អ្នកតាមដានស្ថានការណ៍ ស្នើឲ្យលោក ចន ឃេរី លើកបញ្ហាដីធ្លីការចាប់ខ្លួនមន្ត្រីCNRP និយាយជាមួយសម្ដេច ហ៊ុន សែន

ជាតិ

សង្គមជាតិ

អ្នកតាមដានស្ថានការណ៍ ស្នើឲ្យលោក ចន ឃេរី លើកបញ្ហាដីធ្លីការចាប់ខ្លួនមន្ត្រីCNRP និយាយជាមួយសម្ដេច ហ៊ុន សែន

23, Jan 2016 , 3:20 pm

រូបភាព

ដោយ: រំដួល ចិត្រា (Romdoul Chetra)

ភ្នំពេញ៖ អ្នកវិភាគ និងសង្គមស៊ីវិល ស្នើឲ្យលោក ចន ឃេរី រដ្ឋមន្ត្រីក្រសួងការបរទេសអាមេរិក និយាយពីបញ្ហាសិទ្ធិមនុស្ស និងការចាប់ឃុំខ្លួនមន្ត្រីគណបក្សប្រឆាំងជាមួយសម្ដេចនាយករដ្ឋមន្ត្រី ហ៊ុន សែន ដើម្បីជំរុញឲ្យថ្នាក់ដឹកនាំគណបក្សកាន់អំណាចមួយនេះ គិតពិចារណាឡើងវិញ។រដ្ឋមន្ត្រីក្រសួងការបរទេសសហរដ្ឋអាមេរិកលោក ចន ឃេរី នឹងមកបំពេញទស្សនកិច្ចផ្លូវការនៅកម្ពុជាចំនួន២ថ្ងៃ គឺចាប់ពីថ្ងៃទី២៥ដល់ទី២៦ខែមករា ដើម្បីពង្រឹងទំនាក់ទំនងទ្វេភាគី រវាងប្រទេសទាំងពីរ។

លោក សៀ ភារម្យ នាយកលេខាធិការដ្ឋានទទួលបន្ទុកផ្នែកសិទ្ឋិលំនៅដ្ឋាន ស្នើឲ្យរដ្ឋមន្ត្រីក្រសួងការបរទេសអាមេរិក លោក ចន ឃេរី លើកយកបញ្ហាដីធ្លី បញ្ហាសិទ្ធិមនុស្សនៅកម្ពុជា យកទៅពិភាក្សាជាមួយសម្ដេចនាយករដ្ឋមន្ត្រី ហ៊ុន សែន ដើម្បីជំរុញឲ្យរដ្ឋាភិបាលដោះស្រាយបញ្ហាប្រជាពលរដ្ឋឲ្យកាន់តែប្រសើរឡើងថែមទៀត ។ លោក សៀ ភារម្យ បន្ថែមថា បើទោះជាអាមេរិកគ្មានសិទ្ធិអ្វីក្នុងការបង្ខំឲ្យកម្ពុជាធ្វើតាមខ្លួនក៏ដោយ តែលោក ចន ឃេរី អាចប្រើភាសាការទូតជួយពន្យល់រដ្ឋាភិបាលកម្ពុជាពិចារណាឡើងវិញ ក្នុងការដោះស្រាយបញ្ហាសង្គមកម្ពុជាតាមបែបប្រទេសកាន់លិទ្ធិប្រជាធិបតេយ្យ។

ថ្លែងប្រាប់សារព័ត៌មានថ្មីៗ មន្ត្រីការពារសិទ្ធិលំនៅដ្ឋានរូបនេះ បានបន្ថែមថាដូច្នេះថា៖«ទោះលោក ចន ឃេរី មិនអាចនិយាយបង្ខំ មិនអាចដាក់សម្ពាធលើរដ្ឋាភិបាល ព្រោះកម្ពុជាមានអធិបតេយ្យភាពខ្លួនមែន។តែលោក ចន ឃេរី អាចប្រើភាសាការទូតនិយាយពន្យល់ឲ្យរដ្ឋាភិបាលពិចារណាលើបញ្ហាសិទ្ធិមនុស្ស បញ្ហាពលរដ្ឋរងគ្រោះដីធ្លី។ ហើយភាសាការទូតនោះ ក៏អាចឲ្យរដ្ឋាភិបាលខ្មាសអាមេរិកដែរ ព្រោះជាប្រទេសប្រកាន់លទ្ធិប្រជាធិបតេយ្យដូចគ្នា»។

