អន្តរជាតិ
បុរសដូរភេទបន្តចំណាយលុយថែមទៀតដើម្បីឲ្យបានមុខមាត់ស្អាត
× ការផ្លាស់ប្តូរមុខមាត់រាងកាយ ហាក់ដូចជាពិបាកខ្លាំងណាស់ ប៉ុន្តែ Fulvia Pellegrino បុរសជនជាតិអ៊ីតាលីម្នាក់ដែលបានប្តូរភេទទៅជានារី ត្រៀមចំណាយលុយដ៏ច្រើនសន្ធឹកដើម្បីទទួលបានភាពស្រស់ស្អាត។ ឈានដល់វ័យ៥៦ឆ្នាំ Fulvia បានចំណាយប្រាក់ជាង៧៥០០០ដុល្លាររួចហើយក្នុងការវះកាត់ប្តូររូបរាងខ្លួនទៅជាមនុស្សស្រី ក្រោមការគាំទ្រពីសំណាក់ភរិយា។ នេះបើតាមការផ្សាយរបស់គេហទំព័រ Non Stop Zapping ។
«ខ្ញុំមិនទាន់ពេញចិត្តជាមួយនឹងខ្លួនប្រាណរបស់ខ្ញុំនាពេលបច្ចុប្បន្ននេះឡើយ ពីព្រោះវាមិនទាន់ស្អាតឥតខ្ចោះ»។ Fulvia Pellegrino បានបញ្ជាក់យ៉ាងដូច្នោះ ហើយគេបានអះអាងថា ត្រៀមចំណាយលុយសន្ធឹកសន្ធាប់ដើម្បីទទួលខ្លួនប្រាណសក្តិសមជាងនេះ ក្នុងភាពជាស្ត្រី។
ជាជំហានដំបូង Fulvia បានចំណាយប្រាក់ជាង៧៥០០០ដុល្លាររួចហើយក្នុងការវះកាត់ភ្លៅ ដើមទ្រូង និងការចាក់មាត់ បបូរមាត់ជាដើម។ បុរសប្តូរភេទរូបនេះ បានបញ្ជាក់ថា ខ្លួនចង់បានរូបរាងដូច Allanah Starr ដែលជាតារាសម្តែងភាពយន្តអាសអាភាសម្នាក់ដ៏ស្រស់ស្អាត បន្ទាប់ពីបានប្តូរភេទទៅជានារី។
អ្វីដែលគួរឲ្យកត់សម្គាល់នោះ បំណងរបស់ Fulvia ទទួលបាននូវការគាំទ្រយ៉ាងខ្លាំងពីសំណាក់អ្នកស្រី Marisa ដែលជាភរិយា ដោយអ្នកទាំងពីរសុខចិត្តបន្តរស់នៅជាមួយដូចជាបងប្អូនស្រីទៅវិញ។ «ខ្ញុំបានកើតក្នុងគ្រួសារមួយដែលមិនសូវមានការបើកចំហរ ពោលគឺប្រពៃណី និងសាសនានិយម។ ខ្ញុំមិនអាចប្រាប់ឪពុករបស់ខ្ញុំនោះឡើយ គាត់មានកូនប្រុស៣នាក់ទាំងរូបខ្ញុំ»។ នេះបើយោងតាមសម្តីរបស់ Fulvia ដែលដកស្រង់ដោយ The Mirror ។
Fulvia បានអះអាងបន្ថែមថា រូបគេមានអារម្មណ៍ចង់ប្តូរភេទតាំងពីអាយុ១៥ឆ្នាំមកម្ល៉េះ ប៉ុន្តែដោយគ្មានការគាំទ្រពីគ្រួសារទើបគេបង្ខំចិត្តលាក់ពីគោលបំណងនេះ រហូតដល់រៀបការ។ ជាង១០ឆ្នាំកន្លងមកនេះ Fulvia បានខិតខំយ៉ាងខ្លាំងក្នុងការកែប្រែខ្លួនឲ្យទៅជាមនុស្សស្រីពេញលក្ខណៈ ហើយបើទោះបីជាឪពុករបស់គេ ជំរុញឲ្យទៅមន្ទីរពេទ្យចិត្តសាស្ត្រក៏ដោយ។
ជនប្តូរភេទរូបនេះ បានអះអាងថា៖ «នៅពេលឪពុកខ្ញុំស្លាប់ សាច់ញាតិជាច្រើនបានរារាំងខ្ញុំមិនឲ្យទៅបុណ្យសព ដោយសារតែពួកគេគិតថាខ្ញុំផ្តល់ភាពអាមាសដល់គ្រួសារ លើកលែងតែបងប្រុសខ្ញុំទាំងពីរប៉ុណ្ណោះដែលទទួលយកខ្ញុំ។ បច្ចុប្បន្នអ្វីដែលអាចដំណើរការទៅមុខ គឺដោយសារតែមានការជ្រោមជ្រែងពីភរិយាខ្ញុំ គិតយល់អារម្មណ៍ខ្ញុំណាស់»៕
© រក្សាសិទ្ធិដោយ thmeythmey.com