លោក ហង់ ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា បានក្លាយជាប្រធានថ្មីរបស់ខេមរសហព័ន្ធតេក្វាន់ដូក្នុងការដឹកនាំអាណត្តិទី៥ ឆ្នាំ២០១៦ ដល់ឆ្នាំ២០២០ ចំណែកលោក នួន ភា ប្រធានចាស់ត្រូវបានតែងតាំងជាប្រធានកិត្តិយសវិញម្តង។ ក្រោយក្លាយជាប្រធានថ្មីសហព័ន្ធនេះក៏បានដាក់ចេញគោលដៅសំខាន់ៗ១៣ចំណុចដើម្បីអនុវត្ត និងពង្រឹងសក្តានុពលសម្រាប់អាណត្តិទី៥របស់ខ្លួននេះ។
លោក ហង់ ជួនណារ៉ុន រដ្ឋមន្ត្រីក្រសួងអប់រំ យុវជន និងកីឡា បានក្លាយជាប្រធានថ្មីរបស់ខេមរសហព័ន្ធតេក្វាន់ដូក្នុងការបន្តដឹកនាំអាណត្តិទី៥(ឆ្នាំ២០១៦-ឆ្នាំ២០២០) ជំនួសលោក នួន ភា ដែលជាប្រធានខេមរសហព័ន្ធតេក្វាន់ដូកម្ពុជាចាស់ ដែលត្រូវបានគេបោះឆ្នោតតែងតាំងឱ្យក្លាយជាប្រធានកិត្តិយសសហព័ន្ធវិញម្តង។ ការផ្លាស់ប្តូរក្បាលម៉ាស៊ីននេះធ្វើឡើងនៅក្នុងមហាសន្និបាតខេមបរសហព័ន្ធតេក្វាន់ដូអាណត្តិទី៤(ឆ្នាំ២០១១-ឆ្នាំ២០១៥) និងបន្តអាណត្តិទី៥(ឆ្នាំ២០១៦-ឆ្នាំ២០២០) នៅទីស្នាក់ការ NOCC កាលពីថ្ងៃទី១៧ ខែមករា។
លោក ហង់ ជួន ណារ៉ុន ប្រធានខេមរសហព័ន្ធតេក្វាន់ដូបានដាក់ចេញគោលដៅសំខាន់ៗចំនួន ១៣ចំណុចក្នុងការបន្ត និងអនុវត្ត ដើម្បីពង្រឹងសហព័ន្ធឱ្យមានសក្តានុពលសម្រាប់អាណត្តិថ្មីដូចខាងក្រោម៖
១/.បង្កើនការងារប្រជុំ និងការយកចិត្តទុកដាក់ត្រួតពិនិត្យជាមួយបណ្តាក្លិបជាសមាជិកយ៉ាងតិច៤ដងក្នុង១ឆ្នាំ
២/. ជំរុញឲ្យមានវគ្គសិក្ខាសាលាគ្រូបង្វឹក-អាជ្ញាកណ្តាល យ៉ាងតិច៤ដងក្នុង១ឆ្នាំ
៣/. ជំរុញឲ្យគ្រូបង្វឹក អាជ្ញាកណ្តាលទៅហាត់នៅក្រៅប្រទេស យ៉ាងតិច២នាក់ក្នុង១ឆ្នាំ
៤/. បង្កើនអាជ្ញាកណ្តាលអន្តរជាតិ ចាប់ពីឆ្នាំ២០១៦ទៅ
៥/. ពង្រឹងអាជ្ញាកណ្តាលអន្តរជាតិក្នុងការចូលរួមវគ្គបំប៉នបន្ថែមនៅក្រៅប្រទេស
៦/. ពង្រឹងការប្រឡងខ្សែក្រវាត់ខ្មៅដាន់ KUKKIWON ឲ្យបាន៤ដងក្នុង១ឆ្នាំ
៧/. បង្កើនការប្រកួតទាំងក្នុងស្រុក និងក្រៅស្រុកជារៀងរាល់ឆ្នាំ
៨/. រៀបចំបណ្តុះថ្នាល និងធ្វើការប្រកួតកុមារអាយុក្រោម១២ឆ្នាំ U12, U14, U18 និងអាយុ១៨ឆ្នាំឡើង
៩/. ត្រៀមបញ្ជូនអត្តពលិកទៅហាត់នៅក្រៅប្រទេស
១០/. ត្រូវបញ្ជូនអត្តពលិកទៅប្រកួតជម្រុះអូឡាំពិកឆ្នាំ២០១៦ នៅហ្វីលីពីន
១១/. បង្កើន និងគ្រប់គ្រងផ្នែកហិរញ្ញវត្ថុ ដើម្បីប្រើប្រាស់ឲ្យមានតម្លាភាព និងសមស្រប
១២/.បង្កើនប្រព័ន្ធផ្សាយផ្នែកបច្ចេកវិទ្យាឲ្យបានទូលំទូឡាយ និងមានដំណើរការល្អ
១៣/. បង្កើនទំនាក់ទំនងល្អជាមួយស្ថាប័នរដ្ឋ ឯកជន និងអង្គការអន្តរជាតិនានា។
នៅក្នុងមហាសន្និបាតខេមរសហព័ន្ធតេក្វាន់ដូ នៅទីស្នាក់ការ NOCC កាលពីថ្ងៃទី១៧ ខែមករា ក៏មានការបោះឆ្នោតតែងតាំងអនុប្រធាន សមាជិក សមាជិកា ប្រតិបត្តជាច្រើនរូបផងដែរ ក្នុងនោះ លោក ជ្រិន សុធា និងលោក ហែម សំណាង ត្រូវបានបោះឆ្នោតជាអនុប្រធានសហព័ន្ធ លោក គង់ សក្ខិដា បន្តតំណែងជាអគ្គលេខាធិការ លោក ជា សារ៉ាត ជាអគ្គលេខាធិការរង លោក ជាតិ ខេមរា ជាអគ្គហេរញ្ញិក និងមានលោក ឃឹម សត្ថា, លោក សំ សុខយី, កញ្ញា ច័ន្ទ មិថុនា, លោក ឌឿន សុខជា, និង លោក ផន សុភា ជាសមាជិក៕