ជាតិ
វីរុសZIKA៖ក្រសួងអំពាវនាវឲ្យអ្នកធ្វើដំណើរពីតំបន់អាហ្វ្រិក និងអាមេរិក ពិនិត្យសុខភាព
× ខណៈដែលតំបន់អាហ្វ្រិក និងអាមេរិកខាងត្បូង កំពុងផ្ទុះឡើងនូវវីរុស ZIKA ដែលបានចម្លងប្រជាពលរដ្ឋយ៉ាងធ្ងន់ធ្ងរនោះ ក្រសួងសុខាភិបាល បានអំពាវនាវឲ្យប្រជាពលរដ្ឋ ឬ អ្នកដំណើរដែលឆ្លងកាត់តំបន់អាហ្វ្រិក និងអាមេរិកខាងត្បូង ដែលបានចូលមកប្រទេសកម្ពុជា ទៅពិនិត្យសុខភាពខ្លួនឲ្យបានត្រឹមត្រូវ ដើម្បីបង្កាកុំឲ្យចម្លងជំងឺវីរុសZIKA នៅកម្ពុជា។
អនុប្រធាននាយកដ្ឋានប្រយុទ្ធ នឹងជំងឺឆ្លង និងជាអ្នកនាំពាក្យនៃក្រសួងសុខាភិបាល លោក លី សុវណ្ណ បានបញ្ជាក់ថា រហូតមកដល់ពេលនេះ នៅក្នុងប្រទេសកម្ពុជា មិនទាន់មានជំងឺវីរុស ZIKA ធ្ងន់ធ្ងរ ដូចប្រទេសនៅតំបន់អាហ្វ្រិច និងតំបន់អាមេរិកខាងត្បូងនៅឡើយទេ។ លោកថា បើទោះជាប្រទេសកម្ពុជា នៅឆ្ងាយពីតំបន់អាហ្វ្រិច និងអាមេរិកខាងត្បូងក៏ដោយ តែលោកស្នើឲ្យអ្នកធ្វើដំណើរឆ្លងកាត់តំបន់នេះ រូចត្រឡប់មកប្រទេសកម្ពុជាវិញ គួរគប្បីទៅពិគ្រោះយោបល់ និងពិនិត្យសុខភាពខ្លួន បើសិនជាមានអាការៈមិនស្រួលខ្លួនខុសពីធម្មតា។
ក្រោយការដាក់ឲ្យប្រើប្រាស់ជាផ្លូវការ នូវបច្ចេកវិទ្យាឌីជីថល និងប្រព័ន្ធ តាមដានបែបចូលរួមជា សាធារណ: ដើម្បីទប់ស្កាត់ការរាលដាលជំងឺឆ្លងរាតត្បាតនៅកម្ពុជា នៅព្រឹកនេះ អ្នកនាំពាក្យក្រសួងសុខាភិបាលរូបនេះ បានបញ្ជាក់ដូច្នេះថា៖«ប្រសិនបើអ្នកធ្លាប់មានប្រវត្តិធ្វើដំណើរមកពីតំបន់អាហ្វ្រិច និងអាមេរិកខាងត្បូងនេះ បើសិនជាគាត់មានរោគសញ្ញា(វីរុស ZIKA) គាត់ទៅទីនោះក្ដី ឆ្លងកាត់ក្ដី ពេលធ្វើដំណើរមកដល់ស្រុកខ្មែរ បើមានរោគសញ្ញាដូចជាគ្រុនក្តៅ ឈឺក្បាល ក្រហមភ្នែក សូមទៅពិគ្រោះជាមួយគ្រូពេទ្យជាបន្ទាន់ នៅមន្ទីពិសោធន៍ វិទ្យាស្ថានប៉ាស្ទ័រ ទាំងជំងឺMERSជាដើម»។
ជំងឺដែលបង្ករដោយវីរុស Zika នេះមានរោគសញ្ញា ដូចជា គ្រុនក្ដៅស្រាល ឈឺក្បាល កន្ទួលក្រហមលើស្បែក ក្រហមភ្នែក ឈឺសន្លាក់ ហើយភាគច្រើនជាវិញពី២ទៅ៧ថ្ងៃ។ សម្រាប់អត្រាស្លាប់ដែលបណ្ដាលដោយជំងឺនេះមានកម្រិតតិចតួច ប៉ុន្តែវីរុសនេះអាចវិវត្តន៍ទៅជាទន់ដៃជើង ទារកអាចស្លាប់ក្នុងផ្ទៃម្ដាយ និងក្បាលទារកតូចជាដើម។ វីរុសនេះ ក៏មិនទាន់មានថ្នាំព្យាបាល និងវ៉ាក់សាំងសម្រាប់ការពារនៅឡើយនោះទេ។ ចំណែកការព្យាបាល គឺត្រូវធ្វើតាមការគាំទ្រវេជ្ជសាស្ត្រ។ ដើម្បីបង្ការជំងឺនេះ គឺត្រូវបំផ្លាញជំរកមូល និងការពារកុំឲ្យមូសខ្លាខាំ។
នៅឆ្នាំ២០១០ វីរុស Zika ត្រូវបានរកឃើញនៅកម្ពុជា និងឆ្នាំ២០១២ ដល់ឆ្នាំ២០១៤ រកឃើញនៅក្នុងប្រទេសថៃតែត្រូវបានធ្វើការទប់ស្កាត់ទាន់ពេលបានមួយចំនួន។ ចំណែកខែមករា ឆ្នាំ២០១៦ ជំងឺនេះត្រូវបានគេរកឃើញនៅក្នុងប្រទេសតៃវ៉ាន។
គួបញ្ជាក់ថា វីរុស នេះរកឃើញដំបូងនៅលើសត្វស្វាក្នុងឆ្នាំ១៩៤៧ និងលើមនុស្ស ក្នុងឆ្នាំ១៩៥២ នៅប្រទេស Uganda នៃទ្វីបអាហ្វ្រិក។ វីរុសZika រាតត្បាតខ្លាំងឡើងបន្ទាប់ពីការទាត់បាល់ពិភពលោកនៅប្រទេសប្រេស៊ីលឆ្នាំ២០១៤ ហើយធ្លាប់បានផ្ទុះឡើងនៅទ្វីបអាហ្វ្រិក អាមេរិក និង អាស៊ីប៉ាស៊ីហ្វិកផងដែរ៕
© រក្សាសិទ្ធិដោយ thmeythmey.com