ជាតិ
បទវិភាគ
សង្គមជាតិ
ពលរដ្ឋខ្មែរឈឺមិនសូវហ៊ានទៅពេទ្យ រងអំពើអយុត្តិធម៌ មិនសូវហ៊ានទៅតុលាការ…
×![]()
ភ្នំពេញ៖ ភាពក្រីក្រ បានធ្វើឲ្យពលរដ្ឋខ្មែរមួយចំនួនធំ នៅពេលមានបញ្ហាសុខភាពមិនហ៊ានទៅមន្ទីរពេទ្យ។ ចំណែក ពលរដ្ឋខ្មែរមួយចំនួនទៀត ដោយសារតែមិនជឿលើប្រព័ន្ធយុត្តិធម៌កម្ពុជា ពេលជួបភាពអយុត្តិធម៌ ពួកគេ មិនសូវហ៊ានដាក់ពាក្យបណ្តឹងទៅកាន់តុលាការឡើយ។ តែជំនួសមកវិញ ពួកគេ សុខចិត្តសម្រួលនៅក្រៅប្រព័ន្ធតុលាការ បើទោះបីជាពេញចិត្តក្តី និងមិនពេញចិត្តក្តី។ តើបញ្ហានេះ បានជះឥទ្ធិពលអវិជ្ជមានអ្វីខ្លះ ដល់ប្រទេសជាតិ?
កើតចាស់ឈឺស្លាប់ គឺជាវាលវដ្តសង្សារ ដែលមនុស្សម្នាក់ៗ ត្រូវតែឆ្លងកាត់ ពីព្រោះ នេះគឺជាច្បាប់ធម្មជាតិបានកំណត់។ ប៉ុន្តែ នៅពេលមនុស្សឈឺ គឺតែងតែស្វែងរកថ្នាំលេបនិងទៅរកគ្រូពេទ្យ ឲ្យជួយព្យាបាល ដើម្បីឲ្យរួចផុតពីសេចក្តីស្លាប់។ នៅប្រទេសជឿនលឿនមួយចំនួន ក្នុងមួយសប្តាហ៍ ឬមួយខែ ពលរដ្ឋនៅប្រទេសនោះ បាននាំគ្នាទៅពិនិត្យសុខភាព ជាទៀងទាត់ ដើម្បីឲ្យប្រាកដថា មានជំងឺ ឬពុំមាន។ ប្រសិនបើមានជំងឺ ពួកគេ អាចព្យាបាលទាន់ពេលវេលា និង ចៀសផុតពីគ្រោះថ្នាក់ដល់ជីវិត។
ដោយឡែកនៅប្រទេសកម្ពុជា ពលរដ្ឋភាគច្រើនដែលមានជីវភាពក្រីក្រ និងមធ្យម ហាក់មិនបានយកចិត្តទុកដាក់ចំពោះការពិនិត្យសុខភាពឡើយ។ កុំថាឡើយពិនិត្យសុខភាព ពលរដ្ឋជាច្រើន បើទោះបីជាដឹងថា មានជំងឺប្រចាំកាយក៏ដោយ ក៏ពួកគេ មិនទៅព្យាបាលដែរ។ បញ្ហានេះ មិនមែន ពលរដ្ឋមិនស្រឡាញ់សុខភាពខ្លួនឯងនោះទេ។ ប៉ុន្តែ ភាពក្រីក្រ កង្វះជំនឿលើ ប្រព័ន្ធសុខាភិបាលបានបង្អាក់ពួកគេមិនចង់ឲ្យទៅស្វែងរកសេវាសុខាភិបាលនៅក្នុងប្រទេសកម្ពុជា។
