ក្រសួងពាណិជ្ជកម្មចាំទទួលយោបល់ស្ថាបនាក្រោយសន្និបាតបញ្ញវន្តពិភពលោក

ជាតិ

សង្គមជាតិ

ក្រសួងពាណិជ្ជកម្មចាំទទួលយោបល់ស្ថាបនាក្រោយសន្និបាតបញ្ញវន្តពិភពលោក

29, Jan 2016 , 10:44 pm

រូបភាព

ដោយ:

រដ្ឋមន្ត្រីក្រសួងពាណិជ្ជកម្មលោក ស៊ុន ចាន់ថុល បានចូលរួមថ្លែងសុន្ទរកថាស្វាគមន៍អ្នកចូលរួមសន្និបាតបញ្ញវន្តពិភពលោក (Global Alumni Convention) នៅល្ងាចថ្ងៃ ២៩ ខែមករា នៅសណ្ឋាគារ Intercontinental ។ នៅក្នុងពិធីនេះលោករដ្ឋមន្ត្រី បានប្រកាសថា ក្រសួងពាណិជ្ជកម្មនឹងទទួលយកយោបល់ពីក្រុមបញ្ញវន្តដែលបានជជែកគ្នានៅក្នុងសន្និបាតនេះ។

ក្រៅតែពីសោមនស្សចំពោះការរៀបចំសន្និបាតបញ្ញវន្តពិភពលោក (Global Alumni Convention) លោក ស៊ុន ចាន់ថុល បានអះអាងថា ក្រសួងពាណិជ្ជកម្មរង់ចាំទទួលយកនូវក្តីកង្វល់ឬមតិយោបល់ដែលទាក់ទងនឹងក្រសួងពាណិជ្ជកម្ម។ លោកថា ក្រោយពីបញ្ចប់សន្និបាតបញ្ញវន្តពិភពលោកនេះ ក្រុមបញ្ញវន្តអាចបញ្ជូនយោបល់ឬក្តីកង្វល់មកក្រសួងពាណិជ្ជកម្ម ដើម្បីកែតម្រូវនូវចំណុចខ្វះខាត់ដែលក្រសួងក្រោមការដឹកនាំរបស់លោកមិនបានអនុវត្ត។

សម្រាប់លោករដ្ឋមន្ត្រី សន្និបាតនេះ អនុញ្ញាតឲ្យបញ្ញវន្តរបស់ខ្មែរដែលមានសមត្ថភាពជួបគ្នា ចែករំលែកបទពិសោធន៍ល្អៗដល់គ្នា ដើម្បីអភិវឌ្ឍន៍ប្រទេស។ «បញ្ញវន្តពិភាក្សាគ្នា ដើម្បីរកវិធីជួយប្រទេសយើង កសាងមាតុភូមិយើងឲ្យរីកចម្រើន។ បញ្ញវន្តត្រូវតែជជែកគ្នា»។ នេះជាការបញ្ជាក់របស់លោករដ្ឋមន្ត្រី ទន្ទឹមនឹងជំរុញឲ្យលោក ម៉ៅ ស្រេង នាយកប្រចាំប្រទេសរបស់ IDP Education បន្តរៀបចំសន្និបាតនេះជារៀងរាល់ឆ្នាំ។

សូមបញ្ជាក់ថា នៅព្រឹកថ្ងៃទី៣០មករា លោក ហង់ ជួន ណារ៉ុន រដ្ឋមន្ត្រីក្រសួងអប់រំ នឹងធ្វើសុន្ទរកថាបើកសន្និបាតនេះ ហើយលោក ហ៊ុន ម៉ាណែត កូនច្បងរបស់សម្តេច ហ៊ុន សែន នឹងធ្វើជាវាគ្មិនក្នុងកិច្ចប្រជុំពេញអង្គពិសេស (special plenary session) នៃសន្និបាតបញ្ញវន្តពិភពលោក បន្ទាប់មកលោក ជា សុផារ៉ា រដ្ឋមន្ត្រីក្រសួងអភិវឌ្ឍជនបទ នឹងថ្លែងសុន្ទរកថាបិទបញ្ចប់សន្និបាតនេះ៕