អន្តរជាតិ
×![]()
ដោយ: ថ្មីៗ
ក្រុមចារកម្មម៉ាឡេស៊ីបានបង្ហាញរបាយការណ៍ថ្មីថា ក្មេងម៉ាឡេស៊ីចំនួន៨នាក់ ត្រូវបានគេបង្វឹកដើម្បីក្លាយជាសកម្មប្រយុទ្ធរបស់ក្រុមភេរវជនរដ្ឋឥស្លាមឬក្រុមដែស្ហ (Daesh)។ កន្លងមកអាជ្ញាធរម៉ាឡេស៊ីបានអះអាងប្រជាជនខ្លួនជាច្រើននាក់បានលួចឆ្លងដែនទៅធ្វើសង្គ្រាមសាសនានៅមជ្ឈិមបូព៌ា។
ក្មេងៗជនជាតិម៉ាឡេស៊ីប្រហែល ៨នាក់បានទទួលការហ្វឹកហ្វឺនផ្នែកយោធាពីក្រុមរដ្ឋឥស្លាមឬក្រុមដែស្ហ មុននឹងចាប់ផ្តើមចេញប្រយុទ្ធនៅពេលខាងមុខ។ នេះបើតាមរបាយការណ៍ចារកម្មម៉ាឡេស៊ី ដែលទើបត្រូវគេបញ្ចេញនៅថ្ងៃអង្គារទី ១២ ម្សិលមិញនេះក្នុងវេទិការសន្និសីទសារព័ត៌មាននៅកណ្តាលទីក្រុងកូឡាឡាំពួរ។
ប្រធានគណកម្មការពិសេសទទួលបន្ទុកចារកម្មលោក Mohamad Fuzi Harun បានបញ្ជាក់ថាការស៊ើបអង្កេតពាក់ព័ន្ធបញ្ហានេះកំពុងបន្តដើម្បីចូលឲ្យកាន់តែស៊ីជម្រៅ ជាពិសេសដើម្បីស្វែងយល់ពីជំរំដែលគេជឿជាក់ថាជាទីតាំងស្ថិតនៅប្រទេសស៊ីរី និងអ៊ីរ៉ាក់។ ហើយក្មេងៗម៉ាឡេស៊ីនោះកំពុងស្ថិតក្នុងជំរំនោះ។
លោកថា៖ «ក្មេងទាំងនោះត្រូវបានឪពុកម្តាយរបស់ពួកគេនាំកាន់តំបន់មានសង្គ្រាម ហើយឪពុកម្តាយទាំងនោះចិញ្ចឹមក្មេងដើម្បីឲ្យពួកគេចេញប្រយុទ្ធជាមួយក្រុមដែស្ហនៅពេលធំឡើង»។ ប៉ុន្តែ ទោះមានការបកស្រាយជុំវិញការនាំក្មេងទៅបង្វឹកឲ្យកា្លយជាភេរវករនេះក៏ដោយ ក៏គេមិនបញ្ជាក់ច្បាស់ថា ក្មេងទាំងនោះមានវ័យប៉ុន្មានខ្លះឡើយ។
ត្រលប់មកវិញ មន្ត្រីម៉ាឡេស៊ីខាងលើក៏បានបង្ហើបផងដែរថា ប្រជាជនម៉ាឡេស៊ីបច្ចុប្បន្នប្រហែល ៤៧នាក់បានរត់ទៅចូលរួមចលនាក្រុមដែស្ហ ក្នុងនោះមាន ១២នាក់ជាស្ត្រីផង។ ហើយអាជ្ញាធរម៉ាឡេស៊ីកំពុងប្រឹងប្រែងដើម្បីនាំយកពួកគេមកផ្ទះសម្បែងវិញផងដែរ។ ប៉ុន្តែជានិច្ចជាកាលពួកគេបានបដិសេធការនាំពួកគេត្រលប់មកវិញ។ ប្រជាជនទាំងនោះភាគច្រើនមានគោលបំណងតែមួយគត់គឺ ប្រយុទ្ធនិងស្លាប់ក្នុងនាមជាអ្នកការពារសាសនា។
កាលពីខែមុន ប៉ូលិសម៉ាឡេស៊ីក៏បានព្រមានផងដែរថា ក្មេងៗ ជាយុវជនចំនួន២នាក់បានទទួលការបង្វឹកឲ្យក្លាយជាក្រុមភេរជនជំនាន់ក្រោយនៅបរទេស ហើយគេធ្លាប់ឃើញខ្សែរអាត់វីដេអូមួយបានបង្ហាញច្បាស់ថាពួកគេបានហ្វឹកហាត់ជំនាញយោធា និងបានស្បថបង្ហាញភក្តីភាពចំពោះមេដឹកនាំក្រុមរដ្ឋឥស្លាមរួចទៅហើយ។ ក្រៅពីបារម្ភរឿងការនាំក្មេងទៅបង្វឹកនៅបរទេស អាជ្ញាធរម៉ាឡេស៊ីបង្ហាញក្តីបារម្ភខ្លាំងផងដែរ ព្រោះជំរំបង្វឹកក្មេងឲ្យទៅជាភេរវជនដូចគ្នានេះអាចនឹងមាននៅម៉ាឡេស៊ីថែមទៀត បើគ្មានចំណាត់ការត្រឹមត្រូវ៕
Tag:
ក្រុមរដ្ឋឥស្លាម
ម៉ាឡេស៊ី
© រក្សាសិទ្ធិដោយ thmeythmey.com
«ប្រទានកម្ម»មានន័យដូចម្តេច?
5 ម៉ោង
