អាជ្ញាធរហាមមិនឲ្យដុតផាវ កាំជ្រួច លេងល្បែងស៊ីសង នៅថ្ងៃបុណ្យចូលឆ្នាំចិន

ជាតិ

អាជ្ញាធរហាមមិនឲ្យដុតផាវ កាំជ្រួច លេងល្បែងស៊ីសង នៅថ្ងៃបុណ្យចូលឆ្នាំចិន

04, Feb 2016 , 1:22 pm

រូបភាព

ដោយ:

ភ្នំពេញ៖ សាលារាជធានីភ្នំពេញបានហាមប្រាមជាដាច់ខាតរាល់ការដុតផាវ កាំជ្រួច ឧបករណ៍បង្កសំឡេងផ្ទុះគ្រប់ប្រភេទ និងការលេងល្បែងស៊ីសងគ្រប់ប្រភេទ ព្រមទាំងរាល់ការហែក្បួនប្រពៃណី និងសាសនាដែលគ្មានការអនុញ្ញាត ក្នុងឱកាសបុណ្យចូលឆ្នាំប្រពៃណីចិន និងវៀតណាមរយៈពេល ៤ថ្ងៃចាប់ពីថ្ងៃទី៧ ដល់ទី១០ ខែកុម្ភៈ ឆ្នាំ២០១៦នេះ។ រាល់ការលក់ផាវកាំជ្រួចអាជ្ញាធរត្រូវត្រួតពិនិត្យដកហូតវត្ថុទាំងនោះ នៅគ្រប់កន្លែងក្នុងរាជធានីភ្នំពេញ។

តាមសេចក្តីជូនដំណឹងរបស់សាលារាជធានីភ្នំពេញស្តីពី ការៀបចំសន្តិសុខ សណ្តាប់ធ្នាប់ និងរបៀបរៀបរយសាធារណៈ ក្នុងឱកាសបុណ្យចូលឆ្នាំប្រពៃណីចិន និងវៀតណាម ចុះថ្ងៃទី៤ កុម្ភៈនេះ វិធានការណែនាំអាជ្ញាធរពាក់ព័ន្ធ សមាគម ក្រុមហ៊ុនឯកជន អង្គការមិនមែនរដ្ឋាភិបាល និងសាធារណជនក្នុងរាជធានីភ្នំពេញនេះ មានគោលបំណងរក្សានូវសន្តិសុខសុវត្ថិភាព សណ្តាប់ធ្នាប់ និងរបៀបរៀបរយសាធារណៈក្នុងរាជធានីភ្នំពេញ។

សាលារាជធានីណែនាំអាជ្ញាធរក្រោមឱវាទ និងវិស័យឯកជនត្រូវរក្សាសន្តិសុខ សុវត្ថិភាព សណ្តាប់ធ្នាប់សាធារណៈ សេចក្តីថ្លៃថ្នូរ និងត្រូវប្រុងប្រយ័ត្ន ចំពោះការអុជទៀនធូប ក្រដាស សែន ភ្លើងចង្ក្រាន ចរន្តអគ្គិសនី ដែលអាចបង្កគ្រោះអគ្គិសនីជាយថាហេតុ។ ចំពោះការដុត ក្រដាសសែន អាជ្ញាធរណែនាំសាធារណជនឲ្យប្រើប្រាស់ធុងដែក ឬឆ្នាំង ដើម្បីដុតក្រដាស សែន ហើយហាមដាច់ខាតការដុតលើចិញ្ចើមផ្លូវ និងទ្រូងផ្លូវសាធារណៈ។

លើសពីនេះ សាលារាជធានីបានណែនាំ អាជ្ញាធរមានសមត្ថកិច្ចគ្រប់លំដាប់ថ្នាក់ ចាត់វិធានការទប់ស្កាត់ឲ្យបានម៉ឹងម៉ាត់បំផុត កុំឲ្យមានការនាំចូលផាវ កាំជ្រួច ជាតិផ្ទុះគ្រប់ប្រភេទ តាមច្រកចេញចូលរាជធានីភ្នំពេញ និងត្រូវត្រួតពិនិត្យដកហូតវត្ថុតាង ដែលមានតាំងលក់នៅគ្រប់កន្លែងក្នុងរាជធានីភ្នំពេញ ចាប់ពីពេលនេះ។

តាមរយៈលិខិតខាងលើ សាលារាជធានី បានបន្តណែនាំកម្លាំងមានសមត្ថកិច្ច អាជ្ញាធរសាលាខណ្ឌ និងសង្កាត់ ឲ្យផ្សព្វផ្សាយណែនាំមន្ត្រីរាជការ និយោជិត កម្លាំងក្រោមឱវាទ និងប្រជាពលរដ្ឋក្នុងមូលដ្ឋាន ព្រមទាំងចេញបទបញ្ជាអនុវត្តឲ្យបានម៉ឹងម៉ាត់តាមការណែនាំនេះ ប្រកបដោយប្រសិទ្ធភាព។

សាលារាជធានីភ្នំពេញ បញ្ជាក់ថា ជនណាបំពានលើសេចក្តីណែនាំខាងលើនេះ ឬប្រព្រឹត្តល្មើសបង្កឲ្យមានចលាចលក្នុងសង្គម បាត់បង់សណ្តាប់ធ្នាប់ សន្តិសុខ សុវត្ថិភាព និងរបៀប រៀបរយសាធារណៈ ត្រូវទទួលទោសតាមច្បាប់ជាធរមាន៕