នាយកផ្នែករៀបចំកម្មវិធីកម្សាន្តនៅមជ្ឈមណ្ឌលកម្សាន្តណាហ្គាវើល លោក Nuno Bastos បានចាត់ទុកអត្តពលិកជាអ្នកដើរដ៏សំខាន់ក្នុងការធ្វើជាគំរូ និងជាអ្នក ជំរុញទឺកចិត្តដ៏ មានឥទ្ធិពលមួយសម្រាប់យុវជនយុវនារីកម្ពុជា។ ការលើកឡើងបែប នេះនាសន្និសីទ សារព័ត៌មានស្តីពីការរៀបចំពានរង្វាន់ដល់អត្តពលិកកម្ពុជាប្រចាំឆ្នាំ២០១៥» កាលពីថ្ងៃទី២ ខែកុម្ភៈ នៅទីស្នាក់ការ NOCC។
លោក Nuno Bastos នាយកផ្នែករៀបចំកម្មវិធីកម្សាន្តនៅអគារពាណិជ្ជកម្មណាហ្គាវើល បានចាត់ទុកអត្តពលិកជាអ្នកដើរតួយ៉ាងសំខាន់សម្រាប់ធ្វើជាគំរូ និងជាអ្នកជំរុញទឹកចិត្តដ៏មានឥទ្ធិពលសម្រាប់យុវជន យុវនារីកម្ពុជា ក្នុងការបង្កើតឲ្យមានការរីកចម្រើនខាងផ្នែកវិស័យកីឡា និងជាកត្តាមួយចូលរួមចំណែកក្នុងការអភិវឌ្ឍសង្គមកម្ពុជា។
នាសន្និសីទសារព័ត៌មានស្តីពីការៀបចំរង្វាន់ដល់អត្តពលិកកម្ពុជាឆ្នើមឆ្នាំ២០១៥» នៅទីស្នាក់ការគណៈកម្មាធិការជាតិអូឡាំពិកកម្ពុជា កាលពីថ្ងៃទី២ ខែកុម្ភៈ លោក Nuno Bastos ក្នុងនាមតំណាងក្រុមហ៊ុនណាហ្គាវើលបានសង្ឃឹមយ៉ាងមុតមាំថា ការរៀបចំកម្មវិធីលើកទឹកចិត្តក្នុងវិស័យកីឡា ជាកត្តាមួយជួយលើកទឹកចិត្ត និងជំរុញក្នុងការអភិវឌ្ឍដល់វិស័យកីឡា ក្នុងការផ្តល់ផលវិជ្ជមានដល់យុវជនយុវនារីកម្ពុជា ហើយកត្តានេះវាដើរតួនាទីយ៉ាងសំខាន់ក្នុងស្ថាបនាប្រទេសកម្ពុជា។
ជាមួយគ្នានេះដែរ លោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា បានរៀបចំកម្មវិធីប្រគល់រង្វាន់ដល់អត្តពលិកកម្ពុជាជាលើកដំបូង ដែលទទូលបានការសហការជាមួយក្រុមហ៊ុនណហា្គវើល នាថ្ងៃទី១៨ ខែកុម្ភៈ នៅមជ្ឈមណ្ឌលកម្សាន្តណហ្គាវើល ដើម្បីផ្តល់ប្រាក់រង្វាន់ទទួលស្គាល់ស្នាដៃឆ្នើមរបស់អត្តពលិកកម្ពុជា ថ្នាក់ដឹកនាំកីឡា និងសារព័ត៌មានទាំងអស់ ដែលបាននាំស្នាដៃ កិត្តិយស និងជ័យជំនះ ក្នុងរយៈពេលមួយឆ្នាំកន្លងមក។
ទន្ទឹមនឹងនេះ ការរៀបចំកម្មវិធីប្រគល់រង្វាន់ដល់អត្តពលិកកម្ពុជា បានធ្វើឲ្យកីឡាករកីឡាការិនីមួយចំនួនសម្តែងការគាំទ្រយ៉ាងខ្លាំង និងបានចាត់ទុកថា វាជាកត្តាមួយជួយលើកទឹកចិត្ត និងជំរុញឲ្យអត្តពលិកកម្ពុជា ក៏ដូចថ្នាក់ដឹកនាំកីឡាខិតខំប្រឹងប្រែងហ្វឹកហាត់ និងបំពេញការងារកាន់តែមានប្រសិទ្ធភាពបន្ថែមទៀត។
