ជាតិ
ក្រសួងមហាផ្ទៃសង់ស្ថានីយទូរទស្សន៍លើផ្ទៃដីជាង ៨ហិកតា នៅជាយរាជធានីភ្នំពេញ
×
ភ្នំពេញ៖ ក្រសួងមហាផ្ទៃសហការជាមួយក្រុមហ៊ុន CHINA FUJIAN ZHOUNGYA CULTURE MEDIA CO.,LTD. នឹងសាងសង់ស្ថានីយវិទ្យុ និងទូរទស្សន៍ក្រសួងមហាផ្ទៃលើផ្ទៃដីទំហំជាង ៨ហិកតា នៅភាគខាងលិចជាយរាជធានីភ្នំពេញ ហើយក្រសួងគ្រោងផ្សាយសាកល្បង នៅឆ្នាំ ២០១៦នេះ។ នេះបើតាមប្រសាសន៍របស់ លោក ម៉ៅ ប៊ុនណារិន អគ្គនាយក នៃអគ្គ នាយកដ្ឋានភស្តុភា និងហិរញ្ញវត្ថុ។
កិច្ចសហការបង្កើតស្ថានីយវិទ្យុ និងទូរទស្សន៍ក្រសួងមហាផ្ទៃរួមគ្នារវាងកម្ពុជា និងក្រុមហ៊ុនឯកជនចិន ត្រូវចំណាយថវិកាអស់ជាង ៣០ លានដុល្លារអាមេរិក។ ការចំណាយនេះ បើប្រៀបធៀបនឹងទុនចំណាយរបស់ស្ថានីយទូរទស្សន៍ PNNថ្មី របស់សមាជិកព្រឹទ្ធសភាគណបក្សប្រជាជនកម្ពុជាលោកឧកញ៉ា លី យ៉ុងផាត់នោះ ចំនួននេះតិចជាងចំណាយរបស់ទូរទស្សន៍PNN ១០ លានដុល្លាអាមេរិក។
លោក ម៉ៅ ប៊ុនណារិន មានប្រសាសន៍ប្រាប់សារព័ត៌មានថ្មីៗថា វិទ្យុ និងទូរទស្សន៍ក្រសួងមហាផ្ទៃ នឹងផ្សព្វផ្សាយតាមប្រព័ន្ធបច្ចេកវិទ្យាឥតខ្សែ បែបឌីជីថលទំនើប ឬទូរសព្ទចល័ត និងតាមប្រព័ន្ធផ្កាយរណបស្តង់ដារអន្តរជាតិ។ ហើយថា ទូរទស្សន៍នេះ នឹងផ្សព្វផ្សាយព្រឹត្តិការណ៍ពត៌មានជាតិ អន្តរជាតិ ព័ត៌មានទាន់ហេតុការណ៍ សន្តិសុខសង្គម សេដ្ឋកិច្ច ពាណិជ្ជកម្ម នយោបាយ និងការអប់រំច្បាប់ជាដើម សម្រាប់ទស្សនិកជនទាំងក្នុង និងក្រៅប្រទេសនៅទូទាំងពិភពលោក។ លោកបន្តថា ទូរទស្សន៍មហាផ្ទៃ នឹងផ្សាយតាមកាណាល់ប៉ុសិ៍្តលេខ ៦១ និងវិទ្យុ FM លេខ ៩០.២៥មេហ្គាហឺត។
លោកបញ្ជាក់ថា ទូរទស្សន៍មហាផ្ទៃ មានគោលបំណងបង្កើនម៉ោងផ្សព្វផ្សាយកម្មវិធីទូរទស្សន៍ឈ្មោះថា នាទីសន្តិសុខមាតុភូមិ ដែលត្រូវបានដាក់ផ្សាយតាមបណ្តាទូរទស្សន៍ក្នុងស្រុកនានា អស់រយៈពេលជាង ២០ឆ្នាំ កន្លងមក។
ក្រសួងមហាផ្ទៃ និងក្រុមហ៊ុន CHINA FUJIAN ZHOUNGYA CULTURE MEDIA CO.,LTD បានចុះកិច្ចព្រមព្រៀងស្ដីពីការសហការបង្កើត និងដំណើរការវិទ្យុ និងទូរទស្សន៍ក្រសួងមហាផ្ទៃ កាលពីថ្ងៃទី២៩ ខែកក្កដា ឆ្នាំ២០១៥ នៅទីស្តីការក្រសួងមហាផ្ទៃ ដោយមានវត្តមានចូលរួម សម្តេច ស ខេង តំណាងក្រុមហ៊ុនចិន និងមន្ត្រីជាន់ខ្ពស់ក្រសួងមហាផ្ទៃជាច្រើនរូប។
លោក Huang Yi chuan តំណាងក្រុមហ៊ុន CHINA FUJIAN ZHOUNGYA CULTURE MEDIA CO.,LTD បានថ្លែងថា គម្រោងស្ថានីយទូរទស្សន៍ក្រសួងមហាផ្ទៃ «កម្ពុជាអាស៊ីខាងត្បូង» នឹងប្រកាន់ភ្ជាប់នូវយុទ្ធសាស្ត្រ និងបំពេញវិជ្ជាជីវៈព័ត៌មានជាមូលដ្ឋាន ក្នុងការផ្សព្វផ្សាយសេដ្ឋកិច្ច និងនយោបាយជាភាសាខ្មែរប្រកបដោយគុណភាពខ្ពស់ ដើម្បីបញ្ចេញឥទិ្ធពលប្រព័ន្ធផ្សព្វផ្សាយខ្មែរ លើឆាកអន្តរជាតិ។
គួរបញ្ជាក់ថា ក្រសួងមហាផ្ទៃ បង្កើតស្ថានីយវិទ្យុ និងទូរទស្សន៍ផ្ទាល់ខ្លួន ស្របពេលគណបក្សសង្គ្រោះជាតិ សង់ស្ថានីយទូរទស្សន៍ព្រះអាទិត្យផ្ទាល់ខ្លួន ដែលទូរទស្សន៍បក្សប្រឆាំងនេះ គ្រោងផ្សាយព័ត៌មានខ្លួនសាកល្បង នៅក្នុងឆ្នាំ២០១៦នេះដែរ៕
Tag:
ទូរទស្សន៍
មហាផ្ទៃ
កម្ពុជា
ចិន
© រក្សាសិទ្ធិដោយ thmeythmey.com