ជាតិ
នយោបាយជាតិ
×![]()
ដោយ: ម៉ៅ សុផា
ក្រុមស្រាវជ្រាវព្រំដែនកម្ពុជា-វៀតណាម បានរកឃើញបង្គោលចំនួន ១០០០ ហើយ ក្រោយពីចំណាយពេលជាង ៧ខែ ក្នុងការស្រាវជ្រាវ។ ក្នុងចំណោមបង្គោលទាំង១០០០ នោះ មានបង្គោលខ្លះ កម្ពុជាបានបោះចូលទឹកដីវៀតណាម ហើយមានបង្គោលខ្លះទៀត វៀតណាម បានដាំចូលទឹកដីកម្ពុជា។ 
ក្រោយពីស្រាវជ្រាវព្រំដែនកម្ពុជា-វៀតណាមអស់រយៈពេលជាង៧ខែមកនេះ ក្រុមស្រាវជ្រាវព្រំដែនកម្ពុជា-វៀតណាម បានកត់សម្គាល់ឃើញថា កម្ពុជានិងវៀតណាម បានបោះបង្គោលចូលទឹកដីគ្នាទៅវិញទៅមក។ នេះបើតាមលោក សុខ ទូច ប្រធានក្រុមស្រាវជ្រាវព្រំដែនកម្ពុជា ដែលបានបកស្រាយក្នុងសន្និសីទកាសែត ស្តីពីដំណើរការទូទៅនៃការស្រាវជ្រាវព្រំដែនកម្ពុជា-វៀតណាម នៅរាជបណ្ឌិត្យសភាកម្ពុជា នាពេលព្រឹកថ្ងៃទី៤ កុម្ភៈ នេះ។
លោក សុខ ទូច បានអះអាងថា កន្លងមក ភាគីកម្ពុជា តែងប្រតិកម្មខ្លាំងៗ ទៅនឹងភាគីវៀតណាម ព្រោះប្រជាពលរដ្ឋកម្ពុជាផ្តោតអារម្មណ៍ទៅលើទិដ្ឋភាពតែមួយជ្រុងប៉ុណ្ណោះ។ លោកបន្តថា ពលរដ្ឋកម្ពុជា មើលឃើញតែកន្លែងណាដែលវៀតណាមបោះបង្គោលលើទឹកដីកម្ពុជា តែមិនបានមើល តំបន់ផ្សេងដែលកម្ពុជា បានបោះបង្គោលចូលទឹកដីវៀតណាម នោះទេ។
លើសពីនេះទៀត លោក សុខ ទូច បានសង្កត់ធ្ងន់ៗថា ការស្រាវជ្រាវព្រំដែននេះ មិនបានផ្តល់ផលចំណេញឬខាតបង់ទឹកដី នៃប្រទេសកម្ពុជានិងវៀតណាម ឡើយ តែជាការស្វែងរកការពិត និងសុក្រឹតភាពនៃព្រំដែនរវាងប្រទេសទាំងពីរ។ ប្រធានក្រុមស្រាវជ្រាវព្រំដែនរូបនេះបានបញ្ជាក់បែបនេះថា៖«បើនិយាយថាយើងចំណេញ មិនត្រូវទេ ហើយបើនិយាយថាវៀតណាមចំណេញក៏មិនត្រូវដែរ។ គ្មានខាងណាចំណេញ ឬខាងណាខាតនោះទេ។ កុំនិយាយរឿងចំណេញ តែនិយាយរឿងត្រឹមត្រូវវិញ។ បើនិយាយថាយើងចំណេញ វៀតណាមមិនសប្បាយចិត្តឡើយ តែបើថាខ្មែរខាត ក៏ខ្មែរមិនសប្បាយចិត្តដែរ»។
សូមស្តាប់ប្រសាសន៍របស់ លោក សុខ ទូច
Tag:
ព្រំដែន
សុខ ទូច
© រក្សាសិទ្ធិដោយ thmeythmey.com
