អន្តរជាតិ
រត់១៧០០០គីឡូម៉ែត្រពី Vancouver ទៅ Buenos Aires ដើម្បីគាំទ្រដល់សកម្មភាពសប្បុរសធម៌
×
លោក Jamie Ramsey ធ្វើរឿងដ៏គួរឲ្យកត់សម្គាល់ក្នុងជីវិត ដោយបុរសជនជាតិអង់គ្លេសវ័យ៣៥ឆ្នាំរូបនេះ បានប្រើពេល១៧ខែ ក្នុងការរត់ពីទីក្រុង Vancouver ប្រទេសកាណាដា ទៅកាន់ក្រុង Buenos Aires ប្រទេសអាហ្សង់ទីនលើចម្ងាយផ្លូវ១៧០០០គីឡូម៉ែត្រ។ គោលដៅរបស់លោកគឺដើម្បីរៃអង្គាសជួយដល់អង្គការចំនួន៣ដែលធ្វើការងារសប្បុរសធម៌។
លោក Jamie Ramsey ដែលមានរហស្សនាមថា «British Forrest Gump» ដូចជាតួអង្គនៅក្នុងភាពយន្តអាមេរិក «Forrest Gump» បានវិលត្រឡប់ទៅកាន់ទីក្រុងឡុងដ៍វិញ កាលពីថ្ងៃទី១០ ខែមករា ឆ្នាំ២០១៦ បន្ទាប់ពីបញ្ចប់ការរត់ចម្ងាយ១៧០០០គីឡូម៉ែត្រ។
ចាប់ផ្តើមពីខែសីហា ឆ្នាំ២០១៤ លោក Jamie បានរត់ចាកចេញពីក្រុង Vancouver ប្រទេសកាណាដា ឆ្ពោះទៅកាន់ក្រុង Buenos Aires ប្រទេសអាហ្សង់ទីន ដោយគោលបំណងដ៏ធំបំផុតរបស់លោក គឺដើម្បីស្វែងរកមូលនិធិសប្បុរសធម៌ជូនដល់អង្គការចំនួន៣ ក្នុងនោះមាន CALM (Campaign Against Living Miserably) ដែលធ្វើការងារទប់ស្កាត់ការធ្វើអត្តឃាត អង្គការ Macmillan Cancer ដែលប្រយុទ្ធប្រឆាំងនឹងជំងឺមហារីក និង WaterAid ដែលមានទិសដៅពង្រីកប្រភពទឹកស្អាត។
បុរសចិត្តធម៌រូបនេះ បានចំណាយពេលសរុប៤៧២ថ្ងៃ ដោយរត់ចេញពីក្រុង Vancouver ឆ្ពោះទៅកាន់ក្រុង Buenos Aires។ បើតាមការផ្សាយរបស់សារព័ត៌មាន Telegraph លោក Jamie បានឆ្លងកាត់ប្រទេសចំនួន១៤ គោលដៅចំនួន៣៦៧កន្លែង និងពីអាមេរិកខាងជើងទៅអាមេរិកខាងត្បូង។ លោកបានបញ្ជាក់ថា៖ «រៀងរាល់ថ្ងៃ ខ្ញុំបានរត់លើចម្ងាយប្រមាណ៤០គីឡូម៉ែត្រដែលប្រហាក់ប្រហែលនឹងចម្ងាយម៉ារ៉ាតុនយ៉ាងដូច្នោះដែរ»។
កាលពីឆ្នាំ២០១៤ លោក Jamie បាននិយាយនៅក្នុងបទសម្ភាសមួយថា ការរត់ចម្ងាយ១៧០០០គីឡូម៉ែត្រដើម្បីសកម្មភាពសប្បុរសធម៌នេះ គឺជាក្តីសុបិន្តរបស់លោកតាំងពីអាយុ១២ឆ្នាំមកម្ល៉េះ។ នៅក្នុងការរត់ដែលមានការគាំទ្រពីឪពុកម្តាយផងដែរនោះ Jamie បានប្រើប្រាស់ស្បែកជើងយ៉ាងហោចណាស់១៧គូ ហើយស្បែកជើងទាំងនោះ សុទ្ធតែមានសភាពដាច់ដោច។
ដំណើរផ្សងព្រេងនេះ នាំឲ្យលោកបាត់បង់ការងារផងដែរ ប៉ុន្តែលោកមិនមានការសោកស្តាយនោះឡើយ ហើយចងចាំពាក្យម្តាយជានិច្ចដែលថា «ជីវិតដូចជាប្រអប់សូកូឡា យើងមិនដឹងថាធ្លាក់ចុះនៅពេលណានោះឡើយ»៕
© រក្សាសិទ្ធិដោយ thmeythmey.com