ជាតិ
សង្គមជាតិ
ក្រសួងសុខាភិបាលបើកយុទ្ធនាការកម្ចាត់មូសការពារវីរុសZika
× នៅព្រឹកថ្ងៃព្រហស្បតិ៍នេះ មន្ត្រីនាយកដ្ឋានប្រយុទ្ធប្រឆាំងនឹងជំងឺគ្រុនឈាម និងជំងឺគ្រុនចាញ់ បានធ្វើសកម្មភាពបាញ់ថ្នាំសម្លាប់មូស ដើម្បីពិនិត្យមើលវីរុស Zika ដែលកំពុងតែរាលដាលនៅតំបន់អាហ្វ្រិក និងអាមេរិកខាងត្បូង។
មន្ត្រីនាយកដ្ឋានប្រយុទ្ធប្រឆាំងនឹងជំងឺគ្រុនឈាម និងជំងឺគ្រុនចាញ់ ប្រមាណ១៥ នាក់ នៅព្រឹកនេះ បានចុះបាញ់ថ្នាំសម្លាប់មូសនៅតាមផ្ទះពលរដ្ឋដែលរស់នៅក្បែរផ្លូវរថភ្លើងក្នុងសង្កាត់ទួលសង្កែ។ យុទ្ធនាការនេះ ក៏ដើម្បីចាប់មូសពិនិត្យរកវីរុស Zika ក្រែងរាលដាលមកដល់ប្រទេសកម្ពុជា។ ជាងនេះទៀត មន្ត្រី ក៏ប្រាប់ពលរដ្ឋឲ្យលាងសម្អាតពាងទឹកជាប្រចាំផងដែរ កុំឲ្យមូសកើតច្រើន។
ជំងឺដែលបង្ករដោយវីរុស Zika នេះមានរោគសញ្ញា ដូចជា គ្រុនក្ដៅស្រាល ឈឺក្បាល កន្ទួលក្រហមលើស្បែក ក្រហមភ្នែក ឈឺសន្លាក់ ហើយភាគច្រើនជាវិញពី២ទៅ៧ថ្ងៃ។ សម្រាប់អត្រាស្លាប់ដែលបណ្ដាលដោយជំងឺនេះមានកម្រិតតិចតួច ប៉ុន្តែវីរុសនេះអាចវិវត្តន៍ទៅជាទន់ដៃជើង ទារកអាចស្លាប់ក្នុងផ្ទៃម្ដាយ និងក្បាលទារកតូចជាដើម។ វីរុសនេះ ក៏មិនទាន់មានថ្នាំព្យាបាល និងវ៉ាក់សាំងសម្រាប់ការពារនៅឡើយនោះទេ។ ចំណែកការព្យាបាល គឺត្រូវធ្វើតាមការគាំទ្រវេជ្ជសាស្ត្រ។ ដើម្បីបង្ការជំងឺនេះ គឺត្រូវបំផ្លាញជំរកមូល និងការពារកុំឲ្យមូសខ្លាខាំ។
នៅឆ្នាំ២០១០ វីរុស Zika ត្រូវបានរកឃើញនៅកម្ពុជា និងឆ្នាំ២០១២ ដល់ឆ្នាំ២០១៤ រកឃើញនៅក្នុងប្រទេសថៃតែត្រូវបានធ្វើការទប់ស្កាត់ទាន់ពេលបានមួយចំនួន។ ចំណែកខែមករា ឆ្នាំ២០១៦ ជំងឺនេះត្រូវបានគេរកឃើញនៅក្នុងប្រទេសតៃវ៉ាន់។
គួបញ្ជាក់ថា វីរុស នេះរកឃើញដំបូងនៅលើសត្វស្វាក្នុងឆ្នាំ១៩៤៧ និងលើមនុស្ស ក្នុងឆ្នាំ១៩៥២ នៅប្រទេស Uganda នៃទ្វីបអាហ្វ្រិក។ វីរុសZika រាតត្បាតខ្លាំងឡើងបន្ទាប់ពីការទាត់បាល់ពិភពលោកនៅប្រទេសប្រេស៊ីលឆ្នាំ២០១៤ ហើយធ្លាប់បានផ្ទុះឡើងនៅទ្វីបអាហ្វ្រិក អាមេរិក និងអាស៊ីប៉ាស៊ីហ្វិកផងដែរ៕
© រក្សាសិទ្ធិដោយ thmeythmey.com