អន្តរជាតិ
នយោបាយអន្តរជាតិ
×![]()
នៅថ្ងៃសៅរ៍នេះប្រជាជនតៃវ៉ាន់ព្រោងព្រាតចេញទៅបោះឆ្នោតជ្រើសរើសសមាជិកសភានិងប្រធានាធិបតីថ្មីរបស់ខ្លួន។ ឯក្រុងប៉េកាំង ឯណោះវិញកំពុងទន្ទឹងរង់ចាំមើលលទ្ធផលទាំងអន្ទះសារព្រោះបក្សប្រឆាំងមានប្រៀបជាងបក្សកាន់អំណាចគូមីងតាំងបច្ចុប្បន្ន។
ការបោះឆ្នោតនៅតៃវ៉ាន់ចាប់ផ្តើមដំណើរការនៅថ្ងៃសៅរ៍នេះហើយដើម្បីឈានទៅរើសមេដឹកនាំថ្មី។ គណបក្សកាន់អំណាចគូមីងតាំងហាក់បីដូចជាធ្លាក់ប្រជាប្រិយភាពក្នុងការបោះឆ្នោតលើកនេះ ខណៈដែលគណបក្សប្រឆាំងប្រជាធិបតេយ្យជឿនលឿនអាចនឹងមានលទ្ធភាពកាន់កាប់អាសនៈច្រើននិងអាចដណ្តើមកៅអីប្រធានាធិបតីបានទៀត។
ការប្រណាំងប្រជែងរកសំឡេងឆ្នោតនៅតៃវ៉ាន់នេះ បានធ្វើឲ្យមហាយក្សចិនដែលតែងអះអាងថា តៃវ៉ាន់ជាកោះរបស់ខ្លួននោះ ដេកមិនលក់បក់មិនល្ហើយសោះ។ បើបក្សប្រឆាំងឈ្នះឆ្នោត វាប្រាកដហើយថា នយោបាយការបរទេសក្រុងតៃប៉ិកក៏នឹងផ្លាស់ប្តូរដែរ។ ចំណែកសហរដ្ឋអាមេរិកដែលជាសម្ព័ន្ធមិត្តតៃវ៉ាន់ បានបង្ហាញក្តីបារម្ភខ្លាំងដែរជុំវិញអនាគតនៃទំនាក់ទំនងតៃវ៉ាន់និងចិន នៅក្រោយការបោះឆ្នោត។
ទាក់ទិនបញ្ហាតៃវ៉ាន់ដែរ កាលពីចុងឆ្នាំមុន រដ្ឋបាលលោក បារ៉ាក់ អូបាម៉ា បានសម្រេចជាចុងក្រោយដោយលក់អាវុធក្នុងតម្លៃ ១.៨៣ពាន់លានដុល្លារឲ្យតៃវ៉ាន់ ដោយមិនស្តាប់សំឡេងជំទាស់របស់ចិន ហើយចិនក៏ក្តៅក្រហាយខ្លាំងមិនតិចដែរ។
គេរំពឹងថាប្រធានបក្សប្រឆាំងលោកស្រី Tsai Ing-wen អាចមានលទ្ធភាពខ្ពស់ក្នុងការឈានទៅកាន់កាប់តំណែងខ្ពស់បំផុត តែស្មុគស្មាញនិងគ្រោះថ្នាក់បំផុត។នោះគឺតំណែងប្រធានាធិបតីនេះឯង។ នេះក៏ដោយសារការសម្រេចចិត្តណាមួយលើគោលនយោបាយការបរទេសតៃវ៉ាន់ដែលប្រឆាំងចិន អាចបណ្តាលឲ្យបញ្ហាធំកើតឡើង។ ដូចឃើញស្រាប់ហើយ ចិនដំឡើងកាំជ្រួចមីស៊ីលរាប់រយដើមតម្រង់មកកោះតៃវ៉ាន់ ចាប់តាំងពីរដ្ឋាភិបាលជាតិនិយមបក្សគូមីងតាំងចាញ់សង្គ្រាមប្រឆាំងទ័ពកុម្មុយនីស្តលោក ម៉ៅសេទុងម្ល៉េះ។
បើលោកស្រី Tsai ជាប់ឆ្នោតមែនលោកស្រីក៏នឹងក្លាយជាប្រធានាធិបតីស្រី្តទីមួយនៅតៃវ៉ាន់ដែរ។ ប៉ុន្តែលោកស្រីហាក់បីដូចជាកំពុងផ្សងគ្រោះថ្នាក់ដោយបង្ហាញជំហរនិងនយោបាយប្រឆាំងចិនឥតលាក់លៀម។ តាមស្ថានភាពជាក់ស្តែង លោកស្រីមានមហិច្ឆតាចង់ប្រកាសឯករាជ្យដាច់ណាត់ពីចិន និងផ្លាស់ប្តូរចំណងការទូតល្អជាមួយចិនដែលប្រធានាធិបតីតៃវ៉ាន់ជិតផុតអាណត្តិខំប្រឹងសាងមកផង។
