សហរដ្ឋអាមេរិកបានច្រានចោលការលើកឡើងថា សហរដ្ឋអាមេរិកនឹងចាប់ផ្តើមដំឡើងអាវុធនុយក្លេអ៊ែរឡើងវិញនៅកូរ៉េខាងត្បូង។ កាំជ្រួចនុយក្លេអ៊ែរអាមេរិកដែលឈរជើងការពារកូរ៉េខាងត្បូង ត្រូវបានដកចេញនៅឆ្នាំ ១៩៩១។ ហើយបើមានការដំឡើងអាវុធប្រភេទនេះមែន វានឹងបង្កឲ្យមានការប្រណាំងប្រជែងសព្វាវុធកាន់តែខ្លាំងនៅក្នុងតំបន់ថែមទៀត។
លោក សៅ ផលនិស្ស័យ លម្អិតព័ត៌មាននេះ
នៅថ្ងៃចន្ទ ទី១១មករា ម្សិលមិញនេះ មន្ត្រីអាមេរិកបានថ្លែងថា សហរដ្ឋអាមេរិកកំពុងជជែកជាមួយរដ្ឋាភិបាលកូរ៉េខាងត្បូង ជុំវិញការពង្រាយសព្វាវុធនានា ទៅទប់ទល់កូរ៉េខាងជើង។ តែមន្ត្រីមិនបានបង្ហាញអត្តសញ្ញាណរូបនេះ បានបដិសេធរួចហើយថា អាមេរិកគ្មានគម្រោងដំឡើងអាវុធនុយក្លេអ៊ែរឡើងវិញនៅឧបទ្វីបកូរ៉េឡើយ។
យោងតាមទីភ្នាក់ងារព័ត៌មានReuters រដ្ឋាភិបាលក្រុងវ៉ាស៊ីនតោន បានព្យាយាមគំរាមកូរ៉េខាងជើង ដោយបញ្ជូនយន្តហោះទម្លាក់គ្រាប់ដ៏ល្បីល្បាញសម័យសង្គ្រាមត្រជាក់ B-52 ពីមូលដ្ឋានយោធារបស់ខ្លួនកោះហ្កាម (Guam) ទៅកូរ៉េខាងត្បូងរួច កាលពីថ្ងៃអាទិត្យទី១០ខែមករា។ ហើយយន្តហោះនេះ មានសមត្ថភាពទម្លាក់គ្រាប់បែកនុយក្លេអ៊ែរ ថែមទៀតផង។
មន្ត្រីអាមេរិកដដែលបានអះអាងថា ការដំឡើងអាវុធនុយក្លេអ៊ែរឡើងវិញ អាចនឹងធ្វើឲ្យការប្រណាំងសព្វាវុធកាន់តែខ្លាំង ហើយនឹងជំរុញឲ្យរបបដឹកនាំក្រុងព្យុងយ៉ាង ប្រឹងផលិតអាវុធកាន់តែច្រើន និងបង្កគ្រោះថ្នាក់កាន់តែខ្លាំងផងដែរ។ បើមានការដំឡើងនុយក្លេអ៊ែរវិញមែន វានឹងក្លាយជាការពង្រាយអាវុធយុទ្ធសាស្ត្រដ៏គ្រោះថ្នាក់បំផុត របស់អាមេរិកជាលើក ដំបូង ក្នុងរយៈពេល២៥ឆ្នាំកន្លងមកនេះ។ នេះក៏ដោយសាររដ្ឋបាលលោក George H.W. Bush ទើបសម្រេចដកអាវុធនុយក្លេអ៊ែរពីកូរ៉េក្នុងឆ្នាំ១៩៩១ ក្រោយសង្គ្រាមត្រជាក់បិទបញ្ចប់ទៅប៉ុណ្ណោះ។
ជុំវិញវិធានការឆ្លើយតបកូរ៉េខាងជើងនេះដែរ សហរដ្ឋអាមេរិកបានប្រកាសថា ខ្លួនសហការជិតស្និទ្ធជាមួយកូរ៉េខាងត្បូង និងសម្ព័ន្ធមិត្តដូចជាជប៉ុន ហើយជជែកពីការពង្រាយសព្វាវុធយុទ្ធសាស្ត្រ រួមទាំងប្រព័ន្ធការពារដែនអាកាស និងប្រភេទអាវុធផ្សេងទៀតផងដែរ។ កាលពីសប្តាហ៍មុនដែរ សមាជិកសភាអាមេរិកបានស្នើសុំឲ្យលោក បារ៉ាក់ អូបាម៉ា ពិចារណាពង្រាយប្រព័ន្ធប្រឆាំងមីស៊ីល ស៊េរីទំនើបរបស់ខ្លួនទៅកាន់កូរ៉េខាងត្បូង ដើម្បីធានាសន្តិភាព និងសន្តិសុខតំបន់ ក៏ដូចជាសុវត្ថិភាពអាមេរិកផ្ទាល់ដែរ។
តែក្រសួងការពារជាតិកូរ៉េខាងត្បូង បង្ហើបថាសហរដ្ឋអាមេរិកប្រហែលជាត្រឹមបញ្ជូនយន្តហោះបំបាំងកាយទម្លាក់គ្រាប់នុយក្លេអ៊ែរ B-2នាវាមុជទឹក និងយន្តហោះប្រដេញF-22 មកកូរ៉េខាងត្បូងប៉ុណ្ណោះ។ ក្រៅពីចាប់ផ្តើមបង្កើនសកម្មភាពយោធា និងសព្វាវុធកូរ៉េខាងត្បូង បានចាប់ផ្តើមចាក់ឧបករណ៍ឃោសនាឡើងវិញ និងអាចចាប់ផ្តើមរឹតបន្តឹងរាល់សកម្មភាពនៅតំបន់សេដ្ឋកិច្ច Kaesong ដែលប្រជាជនកូរ៉េខាងជើង ច្រើនពាន់នាក់ធ្វើការ និងរកចំណូលសម្រាប់ទ្រទ្រង់ជីវភាព។
ដោយឡែក ចិនដែលជាមិត្តជិតខាង បានអំពាវនាវឲ្យភាគីពាក់ព័ន្ធបញ្ចៀសការបង្អួតកម្លាំងនិងអាវុធ ដើម្បីទប់ស្កាត់ការប៉ះទង្គិចគ្នាជាយថាហេតុផង។ ចិនមិនសប្បាយចិត្តទេ ពេលដែលអាមេរិក ប្រើឲ្យទ័ពអាកាសបើកយន្តហោះទម្លាក់គ្រាប់បែក B-52 ចុះឡើងនៅកូរ៉េខាងត្បូង កាលពីថ្ងៃអាទិត្យកន្លងទៅនោះ។
ទាក់ទិនការពង្រាយសព្វាវុធទៅឧបទ្វីបកូរ៉េនេះ រដ្ឋាភិបាលកូរ៉េខាងជើងបានចោទប្រកាន់ថា ការពង្រាយសព្វាវុធសហរដ្ឋអាមេរិក ជាការរុញឲ្យស្ថានភាពដែលកំពុងតានតឹងស្រាប់នោះ ឈានទៅរកស្ថានភាពសង្គ្រាម។ បើតាមកាសែតកូរ៉េខាងជើង Rodong Sinmun មេដឹកនាំកំពូលលោក គីម ជុងអ៊ុន បានថ្លែងការពារការបាញ់សាកល្បងអាវុធអ៊ីដ្រូសែន ដោយចាត់ទុកថាវាជាសិទ្ធិស្របច្បាប់ និងស្វ័យការពារប៉ុណ្ណោះ៕