សមត្ថកិច្ចបង្ក្រាបការជួញដូរគ្រឿងញៀនបានជាង២ពាន់ករណី

ជាតិ

សមត្ថកិច្ចបង្ក្រាបការជួញដូរគ្រឿងញៀនបានជាង២ពាន់ករណី

01, Feb 2016 , 10:56 am

រូបភាព

ដោយ:

សមត្ថកិច្ចបានបង្ក្រាបការជួញដូរគ្រឿងញៀនបានជាង២ពាន់ករណីនៅក្នុងឆ្នាំ២០១៥ ។ ចំនួននេះមានការកើនឡើងជាង១៣៦ភាគរយ បើធៀបនឹងឆ្នាំ២០១៤ ដែលសមត្ថកិច្ចបង្ក្រាបបានចំនួន៩៩៦ករណី។

បើតាមលោក គៀត ច័ន្ទថារិទ្ធ អគ្គស្នងការរងនគរបាលជាតិ ក្នុងការបង្ក្រាបជាង២ពាន់ករណីនេះ សមត្ថកិច្ចចាប់ខ្លួនអ្នកប្រព្រឹត្តបទល្មើសជួញដូរបានចំនួន៥ពាន់នាក់ កើនឡើងចំនួន១២៥ភាគរយ បើធៀបនឹងឆ្នាំ២០១៤ ក្នុងនោះមានជនបរទេស១០០នាក់ ១០សញ្ជាតិ។

នៅក្នុងពិធីសន្និបាតបូកសរុបលទ្ធផលការងារត្រួតពិនិត្យគ្រឿងញៀនឆ្នាំ២០១៥ និងទិសដៅការងារឆ្នាំ២០១៦ នៅព្រឹកនេះ លោក គៀត ច័ន្ទថារិទ្ធ បានបន្ថែមថា សមត្ថកិច្ចក៏បានចាប់ខ្លួនអ្នកប្រើប្រាស់គ្រឿងញៀនបានចំនួន១៦៥៧៧នាក់ ដែលជាចំនួនដ៏ច្រើននៅឆ្នាំ២០១៥ ។ ចំពោះវត្ថុតាងដែលសមត្ថកិច្ចដកហូតបានពីជនល្មើស រួមមាន គ្រឿងញៀន ៩៦ គីឡូក្រាម កញ្ឆាស្ងួតកន្លះតោន រថយន្ត ៤២ គ្រឿង ម៉ូតូ ៩៣៨ គ្រឿង អាវុធខ្លី១៨ដើម អាវុធវែង២ដើម និងទូរសព្ទជាង២ពាន់គ្រឿង។ នេះបើតាម លោក គៀត ច័ន្ទថារិទ្ធដដែល។

អគ្គស្នងការរងនគរបាលជាតិ ក៏បានគូសបញ្ជាក់ដែរថា ក្នុងឆ្នាំ២០១៥ សមត្ថកិច្ចបានបង្ក្រាបការជួញដូរគ្រឿងញៀនលេចធ្លោចំនួន២ករណី គឺជួញដូរពីឡាវ មកកម្ពុជា ដែលសមត្ថកិច្ចបង្ក្រាបបានគ្រឿងញៀន ម៉េតំហ្វេតាមីនជាង៥៤គីឡូក្រាម កញ្ឆាក្រៀម ១,៥ តោន និងប្រេងកញ្ឆា ១,៥គីឡូក្រាម។ ហើយសមត្ថកិច្ចក៏បានដុតបំផ្លាញកញ្ឆាបានចំនួន១ម៉ឺនដើម។

ប្រធានអាជ្ញាធរជាតិប្រយុទ្ធប្រឆាំងគ្រឿងញៀនលោក កែ គឹមយ៉ាន ទទួលស្គាល់ថា បញ្ហាគ្រឿងញៀននេះនៅតែជាបញ្ហាប្រឈមដ៏ធំនៅកម្ពុជា ដែលបន្តប៉ះពាល់ដល់សណ្ដាប់ធ្នាប់ សន្តិសុខសង្គម និងការអភិវឌ្ឍប្រទេសជាតិ ជាពិសេសគឺធ្វើឲ្យយុវវ័យនាំគ្នាភ្លើតភ្លើន ដែលនាំឲ្យធ្លាក់ចុះនូវសីលធម៌សង្គម។ តែយ៉ាងណាលោក អះអាងថា សមត្ថកិច្ចនឹងបន្តខិតខំបង្ក្រាបបទល្មើសគ្រឿងញៀននេះបន្ថែមទៀត ហើយសមត្ថកិច្ចក៏បន្តចុះអប់រំ និងផ្សព្វផ្សាយដល់ប្រជាពលរដ្ឋឲ្យយល់ដឹងកាន់តែច្បាស់បន្ថែមទៀត ពីផលប៉ះពាល់នៃគ្រឿងញៀននេះ៕