ប៉ុន្តែស្ថានភាពគ្រោះថ្នាក់សម្រាប់តៃវ៉ាន់ បើរដ្ឋាភិបាលថ្មីហ៊ានអនុវត្តគោលនយោបាយប្រឆាំងប្រយោជន៍ចិន ព្រោះថា ក្រោមការដឹកនាំរបស់លោក ស៊ី ជិនពីង ចិនកាន់តែឡើងឬទ្ធិនិងកោងកាចខ្លាំង។ រដ្ឋបាលលោក ស៊ី ជិនពីង ប្រឹងប្រែងអនុវត្តគោលនយោបាយទំនើបកម្មយោធា ដើម្បីពង្រឹងអំណាចនិងឥទ្ធិពលយោធារបស់ចិន។ ចិនប្រហែលជានឹងមិនខ្លាចប្រើប្រាស់កម្លាំងប្រឆាំងតៃវ៉ាន់ឡើយ។
ម្យ៉ាងទៀត មិនត្រឹមតែរងការគំរាមកំហែងផ្នែកយោធាប៉ុណ្ណោះទេ តៃវ៉ាន់ក៏នឹងជួបបញ្ហាសេដ្ឋកិច្ចធ្ងន់ធ្ងរផងដែរ បើសិនជាហ៊ានធ្វើឲ្យចិនខឹង។ កុំភ្លេចថា តៃវ៉ាន់បច្ចុប្បន្នកំពុងប្រឈមបញ្ហាសេដ្ឋកិច្ចស្រាប់ ហើយប្រទេសនេះក៏ពឹងផ្អែកខ្លាំងលើការនាំចេញនិងវិនិយោគខាងក្រៅដែរ។ តៃវ៉ាន់មិនអាចភ្លេចទេថា ចិនជាទីផ្សារដ៏ធំសម្រាប់ផលិតផលខ្លួន ហើយចិនក៏ជាទិសដៅវិនិយោគសំខាន់របស់តៃវ៉ាន់ដូចគ្នាដែរ។
ម្យ៉ាងទៀត មិនត្រឹមតែរងការគំរាមកំហែងផ្នែកយោធាប៉ុណ្ណោះទេ តៃវ៉ាន់ក៏នឹងជួបបញ្ហាសេដ្ឋកិច្ចធ្ងន់ធ្ងរផងដែរ បើសិនជាហ៊ានធ្វើឲ្យចិនខឹង។ កុំភ្លេចថា តៃវ៉ាន់បច្ចុប្បន្នកំពុងប្រឈមបញ្ហាសេដ្ឋកិច្ចស្រាប់ ហើយប្រទេសនេះក៏ពឹងផ្អែកខ្លាំងលើការនាំចេញនិងវិនិយោគខាងក្រៅដែរ។ តៃវ៉ាន់មិនអាចភ្លេចទេថា ចិនជាទីផ្សារដ៏ធំសម្រាប់ផលិតផលខ្លួន ហើយចិនក៏ជាទិសដៅវិនិយោគសំខាន់របស់តៃវ៉ាន់ដូចគ្នាដែរ។
បើងាកមកមើលបក្សកាន់អំណាចវិញម្តង លោក Eric Chu ប្រធានបក្សគូមីងតាំងទំនងជាមិនអាចមានវាសនាកាន់តំណែងប្រធានាធិបតីទេ។ គណបក្សគូមីងតាំង ធ្លាក់ប្រជាប្រិយភាពដោយសារគោលនយោបាយរណបចិនដីគោក ហើយប្រជាជនតៃវ៉ាន់ខ្លាចថា ការស្អិតល្មួតនេះអាចនឹងនាំឲ្យមានការរួបរួមគ្នាជាមួយចិនវិញដែរ។ ជំនួបរវាងប្រធានាធិបតីចិនលោក ស៊ី ជិនពីង ជាមួយលោក Ma Ying-jeou កាលពីចុងឆ្នាំមុន បង្ហាញយ៉ាងច្បាស់ពីគោលនយោបាយរដ្ឋាភិបាលតៃវ៉ាន់ចំពោះចិន ហើយវាក៏ជាក្តីបារម្ភរបស់ប្រជាជនតៃវ៉ាន់និងបក្សប្រឆាំងដែរ។ ពាក់ព័ន្ធបញ្ហាសេដ្ឋកិច្ចវិញ បក្សកាន់អំណាចនេះក៏មិនអាចជួយដោះស្រាយបញ្ហាសេដ្ឋកិច្ចដែលតៃវ៉ាន់កំពុងប្រឈមបច្ចុប្បន្នដែរក្នុងរយៈពេលប៉ុន្មានឆ្នាំមកនេះ៕
© រក្សាសិទ្ធិដោយ thmeythmey.com
