កម្ពុជា នីការ៉ាហ្គា និងកូឡុំប៊ី ជាឋានសួគ៌សម្រាប់និវត្តជនដែលត្រូវការចំណាយតិច

ជាតិ

សង្គមជាតិ

កម្ពុជា នីការ៉ាហ្គា និងកូឡុំប៊ី ជាឋានសួគ៌សម្រាប់និវត្តជនដែលត្រូវការចំណាយតិច

01, Feb 2016 , 9:59 am

រូបភាព

ដោយ: ធីតា

គេហទំព័រអាមេរិក International Living បានចេញផ្សាយរបាយការណ៍ប្រចាំឆ្នាំរបស់ខ្លួន «Global Retirement Index 2016 » ដែលទាក់ទងនឹងការចាត់ចំណាត់ថ្នាក់ប្រទេសដែលជាឋានសួគ៌សម្រាប់និវត្តជន។ ក្នុងចំណោមប្រទេសទាំង២៣ កម្ពុជាជាប់ជាប្រទេសដ៏សុខដុម និងមានការចំណាយប្រាក់តិចជាងគេសម្រាប់និវត្តជន ដោយនាំមុខ នីការ៉ាហ្គា និងកូឡុំប៊ី។

របាយការណ៍ «Global Retirement Index 2016» បានធ្វើការបែកចែកលក្ខខណ្ឌ១០ប្រភេទទាក់ទងនឹងតម្រូវការរបស់និវត្តជន ដោយក្នុងនោះ ប្រទេសចំនួន២៣ ត្រូវបានវាយតម្លៃថា ជាឋានសួគ៌សម្រាប់ពលរដ្ឋវ័យចំណាស់ដែលមិនចង់ត្រឡប់ទៅផ្ទះវិញ ឬបន្តវិសមកាលរយៈពេលយូរ។

ក្នុងចំណោមប្រទេសទាំង២៣ដោយយោងតាមលក្ខខណ្ឌសរុប ប៉ាណាម៉ា អេក្វាឌ័រ ម៉ិកស៊ិក កូស្តារីកា ម៉ាឡេស៊ី និងកូឡុំប៊ី មានពិន្ទុខ្ពស់ជាងគេ ខណៈកម្ពុជា ស្ថិតនៅពីក្រោមសាធារណរដ្ឋដូមីនិច និងអៀរឡង់ តែនៅលើហ្គាតេម៉ាឡា និងវៀតណាម។

ទាក់ទងនឹងការចំណាយលើការរស់នៅវិញ កម្ពុជា ព្រះរាជាណាចក្រអច្ឆរិយៈ មានស្ថានល្អប្រសើរជាងគេបំផុតសម្រាប់និវត្តជនដែលត្រូវការចំណាយតិច ខណៈប្រទេសនៅតំបន់អាមេរិកឡាទីន នីការ៉ាហ្គា និងកូឡុំប៊ី ស្ថិតនៅលេខរៀងបន្ទាប់។

របាយការណ៍បានកត់សម្គាល់ថា និវត្តជននៅលើពិភពលោក ជាពិសេសពលរដ្ឋអាមេរិក ពិតជារីករាយក្នុងការស្នាក់នៅកម្ពុជា ជាមួយថ្លៃបន្ទប់ជួលតែប្រមាណ៣០០ដុល្លា ក្នុងមួយខែ ម្ហូបអាហារតំបន់ដែលមានសាច់គោ សាច់ជ្រូក ឬនំបញ្ចុកក្នុងតម្លៃពី៣ ទៅ៤ដុល្លារ ឬនៅភោជនីយដ្ឋានបែបអាមេរិក និងអឺរ៉ុបដែលមានតម្លៃពី៦ ទៅ៨ដុល្លារក្នុង១ពេល។ បន្ថែមពីលើនេះ ស្រាបារាំង ឬអូស្ត្រាលី ១ដបតម្លៃ ១០ដុល្លារ និងស្រាបៀរ១កែវតម្លៃ៥០សេន ពិតជាមិនថ្លៃនោះឡើយ។

នៅកម្ពុជា ប្រសិនបើនិវត្តជនចង់សន្សំសំចៃទៀតនោះ ពួកគាត់អាចទិញម្ហូបអាហារពីផ្សារទំនើបទុក ដោយចំណាយប្រមាណតែ១៥០ដុល្លារប៉ុណ្ណោះក្នុង១ខែ។ អ្វីដែលពិសេសជាងនេះទៀត តម្លៃហៅទូរសព្ទទៅក្រៅប្រទេស ទាប ហើយច្បាស់។ ក្រៅកម្ពុជា International Living បានណែនាំប្រទេសនីហ្គារ៉ាហ្គោ និងកូឡុំប៊ី សម្រាប់និវត្តជនដែលត្រូវការចំណាយតិច។

ប្រទេសទាំង២៣ដែលជាឋានសួគ៌សម្រាប់និវត្តជនរួមមាន ប៉ាណាម៉ា, អេក្វាឌ័រ, ម៉ិកស៊ិក, កូស្តារីកា, ម៉ាឡេស៊ី, កូឡុំប៊ី, ថៃ, នីការ៉ាហ្គា, អេស្ប៉ាញ, ព័រទុយហ្គាល់, ម៉ាល់តា, ហុងឌូរ៉ាស់, បារាំង, បេលីស, ប៉េរូ, អ៊ីតាលី, ហ្វីលីពីន, អ៊ុយរូហ្គាយ, សាធារណរដ្ឋដូមីនិច, អៀរឡង់, កម្ពុជា, ហ្គាតេម៉ាឡា និងវៀតណាម៕