ជាតិ
នយោបាយជាតិ
បក្សអំណាចខ្មែរ អញ្ជើញមេបក្សគ្មានអាសនៈ មកចងសម្ព័ន្ធជាលើកទី៣
× គណបក្សអំណាចពលរដ្ឋខ្មែរ គ្រោងអញ្ជើញគណបក្សនយោបាយទាំងអស់ ដែលមិនមានអាសនៈក្នុងរដ្ឋសភា មកចូលរួមប្រជុំពិភាក្សាបង្កើត «សម្ព័ន្ធគណបក្សគ្មានអាសនៈក្នុងសភាដើម្បីតស៊ូគោលនយោបាយរួម» មុនការចូលរួមបោះឆ្នោត នីតិកាលទី៦ ឆ្នាំ២០១៨។ នេះជាលើកទី៣ហើយ ដែលបក្សអំណាចខ្មែរនឹងដាក់លិខិតទៅកាន់ប្រមុខបក្សទាំងនោះ ក្រោយពីបរាជ័យក្នុងការប្រមូលផ្គុំពួកគេមកតស៊ូគោលនយោបាយ ចំនួន២លើក កន្លងមក។
លោក សួន សេរីរដ្ឋា ប្រធានគណបក្សអំណាចខ្មែរ បានសរសេរលើទំព័រហ្វេសប៊ុករបស់ខ្លួនថា បក្សអំណាចខ្មែរនឹងអញ្ជើញបក្សដែលទើបបង្កើតថ្មី និងបក្សបានចូលរួបបោះឆ្នោត តែគ្មានអាសនៈក្នុងសភា ជាថ្មីម្តងទៀត ដើម្បីបង្កើតសម្ព័ន្ធគណបក្សគ្មានកៅអីក្នុងសភា ក្នុងគោលបំណងតស៊ូគោលនយោបាយរួម មុនការចូលរួមបោះឆ្នោត នីតិកាលទី៦ ឆ្នាំ២០១៨។
ប្រមុខបក្សរូបនេះបានលើកឡើងបែបនេះថា៖«ចាំមើលការអញ្ជើញលើកទី៣ នេះ តើមេបក្សណា មានជាតិនិងទឹកដី នៅពីលើក្បាលពិតប្រាកដ?»។
អ្នកនាំពាក្យគណបក្សអំណាចខ្មែរ លោក ទេព វីរៈ បានប្រាប់សារព័ត៌មានថ្មីៗនៅព្រឹកនេះថា ការអញ្ជើញនេះ នឹងធ្វើឡើងនៅចុងខែមិនា ពោលគឺក្រោយពីបញ្ចប់សមាជគណបក្ស នៅថ្ងៃទី៨ មិនា ឆ្នាំ២០១៦ ។ លោកបន្ថែមថា ប្រសិនបើមេបក្សទាំងនោះនៅតែមិនចូលរួម នោះបានន័យថា ពួកគេកំពុងតែបង្ហាញពីចំណុចខ្សោយរបស់ខ្លួន ហើយក៏ជាភស្តុតាងបញ្ជាក់ថា ពួកគេ គិតតែអំណាចផ្ទាល់ខ្លួននិងប្រយោជន៍បក្ស ជាងប្រយោជន៍ជាតិដែរ។
លោក ទេព វីរៈ បានបញ្ជាក់ដូច្នេះថា៖«យើងធ្វើនេះដើម្បីប្រមូលកម្លាំងគ្នា ហើយធ្វើឲ្យយើងមានអណាចកាន់ខ្លាំង ដើម្បីទាមទារ អ្វីដែលជាប្រយោជន៍ជាតិ។ នេះជាប្រយោជន៍យើងទាំងអស់គ្នា មិនមែនប្រយោជន៍របស់បក្សណាឬបុគ្គលណាឡើយ អ៊ីចឹងហេតុបានជាមិនមកចូលរួម»។
សូមបញ្ជាក់ថា គណបក្សនយោបាយថ្មីចំនួន ៨ ត្រូវបានបង្កើតឡើង ដោយគិតត្រឹម ខែមិថុនា ឆ្នាំ២០១៥ ដល់ខែមករា ឆ្នាំ២០១៦ នេះ។ គណបក្សថ្មីទាំងនោះ គឺ គណបក្សសំបុកឃ្មុំសង្គមប្រជាធិបតេយ្យ, គណបក្សអំណាចខ្មែរ, គណបក្សប្រជាធិបតេយ្យមូលដ្ឋាន, គណបក្សខ្មែរសាមគ្គី, គណបក្សកម្ពុជាសេរីភាព, គណបក្សយុត្តិធម៌ជាតិខ្មែរ, គណបក្សជនជាតិដើមប្រជាធិបតេយ្យកម្ពុជា និងគណបក្សយុវជនកម្ពុជា៕
© រក្សាសិទ្ធិដោយ thmeythmey.com