ស្របពេលដែលដឹងពីដំណើរទស្សនកិច្ចរបស់លោក ចន ឃេរី មកកម្ពុជានោះ សកម្មជនដីធ្លីដែលរងគ្រោះដោយការបណ្តេញ មិនទាន់ទទួលបានសំណងសមរម្យពីរដ្ឋាភិបាល បាននាំគ្នាឈរស្រែកពីទុកលំបាកពួកកេនៅមុខស្ថានទូតអាមេរិកកាលពីថ្ងៃទី២២ មករា ដើម្បីដាក់ញ្ញតិជូនលោក ចន ឃេរី ឲ្យជួយអន្តរាគមន៍ជំរុញទៅរដ្ឋាភិបាលដោះស្រាយបញ្ហាដីធ្លីពួកគេ ។

ក្រៅពីបញ្ហាដីធ្លី បញ្ហាសិទ្ធិមនុស្សនេះ អ្នកវិភាគនយោបាយ ក៏ចង់ឃើញលោក ចន ឃេរី លើកយកចាប់ឃុំខ្លួនសកម្មជន មន្ត្រីគណបក្សប្រឆាំង និយាយជាមួយរដ្ឋាភិបាលដែរ។លោក សូ ចន្ថា អ្នកវិភាគនយោបាយ យល់ឃើញថា ក្នុងជំនួបជាមួយនាយករដ្ឋមន្ត្រី ហ៊ុន សែន លោក ចន ឃេរី រដ្ឋមន្ត្រីការបរទេសអាមេរិកទំនងជាអាចលើកយក បញ្ហាចាប់ខ្លួនអ្នកយោបាយនៅកម្ពុជា យកទៅពិភាក្សាជាមួយប្រមុខរដ្ឋាភិបាល។ លោកថា បើលោក ចន ឃេរី លើកបញ្ហាទាំងនេះនិយាយជាមួយរដ្ឋាភិបាលមែននោះ គឺជារឿងមួយល្អ ដើម្បីពន្យល់រដ្ឋាភិបាលកុំឲ្យប្រើអំណាចខ្លួនធ្វើទុក្ខបុកម្នេញទៅលើគណបក្សប្រឆាំង និងកុំឲ្យបង្កបញ្ហានិទណ្ឌភាព នៃការអនុវត្តច្បាប់ដោយប្រើស្ដង់ដារពីរទៅលើអ្នកនយោបាយ និងប្រជាពលរដ្ឋទន់ខ្សោយ។

អ្នកវិភាគរូបនេះបញ្ជាក់ដូច្នេះថា៖ក្នុងនាមលោក ចន ឃេរី ជាអ្នកតំណាងឲ្យប្រទេសកាន់លទ្ធិប្រជាធិបតេយ្យ គាត់អាចនឹងយកបញ្ហាចាប់ខ្លួនអ្នកនយោបាយ លើកឡើងពីបញ្ហាប្រជាពលរដ្ឋ បញ្ហាសិទ្ធិមនុស្ស បញ្ហាការបោះឆ្នោតនិយាយជាមួយរដ្ឋាភិបាល។ហើយបញ្ហានយោបាយគាត់អាចនឹងនិយាយពន្យល់ប្រាប់រដ្ឋាភិបាល កុំឲ្យធ្វើទុក្ខបុកម្នេញអ្នកប្រឆាំង និងកុំឲ្យមានស្ដង់ដារពីរជាន់នៅកម្ពុជា»។

អ្នកវិភាគមួយរូបទៀតគឺលោក មាស នី យល់ឃើញថា បើលោករដ្ឋមន្ត្រីការបរទេសអាមេរិកនិយាយរឿងចាប់ខ្លួនបក្សប្រឆាំងជាមួយនាយករដ្ឋមន្ត្រី ហ៊ុន សែន នោះគឺជាមេរៀនដែលអាមេរិកចង់បង្រៀនកម្ពុជាឲ្យយល់កាន់តែច្បាស់ពីរបៀបនៃការដឹកនាំប្រទេសតាមបែបលទ្ធិប្រជាធិបតេយ្យ។

រដ្ឋមន្ត្រីក្រសួងការបរទេសសហរដ្ឋអាមេរិកលោក ចន ឃេរី នឹងមកបំពេញទស្សនកិច្ចផ្លូវការនៅកម្ពុជាចំនួន២ថ្ងៃ គឺចាប់ពីថ្ងៃទី២៥ដល់ទី២៦ខែមករា ដើម្បីពង្រឹងទំនាក់ទំនងទ្វេភាគី រវាងប្រទេសទាំងពីរ មុនពេលដែលសម្ដេចនាយករដ្ឋមន្ត្រី ហ៊ុន សែន និងមេដឹកនាំប្រទេសជាសមាជិកអាស៊ាន នឹងទៅបំពេញទស្សនកិច្ចនៅសហរដ្ឋាមេរិកនៅពាក់កណ្តាលខែកុម្ភៈ៕