កាលពីអតីតកាល ពលរដ្ឋមួយចំនួនធំ នៅមានជំនឿលើការបន់ស្រន់ អារក្សអ្នកតា ខ្មោច ព្រាយបិសាច និងព្រលឹងអរូបីយ៍ជាដើម នៅពេលពួកគេមានជំងឺ ប៉ុន្តែជំនឿនេះ បានកាត់បន្ថយច្រើនណាស់ ពោល គឺពលរដ្ឋលែងសម្រាលកូនជាមួយឆ្មបនៅផ្ទះ ហើយងាកមកសម្រាលកូននៅមន្ទីរពេទ្យវិញ។ លើសពីនេះ ពលរដ្ឋភាគច្រើន បានទទួលថ្នាំវ៉ាក់ស៊ាំង ការពារជំងឺ ពីសំណាក់មន្ត្រីក្រសួងសុខាភិបាល និងក្រុមអង្គការក្រៅរដ្ឋាភិបាល ដែលធ្វើការពាក់ព័ន្ធនឹងសុខភាព។ បញ្ហានេះ គឺកើតឡើងពីការផ្សព្វផ្សាយអប់រំ តាមរយៈរដ្ឋាភិបាលក្តី និងអង្គការមនុស្សធម៌ក្តី ដែលបានជួយចូលរួមចំណែកយ៉ាងសំខាន់ចំពោះសុខភាពសាធារណៈនៅកម្ពុជា។
បើទោះបីជាវិស័យសុខាភិបាលខ្មែរត្រូវបានកែលម្អរខ្លះក៏ដោយក្តី ក៏បញ្ហានៅតែមានដដែល។ ពលរដ្ឋមួយចំនួននៅមិនទុកចិត្តគុណភាពគ្រូពេទ្យខ្មែរ។ ជាក់ស្តែង អ្នកមានទ្រព្យធន និងមន្ត្រីមួយចំនួនបានធ្វើដំណើរទៅព្យាបាលជំងឺ នៅក្រៅប្រទេស ដូចជា ប្រទេសថៃ វៀតណាម សិង្ហបុរី ម៉ាឡេស៊ី បារាំង ឬអាមេរិក។ នេះសបញ្ជាក់ឲ្យឃើញពីការមិនទុកចិត្តគុណភាពនៃមន្ទីរពេទ្យនៅក្នុងប្រទេស។សព្វថ្ងៃនេះ នៅក្នុងគ្រួសារណា ដែលមានអ្នកជំងឺតែម្នាក់ គ្រួសារនោះ បានធ្លាក់ខ្លួនក្រីក្រកាន់តែខ្លាំង ពីព្រោះ ពួកគេបាន លក់ដី ស្រែ និងដើរខ្ចីបុលជាដើម ដើម្បីធ្វើដូចម្តេចឲ្យតែសាច់ញាតិជាពីជំងឺ។
ចំណែកវិស័យយុត្តិធម៌វិញ ក៏ត្រូវបានគេមើលឃើញថា មានបញ្ហាធ្ងន់ធ្ងរ មិនចាញ់វិស័យសុខាភិបាលប៉ុន្មានឡើយ។ ពលរដ្ឋមួយចំនួន បានសម្របសម្រួលនៅក្រៅប្រព័ន្ធតុលាការ នៅពេលមានរឿងក្តីក្តាំ ជាពិសេស សំណុំរឿងដែលជាប់ពាក់ព័ន្ធទៅនឹងមន្ត្រីធំៗមួយចំនួន។ ប្រព័ន្ធតុលាការដែលពលរដ្ឋមិនទុកចិត្ត កំពុងធ្វើឲ្យមហាជនមួយចំនួន ព្យាយាមរកខ្សែ ឬ ខ្នង ដើម្បីដោះបញ្ហា។
សរុបសេចក្តីមកវិញ ដើម្បីឲ្យពលរដ្ឋខ្មែរមានជំនឿលើវិស័យសុខាភិបាល និងប្រព័ន្ធយុត្តិធម៌ឡើងវិញនោះ កំណែទម្រង់ស៊ីជម្រៅជារឿងចាំបាច់ និងជារឿងស្លាប់រស់របស់រដ្ឋាភិបាលបច្ចុប្បន្ន៕
Tag:
សុខាភិបាល
© រក្សាសិទ្ធិដោយ thmeythmey.com
