ជាតិ
សេដ្ឋកិច្ច
ទុនវិនិយោគលើវិស័យសំណង់មានជាង៣ពាន់លានដុល្លារនៅឆ្នាំ២០១៥
× នៅក្នុងឆ្នាំ២០១៥ គម្រោងសាងសង់នៅទូទាំងប្រទេសមានចំនួន២,៣០៥គម្រោង លើផ្ទៃក្រឡាសំណង់សរុបចំនួន៧,៦៨៦,១១២ម៉ែត្រការ៉េ។ សម្រាប់គម្រោងសាងសង់ទាំងជាង២ពាន់គម្រោងនេះ មានតម្លៃប៉ានស្មានទុនវិនិយោគប្រមាណ៣,៣៣៨លានដុល្លារអាមេរិក កើនឡើង៣៣,១៤ភាគរយ បើធៀបនឹងឆ្នាំ២០៤។
ផ្អែកតាមរបាយការណ៍បូកសរុបលទ្ធផលនៃការអនុវត្តការងារប្រចាំ២០១៥ និងលើកទិសដៅការងារឆ្នាំ២០១៦ របសស់អគ្គនាយកដ្ឋានសំណង់ ចាប់ពីឆ្នាំ២០១៥ រហូតដល់ឆ្នាំ២០១៥ នៅរាជធានីភ្នំពេញ មានសំណង់អគារខ្ពស់ចាប់ពី ៥ជាន់រហូតដល់៥៥ជាន់ចំនួន៦៨៥អគារ និងមានបន្ទប់ស្នាក់នៅ(UNITS)ចំនួន១៣,៤២៣UNITS។
របាយការណ៍ដដែលបន្តថា បរិមាណនៃកម្លាំងពលកម្មនៅការដ្ឋានសំណង់បានកើនទេ្វដង បើធៀបទៅនឹងឆ្នាំ២០១៤ ដោយបានបង្កើតការងារដល់ប្រជាពលរដ្ឋពីជាង២សែន ទៅជាង២សែន៥ម៉ឺននាក់ក្នុងមួយថ្ងៃ។
ក្រៅពីបង្ហាញពីលទ្ធផលការងារដែលសម្រេចបាននៅឆ្នាំ២០១៥ អគ្គនាយកដ្ឋានសំណង់ ក៏បានលើកឡើងពីភាពខ្សោយ និងបញ្ហាប្រឈម ចំពោះការអនុវត្តការងាររបស់ខ្លួនផងដែរ។
«ខ្វះខាតធនធានមនុស្ស កម្លាំងពលកម្មជំនាញ និងគុណវុឌ្ឍិវិជ្ជាជីវៈពាក់ព័ន្ធ។ ឯកសារគតិយុត្ត និងលិខិតបទដ្ឋានសម្រាប់គ្រប់គ្រងក្នុងវិស័យសំណង់ ពុំទាន់បានឆ្លើយតបនឹងតម្រូវការជាក់ស្ដែង។ ការគ្រប់គ្រង និងការផ្ដល់សេវាសាធារណៈក្នុងវិស័យសំណង់ ក៏មិនទាន់មានប្រសិទ្ធភាពពេញលេញ និងឆ្លើយតបបានគ្រប់ជ្រុងជ្រោយ។ ការអនុវត្តច្បាប់ និងលិខិតបទដ្ឋានគតិយុត្តនានា ដែលស្ថិតនៅជាធរមាននៅពុំទាន់បានសមស្រប និងពុំទាន់មានប្រសិទ្ធភាព និងការធ្វេសប្រហែសរបស់មន្ត្រីជំនាញមួយចំនួន ក្នុងការចុះពិនិត្យតាមដានសំណង់ខុសឆ្គងក្នុងមូលដ្ឋានរបស់ខ្លួន និងពុំបានធ្វើរបាយការណ៍ស្ដីពីកំហុសឆ្គង ព្រមទាំងពុំបានបំពេញតួនាទីអ្នកត្រួតពិនិត្យការដ្ឋានសាងសង់»។ ទាំងនេះ សុទ្ធសឹងតែជាចំណុចខ្សោយ ដែលបានសរសេរនៅក្នុងរបាយការណ៍។
សម្រាប់បញ្ហាប្រឈមវិញ គឺបណ្តាលមកពីម្ចាស់សំណង់មួយចំនួនបានដំណើរការសាងសង់ដោយពុំបានសុំលិខិតអនុញ្ញាតសាងសង់ ឬសាងសង់មុនទទួលបានលិខិតអនុញ្ញាតសាងសង់ ឬសាងសង់ខុសពីលិខិតអនុញ្ញាត ដែលកត្តាទាំងនេះបង្កឲ្យមានទំនាស់ជាមួយអ្នកជិតខាង ប៉ះពាល់ដល់សោភណភាពទីក្រុង និងសុវត្ថិភាពសាធារណៈជាដើម៕
© រក្សាសិទ្ធិដោយ thmeythmey.com