ជាមួយគ្នានេះកីឡាការិនីម្ចាស់មេដាយមាសកីឡាតេក្វាន់ដូប្រចាំទ្វីបអាស៊ីឆ្នាំ២០១៤ ស៊ន សៀវម៉ី បានសម្តែងការគាំទ្រយ៉ាងខ្លាំងចំពោះកម្មវិធីមួយនេះ ព្រោះវាជាកម្មវិធីដែលអាចជួយជំរុញកីឡាករកីឡាការិនីខិតខំប្រឹងប្រែងហ្វឹតហាត់ ក៏ដូចជាយកចិត្តទុកដាក់ក្នុងការប្រកួតឲ្យកាន់ល្អ។ កីឡាការិនីតេក្វាន់ដូម្នាក់នេះបានជំរុញកីឡាករកីឡាការិនីជំនាន់ក្រោយត្រូវខិតខំប្រឹងប្រែងហ្វឹកហាត់ឲ្យកាន់តែខ្លាំង ដើម្បីទទួលបានជ័យលាភី និងក្លាយជាអត្តពលិកឆ្នើមក្នុងការលើកមុខមាត់ប្រទេស និងខ្លួនឯង។
កីឡាការិនីម្នាក់នេះបញ្ជាក់ថា៖«សម្រាប់ខ្ញុំមិនមានអ្វីនោះទេ មានតែឲ្យពួកគាត់ខិតខំប្រឹងប្រែងហ្វឹកហាត់ដើម្បីប្រទេសជាតិ ក៏ដូចជាដើម្បីខ្លួនឯង ក្នុងការទទួលបានជ័យលាភីជាកីឡាឆ្នើម និងមានប្រជាប្រិយក្នុងឆ្នាំបន្តបន្ទាប់»។
ក្នុងនាមជាបេក្ខភាពមួយរូបដែលបានឈរឈ្មោះក្នុងការបោះឆ្នោតជាអត្តពលិកដែលមានប្រជាប្រិយភាពប្រចាំឆ្នាំ២០១៥ កីឡាការិនី ស៊ន សៀវម៉ី មិនបានដាក់ក្តីសង្ឃឹមនោះទេសម្រាប់ការបោះឆ្នោតនេះ ព្រោះគេគិតថាមានបេក្ខភាពឈរឈ្មោះច្រើនរូប ហើយវាអាស្រ័យទៅលើការគាំទ្ររបស់បងប្អូនប្រជាពលរដ្ឋ។ មិនត្រឹមតែប៉ុណ្ណោះទោះបីជារូបគេមិនទទួលបានពានរង្វាន់ក៏ដោយ ក៏រូបគេសប្បាយចិត្តព្រោះវាជាកម្មវិធីមួយដ៏ល្អ។
កីឡាការិនីម្នាក់នេះបានបញ្ជាក់ថា៖«សម្រាប់ខ្ញុំអត់ទាន់ហ៊ានគិតដែរបង ព្រោះអីមានអត្តពលិកឆ្នើមៗជាច្រើនរូបចូលរួម ហើយសម្រាប់ខ្ញុំមិនទាន់ដឹងដែរ វាអាស្រ័យទៅលើការបោះឆ្នោតគាំទ្ររបស់បងប្អូនប្រជាពលរដ្ឋ»។
ជាមួយគ្នានេះដែរ កីឡាករបាល់ទាត់ជម្រើសជាតិ និងខ្សែប្រយុទ្ធវ័យក្មេងដ៏ឆ្នើមប្រចាំក្លិបបឹងកេតអង្គរ ចាន់ វឌ្ឍនាកា វិញក៏បានសម្តែងអារម្មណ៍សប្បាយរីករាយ និងគាំទ្រ ដូចកីឡាការិនី ស៊ន សៀវម៉ី ដែរ ចំពោះការបង្កើតឲ្យកម្មវិធីនេះ ដោយរូបគេបានចាត់ថា វាជាកម្មវិធីមួយដែលអាចជួយទាក់ទាញកីឡាករកីឡាការិនីជំនាន់ក្រោយចូលហ្វឹកហាត់កាន់តែច្រើន។ ហើយរូបគេបានជឿជាក់យ៉ាងមុតមាំថា កម្មវិធីមួយនេះនឹងធ្វើឲ្យវិស័យកីឡាកាន់តែមានភាពរីកចម្រើន លើសពីនេះវានឹងជំរុញកីឡាករកីឡាការិនីកាន់តែខិតខំប្រឹងប្រែងហ្វឹកហាត់កានតែខ្លាំង។
កីឡាករម្នាក់នេះបញ្ជាក់ថា៖«ខ្ញុំជឿថាកម្មវិធីនេះនឹងជួយឲ្យកីឡាយើងកាន់តែមានភាពរីកចម្រើនកាន់តែខ្លាំងទៀត ព្រោះអីបើមានកម្មវិធីកាន់ច្រើនវាកាន់ធ្វើឲ្យកីឡាករកីឡាការិនីហ្វឹកហាត់កាន់តែខ្លាំង»។
កីឡាករបាល់ទាត់ឆ្នើមវ័យក្មេងម្នាក់នេះបានប្តេជ្ញាថា រូបគេនឹងជួយឲ្យកីឡាបាល់ទាត់នៅកម្ពុជាមានភាពល្បីរន្ទឺ និងធ្វើឲ្យពិភពលោកស្គាល់វិស័យកីឡានៅកម្ពុជាកាន់តែខ្លាំង៕