជារឿងដែលពិបាកនោះដែរក្នុងផ្លាស់ ប្តូរប្រសិនអ្នកនយោបាយពិតមានឆន្ទៈគោរពតាមការសម្រេចចិត្ត និងសេចក្តីត្រូវការរបស់ប្រជាពលរដ្ឋ ។ អាចជាលទ្ធផលនៃការចរចារវាងបក្សកាន់អំណាច និងបក្សទើបឈ្នះឆ្នោត ដែលនៅសបា្តហ៍ចុង នៃនីតិកាលសភាចាស់ ក្រោមការដឹកនាំដោយបក្សសហភាពរួបរួម និងការអភិវឌ្ឍ កំពុងតែព្យាយាម ពន្លឿនក្នុងការអនុម័តច្បាប់ជាច្រើនដើម្បីបន្សល់ជាសមិទ្ធផលចុងក្រោយនៃសភាពាក់កណ្តាលយោធា ។ យោងតាមសារព័ត៌មាន The Wall Street Journal រដ្ឋសភាមីយ៉ាន់ម៉ា បាននិងកំពុងអនុម័តច្បាប់ថ្មី ជាច្រើនក្នុងសបា្តហ៍ចុងក្រោយនេះ ដែលច្បាប់ភាគច្រើនផ្តល់ផលប្រយោជន៍ទៅកាន់សភា និងរដ្ឋាភិ បាលយោធាបក្សលោកថេន សេន។ ច្បាប់ទាំងនោះ រួមមានការផ្តល់ប្រាក់សោធននិវត្តន៍ និង សំណើរ ច្បាប់ស្តីការការពារអតីតប្រធានាធិបតីពីការកាត់ទោសលើការប្រព្រឹត្តផ្សេងៗក្នុងពេលកាន់តំណែង។

មិនត្រឹមតែប៉ុណ្ណោះ លោកប្រធានាធិបតី ថេន សេន ថែមទាំងផ្តល់រង្វាន់ចំពោះក្រុមហ៊ុនវិនិយោគក្នុង ប្រទេសមីយ៉ាន់ម៉ាជាច្រើនផ្សេងទៀត ដោយមិនបានឆ្លងកាត់ពីសភា និងប្រឹក្សាពីគណបក្សសម្ព័ន្ធជាតិ ដើម្បីប្រជាធិបតេយ្យ។ សកម្មភាពនេះ គឹជាការបង្កើតសមិទ្ធផលចុងក្រោយ តែបានបំពានទៅនឹងប្រព័ន្ធនយោបាយមីយ៉ាន់ម៉ា ដ្បិតលោក សម្រេចដោយឯកតោភាគី។

២. កេរមរតកចុងក្រោយរបស់លោកថេន សេន សម្រាប់លោកស្រីអ៊ុងសាន ស៊ូជី ជម្លោះឧទ្ទាម
បើទោះបីជាការកសាងសន្តិភាពជាវិស័យអាទិភាពមួយនៃអាណត្តិប្រធានាធិបតីលោក ថេន សេន បញ្ហានេះ នៅតែមិនអាចត្រូវបានបញ្ចប់នោះទេ។ កាលពីមុនថ្ងៃបោះឆ្នោតនៅចុងឆ្នាំ២០១៥ លោក ថេន សេន ក៏បានចុះហត្ថលេខាលើកិច្ចព្រមព្រៀងសន្តិភាពស្តីពីបទឈប់បាញ់ជាមួយនឹងតំណាងជន ជាតិភាគតិចប្រាំបី។ ក៏ប៉ុន្តែនៅមានក្រុមឧទ្ទាមប្រដាប់អាវុធជាច្រើនក្រុមផ្សេងទៀត ដែលរដ្ឋាភិបាល បានបដិសេធក្នុងការចរចា ដ្បិតពួកក្រុមឧទ្ទាមទាំងនោះ ធ្លាប់វាយប្រហារ និងប្រយុទ្ធជាមួយនឹងរដ្ឋា ភិបាល។

ប្រាកដណាស់ក្រៅពីជួបឧបសគ្គក្នុងការរៀបចំក្បាលម៉ាស៊ីនរដ្ឋាភិបាលនៃនីតិកាលថ្មី (បក្សលោកស្រីស៊ូជី មិនទាន់បានកំណត់បេក្ខភាពប្រធានាធិបតី) បក្សលោកស្រី ស៊ូជី ក៏ប្រឈម និងបន្តដោះស្រាយបញ្ហានៃគំរាមពីក្រុមឧទ្ទាមប្រដាប់អាវុធ។ នោះ ក៏ព្រោះតែរដ្ឋាភិបាលអាណត្តិថ្មី គឺកើតចេញពីប្រជាជនស៊ីវិលសុទ្ធសាធ ខណៈភូមិសាស្ត្រនយោបាយមីយ៉ាន់ម៉ា ត្រូវការមេដឹកនាំដែលធា្លប់មានបទពិសោធន៍ផ្នែកយោធាដើម្បីអាចគ្រប់គ្រងស្ថានភាពបានឆាប់រហ័ស។

ជារួម ឧបសគ្គក្នុងការដឹកនាំប្រទេសដែលធ្លាប់តែគ្រប់គ្រងដោយរបបយោធាជាច្រើនទសវត្សរ៍ គឺជា ដែលត្រូវកើតមាន។ ក៏ប៉ុន្តែអ្វីដែលគួរកត់សម្គាល់នោះ របត់នយោបាយលទ្ធិប្រជាធិបតេយ្យមីយ៉ាន់ម៉ា មិនដើរថយនោះទេ ដ្បិតអ្នកនយោបាយ មិនប្រើប្រាស់កម្លាំងយោធាដើម្បីឡើងកាន់អំណាច និង ជាពិសេសនោះ ចេះទទួលសេចក្តីត្រូវការរបស់ប្រជាពលរដ្ឋដែលកើតចេញពីបោះឆ្នោត៕