ជាតិ
លោក ហោ ណាំហុង ប្រាប់ឲ្យ មន្ត្រីទូតនៅក្រៅប្រទេស តាមដានហ្វេសប៊ុកនាយករដ្ឋមន្ត្រី
× ការតាមដានស្ថានការណ៍នៅកម្ពុជា គឺស្ថិតនៅក្នុងការងារជាអាទិភាពមួយរបស់ ឯកអគ្គរាជទូត/អគ្គកុងស៊ុលកម្ពុជាទាំងអស់ប្រចាំនៅក្រៅប្រទេស។ នៅក្នុងកិច្ចជុំជាមួយ ឯកអគ្គរាជទូត/អគ្គកុងស៊ុលកម្ពុជាប្រចាំនៅក្រៅប្រទេស នៅព្រឹកថ្ងៃទី៣០ខែមករា លោក ហោ ណាំហុង បានណែនាំឲ្យ ឯកអគ្គរាជទូត/អគ្គកុងស៊ុលកម្ពុជាទាំងអស់ប្រចាំនៅក្រៅប្រទេស យកចិត្តទុកដាក់តាមដានសភាពការណ៍នៅក្នុងប្រទេស ពិសេសគឺហ្វេកប៊ុក( Facebook) និង គេហទំព័រ(Website) របស់សម្តេចនាយករដ្ឋមន្ត្រីហ៊ុន សែន និង ក្រសួងការបរទេស និងសហប្រតិបត្តិការអន្តរជាតិ ជារៀងរាល់ថ្ងៃ។ នេះបើយោងតាមសេចក្តីប្រកាសព័ត៌មានរបស់ក្រសួងការបរទេសកម្ពុជា។
ក្រៅពីនេះ នៅមានកិច្ចកិច្ចការងារជាច្រើនទៀត ដែលរដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ បានណែនាំដល់ឯកអគ្គរាជទូត និងអគ្គកុងស៊ុលប្រចាំនៅក្រៅប្រទេស ឲ្យយកចិត្តទុកដាក់ និងពង្រឹងន្ថែម ក្នុងងនោះរួមមាន៖
- ការតាមដានរាល់ការផ្សាយព័ត៌មានទាក់ទងនឹងកម្ពុជា របស់ប្រព័ន្ធឃោសនាជាតិ
- បន្តធ្វើការផ្សព្វផ្សាយពីការរីកចម្រើនលើគ្រប់វិស័យ ក្នុងកិច្ចអភិវឌ្ឍន៍ប្រទេស។
- យកចិត្តទុកដាក់ការពារ និងជួយដោះស្រាយរាល់បញ្ហារបស់ពលករ ពលការិនីទាំងស្របច្បាប់ និងមិនស្របច្បាប់នៅប្រទេសថៃ សាធារណៈរដ្ឋកូរ៉េ និងបញ្ហាស្ត្រីខ្មែរនៅប្រទេសម៉ាឡេស៊ី និងប្រទេសចិន ឥណ្ឌូណេស៊ីជាដើម។
- បន្តស្វែងរកអាហារូបករណ៍សម្រាប់និស្សិតកម្ពុជា និងយកចិត្តទុកដាក់ ដោះស្រាយរាល់បញ្ហារបស់និស្សិតដែលកំពុងសិក្សា ក៏ដូចជានិស្សិតដែលជាពលរដ្ឋខ្មែរកំពុងរស់នៅក្នុងប្រទេសតាំងនៅ ដូចជានៅប្រទេសបារាំង បណ្តាប្រទេសសមាជិកEU សហរដ្ឋអាមេរិក កាណាដា អូស្ត្រាលី នូវែលហ្សេឡង់។ល។
- យកចិត្តទុកដាក់ចំពោះពលរដ្ឋខ្មែរដែលកំពុងរស់នៅក្នុងប្រទេសតាំងនៅ ទោះជាមានសញ្ជាតិបរទេសក៏ដោយ ហើយរាល់ការចេញលិខិតបញ្ជាក់ផ្សេងៗ និងការផ្តល់សេវាកុងស៊ុល ត្រូវធ្វើដោយឥតគិតថ្លៃ និងឆាប់រហ័សទាន់ពេលវេលា។
ក្រៅពីនេះ លោក ហោ ណាំហុង ក៏បានប្រាប់ឲ្យឯកអគ្គរាជទូត/អគ្គកុងស៊ុលកម្ពុជាទាំងអស់ យកចិត្តទុកដាក់ចំពោះការជំរុញកំណើនភ្ញៀវទេសចរ និងវិនិយោគិនបរទេស តាមរយៈការផ្តល់ទិដ្ឋាការចូលមកកម្ពុជា ឲ្យបានឆាប់រហ័ស និងចៀសវាងការយកតម្លៃលើសពីការកំណត់របស់រដ្ឋ ព្រមទាំងយកចិត្តទុកដាក់ផ្សព្វផ្សាយពីកត្តាអនុគ្រោះសម្រាប់ការវិនិយោគនៅកម្ពុជា៕
© រក្សាសិទ្ធិដោយ thmeythmey.com