អន្តរជាតិ
រដ្ឋាភិបាលបង់ក្លាដែស រ៉ាប់រងលើការវះកាត់របស់ «បុរសរុក្ខជាតិ»
× រដ្ឋាភិបាលបង់ក្លាដែសនឹងរ៉ាប់រងរាល់ការចំណាយការវះកាត់របស់លោក Abul Bajandar ដែលមានឈ្មោះថា «បុរសរុក្ខជាតិ» ដោយការកើតជំងឺដ៏កម្រនៅលើខ្លួន ជាពិសេសដៃជើងរបស់លោក។ នេះបើតាមការផ្សាយរបស់ BBC។
លោក Abul Bakandar បានកើតជំងឺដ៏កម្រមួយដោយដៃជើងរបស់លោកដុះសាច់ដែលមានលក្ខណៈដូចជាដើមឈើ ហើយមានការវិវត្តកាន់ធំទៅៗ នារយៈពេល១០ឆ្នាំកន្លងមកនេះ។ បច្ចុប្បន្នលោកមានអាយុ២៦ឆ្នាំ ដែលជាឪពុកនៃគ្រួសារមួយនៅស្រុក Khulna ភាគខាងត្បូងប្រទេសបង់ក្លាដែស។
កង្វល់ដ៏ធំបំផុតនោះ គឺសាច់ដែលដុះលើដៃ និងជើងរបស់លោកកាន់តែរីកធំ ដោយមានទម្ងន់ជាង៥គីឡូក្រាម។ រដ្ឋមន្ត្រីក្រសួងសុខាភិបាលបង់ក្លាដែស លោក Mohammad Nasim បានប្រកាសថា រដ្ឋាភិបាលនឹងទទួលរ៉ាប់រងទាំងស្រុងលើការវះកាត់របស់លោក Bajandar។
នេះការរំលែកក្តីកង្វល់របស់ក្រុមគ្រួសារលោក Bajandar ពីព្រោះកន្លងមក ពួកគេបានត្អូញត្អែរថា ខ្លះលទ្ធភាពក្នុងការបញ្ជូនគាត់ទៅព្យាបាលនៅឥណ្ឌា ដែលជាប្រទេសជិតខាង។ លោកវេជ្ជបណ្ឌិត Abul Kalam បានបញ្ជាក់ប្រាប់ BBC ថា គំរូឈាម និងស្បែករបស់លោក Bajandar ត្រូវបានបញ្ជូនទៅមន្ទីរពិសោធន៍នៅសហរដ្ឋអាមេរិក។
លោក Samanta Lal Sen នាយកមន្ទីរពេទ្យ Dhaka Medical College Hospital បានអះអាងថា ករណីជំងឺ «Tree Man Disease» នេះមានតែបីករណីប៉ុណ្ណោះនៅលើពិភពលោក ហើយនេះជាករណីលើកដំបូងនៅក្នុងប្រទេសបង់ក្លាដែស៕
© រក្សាសិទ្ធិដោយ thmeythmey.com