កម្ពុជាទិញអគ្គិសនីពីបរទេសជាង២៥ភាគរយ ក្នុងឆ្នាំ២០១៥

ជាតិ

សេដ្ឋកិច្ច

កម្ពុជាទិញអគ្គិសនីពីបរទេសជាង២៥ភាគរយ ក្នុងឆ្នាំ២០១៥

04, Feb 2016 , 7:59 am

រូបភាព

ដោយ: ខន ចំប៉ា

កម្ពុជាមានប្រភពអគ្គិសនីធំៗចំនួន២ គឺប្រភពអគ្គិសនីក្នុងស្រុក និងប្រភពអគ្គិសនីនាំចូលពីប្រទេសជិតខាង។ សម្រាប់ប្រភពអគ្គិសនីក្នុងស្រុក បានក្របដណ្តប់៧៤.២៧ភាគរយ នៃការប្រើប្រាស់អគ្គិសនីក្នុងស្រុកសរុប ខណៈបរិមាណអគ្គិសនីចំនួន២៥.៧៣ភាគរយទៀត បានមកពីការនាំចូលពីប្រទេសថៃ វៀតណាម និងប្រទេសឡាវ។

ផ្នែកតាមរបាយការណ៍វឌ្ឍនភាពរបស់វិស័យអគ្គិសនីរបស់កម្ពុជាឆ្នាំ២០១៥ ប្រភពអគ្គិសនីក្នុងស្រុក មានប្រភពីធ្យូងថ្មក្នុងអានុភាព៣៦៨មេហ្កាវ៉ាត់ ស្មើនឹង៣៦.៩០ភាគរយ វារីអគ្គិសនីក្នុងអានុភាព៩២៧មេហ្កាវ៉ាត់ ស្មើនឹង៣៣.២ភាគរយ ដុតប្រេងក្នុងអានុភាព២១៨មេហ្កាវ៉ាត់ ស្មើនឹង១.៩៦ភាគរយ ប្រភពពីBiomass ក្នុងអានុភាព១៦.៥៧មេហ្កាវ៉ាត់ ស្មើនឹង០.៦៤ភាគរយ ប្រភពផ្ទាល់របស់ឧស្សាហកម្ មក្នុងអានុភាព២៣.១៦មេហ្កាវ៉ាត់ ស្មើនឹង៧៨.៨០ភាគរយ និងប្រភពផ្ទាល់របស់សេវាករតូចៗក្នុងអានុភាព១៦.៣៨មេហ្កាវ៉ាត់ ស្មើនឹង០.២៥ភាគរយ។

សម្រាប់ប្រភពអគ្គិសនីក្រៅស្រុកវិញ គឺកម្ពុជានាំចូលប្រភពអគ្គិសនីពីប្រទេសថៃ ក្នុងអានុភាព១៣៥.៥០មេហ្កាវ៉ាត់ ស្មើនឹង៤.០៧ភាគរយ ពីវៀតណាមក្នុងអានុភាព២៧៧មេហ្កាវ៉ាត់ ស្មើនឹង២១.៣៧ភាគរយ និងនាំចូលពីប្រទេសឡាវក្នុងអានុភាព ៤ មេហ្កាវ៉ាត់ ស្មើនឹង០.២៩ភាគរយ។

សូមបញ្ជាក់ថាបច្ចុប្បន្នមានប្រជាពលរដ្ឋតែ៦៥ភាគរយប៉ុណ្ណោះនៅក្នុងប្រទេសកម្ពុជា មានអគ្គិសនីប្រើប្រាស់។ ទន្ទឹមនឹងនេះ អាត្រាតម្លៃក៏មានតម្លៃខ្ពស់ផងដែរ។ នៅក្នុងបទសម្ភាសជាមួយសារព័ត៌មានថ្មីៗកាលពីពេលកន្លងទៅ លោក កែវ រតនៈ ប្រតិភូរាជរដ្ឋាភិបាលទទួលបន្ទុកអគ្គនាយកអគ្គិសនីកម្ពុជា បានបញ្ជាក់ថាយ៉ាងយូរត្រឹមឆ្នាំ២០២០ ប្រជាពលរដ្ឋគ្រប់ផ្ទះទាំងអស់នៅទូទាំងប្រទេសកម្ពុជា នឹងមានអគ្គិសនីប្រើប្រាស់ដែលភ្ជាប់ចេញពីខ្សែបណ្តាញអគ្គិសនីរបស់ជាតិ ហើយអាចប្រើប្រាស់ក្នុងតម្លៃទាបសមរម្យ។ បើតាមលោក កែវ រតនៈ កម្ពុជាត្រូវដាក់ទុនជិត១ពាន់លានដុល្លារទៀត ដើម្បីសាងសង់ខ្សែបញ្ជូនតង់ស្យុងខ្ពស់ និងខ្សែបញ្ជូនរងតង់ស្យុងមធ្យម និងខ្សែតង់ស្យុងទាបចែកចាយឲ្យទៅដល់គ្រប់ផ្ទះនៅតំបន់នានានៅទូទាំងប្រទេស៕