Hinrich ផ្តល់អាហារូបករណ៍ថ្នាក់អនុបណ្ឌិតគ្រប់គ្រង និងសារព័ត៌មាន នៅអាមេរិក និងហុងកុង

ជាតិ

Hinrich ផ្តល់អាហារូបករណ៍ថ្នាក់អនុបណ្ឌិតគ្រប់គ្រង និងសារព័ត៌មាន នៅអាមេរិក និងហុងកុង

06, Feb 2016 , 9:00 am

រូបភាព

ដោយ: ថ្មីៗ

ភ្នំពេញ៖ Hinrich Foundation ប្រកាសជ្រើសរើសនិស្សិតអាហារូបករណ៍ថ្នាក់អនុបណ្ឌិតមួយចំនួនទៅបន្តការសិក្សាលើជំនាញគ្រប់គ្រង (Master of Global Management) នៅសាកលវិទ្យាល័យ Thunderbird សហរដ្ឋអាមេរិក និងអនុបណ្ឌិតសារព័ត៌មានអន្តរជាតិ (Master in International Journalism) នៅសាកលវិទ្យាល័យ Hong Kong Baptist University ទីក្រុងហុងកុង។ ជ័យលាភនឹងទទួលប្រាក់អាហារូបករណ៍ចំនួន ១០ម៉ឺន៦ពាន់ដុល្លារអាមេរិក សម្រាប់ផ្គត់ផ្គង់ការចំណាយថ្លៃសិក្សា។

ចំពោះអាហារូបករណ៍ថ្នាក់អនុបណ្ឌិតគ្រប់គ្រង (Master of Global Management) នៅសាកលវិទ្យាល័យ Thunderbird សហរដ្ឋអាមេរិក បេក្ខជនត្រូវបំពេញលក្ខខ័ណ្ឌដាក់ពាក្យចូលរួមស្នើអាហារូបករណ៍ ដូចជា ត្រូវមានពិន្ទុទាបបំផុត GPA ស្មើនឹង៣.០ចេះប្រើប្រាស់ភាសាអង់គ្លេសស្ទាត់ជំនាញ និងបំពេញនូវលក្ខខ័ណ្ឌផ្សេងៗដែលសាលាតម្រូវ។ ដោយឡែក ការឧបត្ថម្ភអាហារូបករណ៍វិញ ជ័យលាភីនឹងទទួលបានថវិកាអាហារូបករណ៍ចំនួន ១០៦០០០ដុល្លារអាមេរិក ក្នុងនោះ ថ្លៃសិក្សា ៨៦០០០ដុល្លារ និងប្រាក់ឧបត្ថម្ភការរស់នៅចំនួន ២០០០ដុល្លារ។ អាហារូបករណ៍ពេញគ្របដណ្តប់ទៅលើថ្លៃសិក្សា, ការរស់នៅប្រចាំខែ តំលៃសំបុត្រយន្តហោះទៅមក ទិដ្ឋាការ និងសម្ភារៈសិក្សាអប់រំ។

រីឯ អាហារូបករណ៍អនុបណ្ឌិតសារព័ត៌មានអន្តរជាតិ (Master in International Journalism) សិក្សានៅសាកលវិទ្យាល័យ Hong Kong Baptist University ទីក្រុងហុងកុង បេក្ខជនត្រូវបំពេញលក្ខខ័ណ្ឌនៃការដាក់ជ្រើសរើស ដូចជា ពលរដ្ឋនៃប្រទេសកម្ពុជា ឥណ្ឌា ឥណ្ឌូនេស៊ី វៀតណាម និងហ្វីលីពីន, ត្រូវមានបរិញ្ញាប័ត្រ ឬសញ្ញាប័ត្រដែលមានតម្លៃប្រហាក់ប្រហែល និងត្រូវមានពិន្ទុភាសាអង់គ្លេស IELTS យ៉ាងតិច ៦.៥ ។ ចំពោះការឧបត្ថម្ភអាហារូបករណ៍ ជ័យលាភីទទួលបានអាហារូបករណ៍ពេញគ្របដណ្តប់ទៅលើថ្លៃសិក្សា, ការរស់នៅប្រចាំខែ តំលៃសំបុត្រយន្តហោះទៅមក ទិដ្ឋាការនិងសម្ភារៈអប់រំ។

ចំពោះកាលបរិច្ឆេទផុតកំណត់ឈប់ទទួលពាក្យ បេក្ខជនត្រូវដាក់ពាក្យស្នើសុំអាហារូបករណ៍តាមប្រព័ន្ធ Online ឲ្យបានត្រឹមថ្ងៃទី ២៨ ខែកុម្ភៈ ឆ្នាំ២០១៦។ បេក្ខជនដែលជាប់ការជ្រើសរើសដំបូង នឹងត្រូវបានជូនដំណឹងអំពីការសម្ភាសន៍ផ្ទាល់មាត់។ គួរបញ្ជាក់ផងដែរ Hinrich Foundation ជាមូលនិធិសប្បុរសជនមួយឯករាជ្យដែលមានទីស្នាក់ការនៅទីក្រុងហុងកុង៕

សម្រាប់ព័ត៌មានបន្ថែម និងការដាក់ពាក្យ សូមទំនាក់ទំនងតាមរយៈអ៊ីម៉ែល [email protected] ឬហ្វេសប៊ុក Hinrich Foundation’s Education Facebook ឬចូលទៅកាន់Link គេហទំព័រខាងក្រោមនេះ http://hinrichfoundation.com/trade-scholarship-careers/scholarship/master-of-global-management/ និង http://hinrichfoundation.com/trade-scholarship-careers/scholarship/master-in-international-journalism/ ៕