ជាតិ
×![]()
ជាគោលការណ៍ សន្និបាតបញ្ញវន្តពិភពលោកត្រូវប្រព្រឹត្តទៅជាភាសាអង់គ្លេស ប៉ុន្តែវាគ្មិនក៏អាចជ្រើសរើសនិយាយជាភាសាខ្មែរ ឬភាសាផ្សេងក៏បាន។ នេះបើតាមការបញ្ជាក់របស់លោក ម៉ៅ ស្រេង អភិបាលនៃសន្និបាតបញ្ញវន្តពិភពលោក និងជានាយក idp Education ដែលជាអ្នករៀបចំសន្និបាតនេះ។ គេអាចចុះឈ្មោះចូលរួមវេទិកាអន្តរជាតិនេះតាមរយៈគេហទំព័រ www.cambodiaGA.org
នេះជាឆ្នាំទី២ហើយ ដែលសន្និបាតបញ្ញវន្តពិភពលោកត្រូវបានរៀបចំឡើងនៅប្រទេសកម្ពុជាដោយមានវត្តមានបញ្ញវន្ត និងឥស្សរជនខ្មែរ និងបរទេសចូលរួម។ វាគ្មិនជាតិ និងអន្តរជាតិជាង៦០រូប នឹងចែករំលែកទ្រឹស្តី និងពិសោធន៍ការងារជាមួយអ្នកចូលរួមយ៉ាងហោចណាស់៥០០នាក់ នៅសណ្ឋាគារ Intercontinental នៅថ្ងៃទី២៩ និង៣០ខែមករានេះ។ ព្រឹត្តិការណ៍នេះនឹងដំណើរការជាភាសាអង់គ្លេស។
លោក ម៉ៅ ស្រេង នាយក idp education បានពន្យល់អំពីមូលហេតុដែលព្រឹត្តិការណ៍សន្និបាតបញ្ញវន្តពិភពលោកត្រូវរៀបចំ ជាភាសាអង់គ្លេសយ៉ាងដូច្នេះ៖«យើងត្រូវរៀបចំជាភាសាអង់គ្លេសពីព្រោះ៖ ទីមួយ សន្និបាតបញ្ញវន្តពិភពលោក គឺជាវេទិកាអន្តរជាតិមួយ។ ទីពីរ តាមរយៈវេទិកាជាអន្តរជាតិនេះ វាគឺជាភស្តុតាងដែលបង្ហាញអំពីឧត្តមភាពនៃគុណភាពជាអន្តរជាតិនៃធនធានមនុស្សរបស់កម្ពុជា»។
អ្នកចូលរួមជាង៥០០នាក់ និងវាគ្មិនជាង៦០នាក់ ដែលមកពីរដ្ឋាភិបាល វិស័យឯកជនទាំងក្នុងស្រុក និងថ្នាក់តំបន់ សង្គមស៊ីវិល ស្ថានទូត នឹងជជែកអំពីការប្រឈម និងការរីកចម្រើនក្នុងវិស័យសំខាន់ៗនៅកម្ពុជាដូចជា សុខភាពសាធារណៈ អប់រំ អាជីវកម្ម ជំនាញវិជ្ជាជីវៈ ប្រព័ន្ធផ្សព្វផ្សាយ និងទំនាក់ទំនង ជាដើម។
វេទិកានេះ ក៏ជាឱកាសនៃការភ្ជាប់ទំនាក់ទំនងគ្នារវាងអតីតនិស្សិតខ្មែរមកពីបរទេស រវាងនិស្សិត និងវិស័យឯកជន។ ក្រៅពីនិស្សិតដែលបញ្ចប់ការសិក្សានៅកម្ពុជា វេទិកានេះក៏ជាទីកន្លែងនៃការប្រមូលផ្តុំអតីតនិស្សិតមកពី អូស្ត្រាលី ណូវែលហ្សេឡង់ កាណាដា ចក្រភពអង់គ្លេស សហរដ្ឋអាមេរិក ជប៉ុន បារាំង ។ល។
Tag:
idp
ម៉ៅ ស្រេង
© រក្សាសិទ្ធិដោយ thmeythmey.com
