ខេត្តចំនួន៥នឹងរងអាកាសធាតុត្រជាក់ពី១៥-១៧អង្សានៅសប្តាហ៍ក្រោយ

ជាតិ

ខេត្តចំនួន៥នឹងរងអាកាសធាតុត្រជាក់ពី១៥-១៧អង្សានៅសប្តាហ៍ក្រោយ

04, Feb 2016 , 10:33 am

រូបភាព

ដោយ: ខន ចំប៉ា

អាកាសធាតុនៅក្នុងបណ្តាខេត្តចំនួន៥ នៅក្នុងប្រទេសកម្ពុជា នឹងចុះត្រជាក់ដល់១៥ទៅ១៧អង្សាសេ រយៈពេល៣ថ្ងៃ គឺចាប់ពីថ្ងៃទី៧ដល់ថ្ងៃទី៩ខែកុម្ភៈខាងមុខ។ បណ្តាខេត្តទាំង៥នោះ រួមមាន ខេត្តរតនគិរី មណ្ឌលគិរី ព្រះវិហារ ឧត្តរមានជ័យ និងបន្ទាយមានជ័យ។ នេះបើយោងតាមសេចក្តីជូនដំណឹងរបស់នាយកដ្ឋានឧតុនិយម។

បើតាមសេចក្តីជូនដំណឹងដដែល អាកាសធាតុចុះត្រជាក់នេះ គឺដោយសារតែសម្ពាធបរិយាកាសខ្ពស់នៅលើប្រទេសចិន បាននិងកំពុងបង្កើនឥទ្ធិពលសាជាថ្មីទៀតមកលើប្រទេសកម្ពុជា។

លោក អ៊ុំ រីណា ប្រធាននាយកដ្ឋានឧតុនិយម បានបញ្ជាក់ប្រាប់សារព័ត៌មានថ្មីៗនៅថ្ងៃនេះថា នៅថ្ងៃទី៧ដល់ទី៩ខែកុម្ភៈនេះ មិនត្រឹមតែអាកាសធាតុចុះត្រជាក់ពី១៥ទៅ១៧អង្សាសេទេ ប៉ុន្តែវាក៏បាននាំមកជាមួយនូវខ្យល់ធ្លាក់ ដែលមានល្បឿនពី៥ទៅ៧ម៉ែត្រក្នុងមួយវិនាទីផងដែរ។ ដូច្នេះសូមឲ្យប្រជាពលរដ្ឋដែលរស់នៅតាមបណ្តាខេត្តទាំងនោះ យកចិត្តទុកដាក់ បង្ការ និងការពារចំពោះអាកាសធាតុចុះត្រជាក់នេះ ជាពិសេសកូនក្មេង និងមនុស្សចាស់។ នេះជាការបន្ថែមរបស់លោក អ៊ុំ រីណា។

បើតាមមន្ត្រីជំនាញដដែល ពីថ្ងៃទី៧ដល់ទី៩ខែកុម្ភៈបណ្តាខេត្តចំនួន៤ទៀត ក៏មានអាកាសធាតុចុះត្រជាក់ខ្លាំងដែរ គឺខេត្តបាត់ដំបង ប៉ៃលិន សៀមរាប និងខេត្តស្ទឹងត្រែង។ បើតាមលោកប្រធាននាយកដ្ឋានឧតុនិយម ខេត្តទាំង៤នេះ នឹងមានសីតុណ្ហភាពអប្បរមាពី១៧ដល់១៩អង្សាសេ សីតុណ្ហភាពអតិបរិមាពី២៨ដល់៣០អង្សាសេ និងមានខ្យល់ធ្លាក់ដែលមានល្បឿនពី៤ទៅ៦ម៉ែត្រក្នុងមួយវិនាទី។

ដោយឡែកសម្រាប់បណ្តាខេត្តផ្សេងទៀត រួមទាំងរាជធានីភ្នំពេញផង អាកាសធាតុមិនមានការប្រែប្រួល ឬត្រជាក់ខ្លាំងឡើយ គឺអាចមានសីតុណ្ហភាពចន្លោះពី២០ ទៅ២២អង្សា៕