ជាតិ
ខុមហ្វ្រែល៖ ពលរដ្ឋភាគច្រើនមិនពេញចិត្ត ការអនុវត្តរបស់រដ្ឋាភិបាលក្នុងឆ្នាំ២០១៥
× គណៈកម្មាធិការ ដើម្បីការបោះឆ្នោតដោយសេរី និងយុត្ដិធម៌ (ខុមហ្វ្រែល) បានរៀបចំវេទិកាម្ចាស់ឆ្នោតស្តីពីការផ្តល់ពិន្ទុលើលទ្ធផលនៃការបំពេញ និងអនុវត្តគោលនយោបាយ របស់រដ្ឋាភិបាលអាណត្តិទី៥ នាឆ្នាំទី២។ វេទិកានេះត្រូវបានរៀបចំនៅភោជនីយដ្ឋានទន្លេបាសាក់២ នាពេលព្រឹកថ្ងទី ៣០ មករានេះ។ ភាគច្រើននៃអ្នកចូលរួមក្នុងកម្មវិធីនេះ បានបោះឆ្នោតសម្តែងការមិនពេញចិត្តចំពោះការអនុវត្តគោលនយោបាយរបស់រដ្ឋាភិបាលក្នុងឆ្នាំ២០១៥ ។
វត្តមាននៃអ្នកចូលរួមក្នុងកម្មវិធីនេះ មានចំនួនជិត២០០នាក់ ដែលមកពីស្ថាប័នផ្សេងៗ ដូចជា តំណាងរាស្ត្រ មន្ត្រីរដ្ឋាភិបាល ក្រុមសង្គមស៊ីវិលមួយចំនួន និងនិស្សិតតាមសាកលវិទ្យាល័យ ដើម្បីវាយតម្លៃលទ្ធផលនៃការបំពេញនិងការអនុវត្តគោលនយោបាយ របស់រាជរដ្ឋាភិបាល តាមរយៈការបោះឆ្នោត។ គោលនយោបាយជាច្រើនវិស័យ ត្រូវបានលើកមកវាយតម្លៃនិងផ្តល់ពិន្ទុក្នុងវេទិកានេះ ដូចជា ការពារជាតិ និងសន្តិសុខជាតិ, រដ្ឋបាលសាធារណៈ, ការគ្រប់គ្រងដីធ្លី, វិស័យកសិកម្ម, វិស័យអប់រំ និងការបណ្តុះបណ្តាលវិជ្ជាជីវៈ, ការគ្រប់គ្រងម៉ាក្រូសេដ្ឋកិច្ច, ការរៀបចំហេដ្ឋារចនាសម្ព័ន្ធផ្លូវថ្នល់, ការគ្រប់គ្រងធនធានទឹក, ការគ្រប់គ្រងថាមពល, និងវិស័យសុខាភិបាល ជាដើម។
ជាលទ្ធផល ប្រជាពលរដ្ឋចំនួន៦២នាក់ ក្នុងចំណោម១៥៤នាក់ (៤០.៣ ភាគរយ) បានបោះឆ្នោតសម្តែងការមិនពេញចិត្តទាល់តែសោះ ខណៈដែលពលរដ្ឋចំនួន៦០នាក់ (៣៩ ភាគរយ) បានបោះឆ្នោតសម្តែងការពេញចិត្តខ្លះ ចំពោះការបំពេញនិងអនុវត្តគោលនយោបាយខាងលើ របស់រដ្ឋាភិបាលអាណត្តិទី៥ នាឆ្នាំ២០១៥កន្លងមក។
ចំណែកឯ ពលរដ្ឋ១៩នាក់ផ្សេងទៀត (១២.៣ ភាគរយ) បោះឆ្នោតសម្តែងការពេញចិត្តមធ្យម ហើយមានតែ ៦នាក់ ប៉ុណ្ណោះ (៣.៩ ភាគរយ) ដែលបោះឆ្នោតសម្តែងការពេញចិត្តច្រើន និង ៧នាក់ (៤.៥ ភាគរយ) បោះឆ្នោតសម្តែងការពេញចិត្តទាំងស្រុង។
អ្វីដែលគួរឲ្យគត់សម្គាល់នោះ គឺវិស័យសុខាភិបាល ទទួលការមិនពេញចិត្តធ្ងន់ធ្ងរជាងគេ ដែលប្រជាពលរដ្ឋ ៨០ ភាគរយ បានបោះឆ្នោតសម្តែងការមិនគាំទ្រ។ បន្ទាប់ពីវិស័យសុខាភិបាល វិស័យដីធ្លី ធនធានធម្មជាតិ កសិកម្ម ក៏ទទួលបានការមិនពេញចិត្តខ្លាំងដែរ ពីសំណាក់ប្រជាពលរដ្ឋ។
យ៉ាងណាក៏ដោយ នេះគ្រាន់តែជាលទ្ធផលដំបូង ដែលប្រារព្ធនៅរាជធានីភ្នំពេញប៉ុណ្ណោះ។ វេទិកានេះ នឹងត្រូវរៀបចំនៅតាមខេត្តបន្តទៀត ហើយក្រោយពីបញ្ចប់ អង្គការខុមហ្វ្រែល នឹងចេញរបាយការណ៍ជាផ្លូវការមួយ ដើម្បីបង្ហាញពីការពេញចិត្តនិងមិនពេញចិត្តរបស់ពលរដ្ឋម្ចាស់ឆ្នោត ចំពោះការអនុវត្តគោលនយោបាយរបស់រដ្ឋាភិបាល ក្នុងឆ្នាំ២០១៥ កន្លងមក៕
© រក្សាសិទ្ធិដោយ thmeythmey.com