អន្តរជាតិ
សិង្ហបុរីចាប់ខ្លួនជនជាតិបង់ក្លាដែស២៧នាក់និងត្រៀមបញ្ជូនទៅស្រុកវិញ
× ជនជាតិបង់ក្លាដែសចំនួន២៧នាក់ត្រូវបានចាប់ខ្លួនដោយសិង្ហបុរីក្រោមច្បាប់សន្តិសុខផ្ទៃក្នុង។ ជនជាតិបង់ក្លាដែសទាំងនោះគឺជាកម្មករសំណង់ដែលធ្វើការនៅសិង្ហបុរី។ ក្នុងចំណោមពួកគេ គឺមានអ្នកខ្លះធ្លាប់មានផែនការបង្កអំពើហិង្សានៅបង់ក្លាដែស តែមិនទាន់មានគម្រោងនៅសិង្ហបុរីទេ។ នេះបើយោងតាមទូរទស្សន៍ ChannelNewsAsia។
ក្រសួងមហាផ្ទៃសិង្ហបុរី នៅថ្ងៃចន្ទនេះនិយាយថា ជនជាតិបង់ក្លាដែស២៧នាក់ត្រូវបានចាប់ខ្លួន ពីបទរៀបចំផែនការវាយប្រហារនៅប្រទេសដទៃ ក៏ដូចជាបង់ក្លាដែសដែលជាទឹកដីកំណើតរបស់ខ្លួនផងដែរ។ ពួកគេទាំងនោះជាកម្មករដែលធ្វើការនៅក្នុងឧស្សាហកម្មសំណង់ ហើយត្រូវបានចាប់ខ្លួនក្រោមច្បាប់សន្តិសុខផ្ទៃក្នុង នៅអំឡុងពេលចុងឆ្នាំ២០១៥។
លើសពីនេះទៀត ក្រសួងមហាផ្ទៃសិង្ហបុរីក៏បានឲ្យដឹងដែរថា ជនជាតិបង់ក្លាដែស២៦នាក់ក្នុងចំណោម២៧នាក់ គឺជាសមាជិករបស់ក្រុមសាសនាមួយដែលមាននិន្នាការគាំទ្រមនោគមន៍វិជ្ជាជ្រុលនិយមរបស់ក្រុមអាល់កៃដានិងក្រុមរដ្ឋឥស្លាម។ ពួកគេក៏បានទទួលការបង្រៀនមនោគមន៍ជ្រុលនិយមផងដែរ។ ក្រសួងដដែលនេះបន្តថា ជនជាតិបង់ក្លាដែសម្នាក់ទៀត មិនមែនជាសមាជិកក្រុមសាសនានេះទេ ប៉ុន្តែត្រូវបានរកឃើញថា គាំទ្រពួកជ្រុលនិយមនិងបានរក្សាសម្ភារៈដែលទាក់ទងនឹងក្រុមជីហាដ។
មិនតែប៉ុណ្ណោះ អាជ្ញាធរសិង្ហបុរីបញ្ជាក់ទៀតថា ជនជាតិបង់ក្លាដែសទាំងនោះក៏ទទួលការជំរុញពីមេដឹកនាំរបស់ពួកគេ ដើម្បីចាកចេញពីសិង្ហបុរីហើយត្រលប់ទៅធ្វើសកម្មភាពប្រឆាំងរដ្ឋាភិបាលបង់ក្លាដែសវិញ។ ក្នុងចំណោមពួកគេ ក៏មានអ្នកខ្លះបានផ្ដល់លុយទៅឲ្យមេដឹកនាំពួកគេទៀតផង។
បើតាមក្រសួងមហាផ្ទៃសិង្ហបុរី លិខិតអនុញ្ញាតការងាររបស់ជនជាតិបង់ក្លាដែសទាំង២៧នាក់ត្រូវបានលុបចោលរួចហើយ។ ពួកគេចំនួន២៦នាក់នឹងត្រូវបញ្ជួនទៅបង់ក្លាដែសវិញ ក្រោយពេលពេលរដ្ឋាភិបាលសិង្ហបុរីជូនដំណឹងដល់បង់ក្លាដែសរួចរាល់។
ចំណែកឯម្នាក់ទៀត ត្រូវជាប់ទោសនៅសិង្ហបុរីសិនមុននឹងបញ្ជូនទៅតាមក្រោយ ពីព្រោះជននេះត្រូវបានចោទពីបទលួចចេញពីសិង្ហបុរីដោយខុសច្បាប់។ ជនចុងក្រោយនេះនឹងបញ្ជូនទៅបង់ក្លាដែសនៅពេលគេជាប់ទោសរួចរាល់៕
Tag:
សិង្ហបុរី
បង់ក្លាដែស
© រក្សាសិទ្ធិដោយ thmeythmey.com