អន្តរជាតិ
នយោបាយជាតិ
ចន ឃឺរីមកទស្សនកិច្ចកម្ពុជា មុនទៅជជែករឿងនុយក្លេអ៊ែរកូរ៉េខាងជើងជាមួយចិន
× ប្រមុខការទូតអាមេរិក ចន ឃឺរីនឹងបំពេញទស្សនកិច្ចនៅកម្ពុជានៅថ្ងៃ ២៦ខែមករាខាងមុខ។ លោក ឃឺរី នឹងជួបជជែកពិភាក្សាជាមួយនាយករដ្ឋមន្ត្រីកម្ពុជាសម្តេច ហ៊ុន សែន និងសមភាគីលោករដ្ឋមន្ត្រីការបរទេសកម្ពុជាលោក ហោ ណាំហុង ជុំវិញកិច្ចប្រជុំពិសេសអាមេរិក-អាស៊ានដែលនឹងត្រូវរៀបចំឡើងនៅកាលីហ្វរនីញ៉ាពាក់កណ្តាលខែកុម្ភៈខាងមុខ។
យោងតាមសេចក្តីប្រកាសព័ត៌មានក្រសួងការបរទេសអាមេរិកចេញនៅថ្ងៃសុក្រទី១៥មករា ម្សិលមិញ រដ្ឋមន្ត្រីការបរទេសអាមេរិកលោក ចន ឃឺរី នឹងអញ្ជើញមកទស្សនកិច្ចនៅកម្ពុជានៅថ្ងៃ ២៦ មករាខាងមុខនេះ។ ប្រមុខការទូតអាមេរិករូបនេះនឹងចូលជួបពិភាក្សាជាមួយប្រមុខរដ្ឋាភិបាលកម្ពុជាសម្តេច ហ៊ុន សែន ជុំវិញកិច្ចប្រជុំកំពូលអាស៊ាន អាមេរិក ដែលនឹងត្រូវរៀបចំឡើងនៅក្នុងទឹកដីកាលីហ្វរនីញ៉ា សហរដ្ឋអាមេរិកនៅថ្ងៃ ១៥ ដល់ថ្ងៃ ១៦ កុម្ភៈខាងមុខនេះ។
កិច្ចប្រជុំកំពូលនេះត្រូវរៀបចំឡើងដើម្បីរឹតបន្តឹងចំណងការទូតនិងមិត្តភាពរវាងអាមេរិកនិងអាស៊ាន ក្រោយពេលភាគីទាំងពីរសម្រេចដំឡើងកម្រិតការទូតដល់ដៃគូយុទ្ធសាស្ត្រក្នុងកិច្ចប្រជុំកំពូលអាស៊ានអាមេរិកនៅក្នុងប្រទេសម៉ាឡេស៊ីចុងឆ្នាំមុន។ ហើយកាលនោះលោក បារ៉ាក់ អូបាម៉ា ក៏បានដាក់សំណើរសុំរៀបចំកិច្ចប្រជុំអាមេរិក និងមេដឹកនាំអាស៊ានទាំងនៅអាមេរិកផងដែរ មុនពេលលោកចប់អាណត្តិ។
យ៉ាងណាក៏ដោយ ទស្សនកិច្ចរបស់លោក ឃឺរី មកកាន់តំបន់អាស៊ីអាគ្នេយ៍ កើតឡើងក្នុងពេលដែលសហគមន៍សេដ្ឋកិច្ចអាស៊ានចេញរូបរាងនិងពេលដែលឡាវក្លាយជាប្រធានអាស៊ានផង។ ម្យ៉ាងវិញទៀត ទស្សនកិច្ចនេះកើតឡើងក្រោយពេលដែលកូរ៉េខាងជើងបាញ់សាកល្បងអាវុធអ៊ីដ្រូសែនដោយជោគជ័យ។
យោងតាមសេចក្តីប្រកាសព័ត៌មានដដែល មុនមកដល់កម្ពុជា លោក ឃឺរី អញ្ជើញទៅទស្សនកិច្ចនៅប្រទេសស្វីស អារ៉ាប៊ីសាអូឌីត និងឡាវ។ ហើយបន្ទាប់ពីចាកចេញពីកម្ពុជាលោក នឹងបន្តដំណើរទៅកាន់ប្រទេសចិនដើម្បីបន្តពិភាក្សាជាមួយសមភាគីចិន និងស្វះស្វែងរកអន្តរាគមន៍របស់ចិនក្នុងការដោះស្រាយបញ្ហានុយក្លេអ៊ែរកូរ៉េខាងជើងផង។ ចិនបានប្រកាសថាខ្លួននឹងសហការជាមួយកូរ៉េខាងត្បូងនិងអាមេរិក ដើម្បីដោះស្រាយបញ្ហានុយក្លអ៊ែរកូរ៉េខាងជើងផងដែរកន្លងមក។
ចំណែកក្នុងទស្សនកិច្ចរបស់លោក នៅប្រទេសអារ៉ាប៊ីសាអូឌីត លោក ឃឺរី ប្រហែលជានឹងជជែកជាមួយមេដឹកនាំអារ៉ាប៊ីសាអូឌីត ពីបញ្ហាជម្លោះការទូតជាមួយអ៊ីរ៉ង់ផង។ នេះក៏ដោយសារបញ្ហាជម្លោះនេះ បង្កផលប៉ះពាល់ដល់ការអនុវត្តកិច្ចព្រមព្រៀងនុយក្លេអ៊ែរអ៊ីរ៉ង់ និងកិច្ចព្រមព្រៀងសន្តិភាពស៊ីរីផងដែរ៕
© រក្សាសិទ្ធិដោយ thmeythmey.com