ជាតិ
នយោបាយជាតិ
អ្នកបោកប្រាស់ ហ៊ុន សែន បាន មិនទាន់កើតពីផ្ទៃម្តាយនៅឡើយទេ!
× ក្រោយពីអានអត្ថបទរបស់កាសែតថៃចុះផ្សាយប្រសាសន៍របស់គ្រូទាយថៃ ដែលនិយាយថា គណបក្សសង្គ្រោះជាតិ ជួបគ្រោះធំ បាក់ឆ្អឹងខ្នង និងមេដឹកនាំបក្សនេះ ចង់បោកប្រាស់សម្តេច ហ៊ុន សែន នោះ ប្រមុខរដ្ឋាភិបាល បានបង្ហាញការជឿជាក់យ៉ាងខ្លាំងលើការទស្សន៍ទាយនេះ។
នៅលើគណនីហ្វេសប៊ុករបស់ខ្លួននៅថ្ងៃនេះ សម្តេច ហ៊ុន សែន បានសរសេរថា នាពេលបច្ចុប្បន្ននេះ អ្នកបោកប្រាស់លោកបាន នៅមិនទាន់កើតនោះទេ។ ការអះអាងរបស់លោកនាយករដ្ឋមន្ត្រីបែបនេះ ធ្វើឡើងបន្ទាប់ពីខ្លួនបានអានអត្ថបទទាក់ទងនឹងបញ្ហានយោបាយខ្មែររបស់កាសែតថៃ ដែលដកស្រង់សម្តីគ្រួទាយថៃមកចុះផ្សាយកាលពីខែកញ្ញា ឆ្នាំ ២០១៥ ។ «ខ្ញុំឆ្លៀតអាន ក៏ប្រទះឃើញចំណុចអ្នកនយោបាយខ្លះចង់បោកខ្ញុំ តែត្រូវខ្ញុំដឹងក៏វាយបំផ្លាញចោលវិញនូវល្បិចដ៏អាក្រក់នោះ។ ត្រូវមហាសែនត្រូវលើចំណុចនេះ»។ បន្ទាប់ពីលើកឡើងដូច្នេះ សម្តេច ហ៊ុន សែន បន្តបរិយាយយ៉ាងនេះ៖«សូមផ្តាំផ្ញើទៅផងថា អ្នកបោកប្រាស់ ហ៊ុន សែន បាន មិនទាន់កើតពីផ្ទៃម្តាយនៅឡើយទេ ហើយសូមកុំប្រាថ្នាបោកប្រាស់តទៅទៀត។ បើចង់លេងជាមួយ ហ៊ុន សែន គឺសុំតែការស្មោះត្រង់ប៉ុណ្ណោះ»។
ជាមួយគ្នានេះ ប្រមុខបក្សប្រជាជនកម្ពុជារូបនេះ ក៏បង្ហោះអត្ថបទជាភាសារថៃ និងភាសាខ្មែរ ដើម្បីឲ្យពលរដ្ឋខ្មែរអាន ហើយប្រៀបធៀបជាមួយសភាពការណ៍ដែលបាន និងកំពុងកើតឡើងនៅកម្ពុជា។ ចំណុចសំខាន់ដែលលោកនាយករដ្ឋមន្ត្រីចាប់អារម្មណ៍នៅក្នុងអត្ថបទរបស់កាសែតថៃ ដែលដកស្រង់សម្តីគ្រូទាយថៃនោះ បានលើកឡើងថា «លោក កឹម សុខា មើលងាយសមត្ថភាពដ៏ខ្លាំងក្លា ប្រកបដោយថាមពល និងភាពប៉ិនប្រសប់របស់លោក ហ៊ុន សែន ក្នុងការដឹកនាំរបស់ប្រទេសជាតិ។ មានពេលខ្លះ លោក សម រង្ស៊ី និងលោក កឹម សុខា ចង់ប្រើស្នៀតបំភ័ន្ត បំភ្លើស ដោយលើកយកបញ្ហាជាច្រើនមកបន្លំ ផ្លាស់ប្តូរស្នៀតពីមួយទៅមួយ ប៉ុន្តែលោក ហ៊ុន សែន ងាយនឹងមើលឃើញពីការបង្វេរសាច់រឿងនោះ និងដឹងពីចំណុចខ្សោយរបស់ពួកគេ ក៏វ៉ៃបំបាក់បានមុន បានធ្វើឲ្យថ្នាក់ដឹកនាំបក្សប្រឆាំង គ្មានអ្វីក្រៅពីទទួលភាពបរាជ័យផ្ទួនៗ ងើបមុខមិនរួច»។
ទាក់ទងនឹងជំនឿរបស់សម្តេច ហ៊ុន សែន លើគ្រូទាយថៃនេះ លោក សូ ចន្ថា អ្នកវិភាគស្ថានការណ៍នយោបាយយល់ថា លោកនាយករដ្ឋមន្ត្រី ហ៊ុន សែន ចង់អួតថា ខ្លួនឯងខ្លាំង ខ្លួនពូកែមើលឃើញពីល្បិចគូប្រគួត ពីព្រោះតែប្រជាពលរដ្ឋខ្មែរភាគច្រើនជឿលាក់អបិយជំនឿ។« ក្នុងនាមអ្នកនយោបាយ និងក្នុងនាមជានាយករដ្ឋមន្ត្រី មិនគួរលើកយកបញ្ហាជំនឿលើគ្រូទាយ ដែលជាអបិយជំនឿយកមកនិយាយនោះទេ។ អ្នកនយោបាយ គួរតែនិយាយផ្អែកលើវិទ្យាសាស្ត្រនយោបាយ ភាពប្រាកដនិយម ជាជាងជឿលើគ្រូទាយ ហើយជាជនជាតិបរទេសទៀត»។ នេះជាការអត្ថាធិប្បាយរបស់អ្នកវិភាគខាងលើ៕
© រក្សាសិទ្ធិដោយ thmeythmey.com